မနေ့ညက စိတ်ကူးပေါက်ပြီး ကိုယ့်ရဲ့ facebook စာမျက်နှာမှာ ဒီလို သတင်းစကားလေး တင်လိုက်ပါတယ်။ သူငယ်ချင်းတွေကို တချက် လှမ်းပြီး signal ရိုက်လိုက်တာပါ။
Blog တို့ FB တို့ မပါဘဲ ဘ၀ကို ဖြတ်သန်းကြည့်အုံးမယ် .. လို့။
အဲဒီလိုရေးလိုက်တာနဲ့ ပထမဆုံး တုံ့ပြန်ရေးလိုက်တာ အဝေးက မိတ်ဆွေတယောက်ဖြစ်တဲ့ ကိုကျော် ပေါ့။ သူက ဒီလိုပြန်ရေးတယ်။ ဘယ်နှစ်နာရီလဲ တဲ့။ အဲဒါတွေနဲ့ ဝေးပြီး ဘယ်နှစ်နာရီ နေမှာလဲ လို့ ပြန်မေးလိုက်တာပါ။ အဲဒါကို ကိုယ်ကလဲ စက္ကန့်မခြား ဒီဖက်ကနေ ပြုံးပြီး ဖတ်နေမိတာ..။ ငါ့အကြောင်းတွေ သိကုန်ပြီလို့ ပြုံးစိစိ ဖြစ်နေတာ..။
အစကတော့ ဘာမှ မသိခဲ့ဘူး။ ခေတ်ပေါ် လောကဓာတ်ပညာတွေကို နားလဲ မလည်ဘူး၊ သိလဲ မသိချင်ခဲ့ဘူး။ အဲဒါတွေ လုပ်ကြည့်ရင် မှားသွားမလား၊ မှားရင် ငါလဲ မပြင်တတ်တော့ ဒုက္ခ ဆိုတဲ့ ကြောက်တဲ့ စိတ်အခံကလဲ ရှိနေတယ်။ အခုလဲ သိတယ်လို့ မဆိုနိုင်ပါဘူး။ မျက်မမြင် ဆင်စမ်းတုန်းပါပဲ။ ဆင်မြီးကို မြွေကြီးပါလား ဖြစ်တုန်းပါပဲ။
ဒါပေမဲ့ ကိုယ့်ကို အဓိက ဆွဲဆောင်လိုက်တာက သူငယ်ချင်းတွေပါ။ သူငယ်ချင်းတွေရှိတယ် ဆိုတဲ့ အသိနဲ့ အဲဒီကစားပွဲထဲ ၀င်ဆော့မိတယ်။ သူများ ထုတ်စီးတိုးနေရင် ကိုယ်ကလဲ ထုတ်စီးဝင်တိုး လိုက်ချင်တာကိုး။ သူတို့ ၀ိုင်းကြီးပတ်ပတ်ဆော့နေရင် ကိုယ်ကလဲ သွားလက်တွဲပြီး ၀ိုင်းလိုက်ချင်သေးတာကိုး။ ဒါနဲ့ facebook ကို မနက်တိုင်း ဖွင့်ကြည့်မိပါတယ်။
အတော်အလုပ်များသွားတာတော့ အမှန်ပဲ။ သူငယ်ချင်းတချို့က ဟင်းတွေချက်ပြီး ကိုယ့်ကို တဂ်တယ်။ လာစားပါအုံး တဲ့။ အစားအသောက်ကို ခုံမင်မှန်းသိတော့ လာခေါ်တယ်လေ။ အစားအစာတွေကလဲ ကိုယ့်အကြိုက်ချည်း ဖြစ်နေတယ်။ ပြုံးပြုံး ပြုံးပြုံး နဲ့ သူ့ရဲ့ တံခါးခေါက်၊ သူ့ထမင်းစားပွဲမှာ ၀င်ထိုင်ပြီး စကားတပြောပြောနဲ့ ၀င်စားခဲ့တယ်။ အအေးတွေလုပ် တိုက်ရင်လဲ သောက်၊ ဒါကတော့ အကြိုက်ဆုံးပဲ၊ လုပ်နည်းလေး မျှပါအုံး ဘာညာ ပြောပြီး ပြန်လာခဲ့တယ်။
တချို့မိတ်ဆွေတွေကျတော့လဲ စာကောင်းလေး မြည်းပါအုံး တဲ့။ ကိုယ်ဆို ဒီလိုစာကောင်းတွေ ဖတ်ရဖို့ ဘယ်လိုက်ရှာရမယ်မှန်း မသိ။ အခုလို တခုတ်တရ ကိုယ့်ရှေ့အရောက်ပို့ပေးပြန်တော့ ကျေးဇူးတင်ရတာပေါ့။ ဗဟုသုတလဲ ရတယ်။ အသိဥာဏ်လဲ တိုးတယ်။ စာဖတ်ပြီး ထင်မြင်ချက်တွေ တယောက်တပေါက် ပြောကြပြန်တော့ ထောင့်မျိုးစုံက မြင်ကြည့်လို့ ရပြန်ပါရော..။
တချို့ကျတော့လဲ သူတို့ရဲ့ ကိုယ်ပိုင် အနုပညာတွေ..။ မျှဝေတာတွေ..။ စာတွေ၊ ကဗျာတွေ၊ ပန်းချီ၊ ဒီဇိုင်းတွေ ရင်သပ်ရှုမော မုဒိတာပွားရတယ်။ ၀မ်းနည်းစရာဆို သူငယ်ချင်းနဲ့အတူ ငိုရတယ်။ ပီတိဖြစ်စရာဆို အပြုံးချင်း ဖလှယ်ရတယ်။ နွေးထွေးတဲ့ နှလုံးသားရှိသူချင်း မျက်နှာချင်း ဆုံရတယ်။
တချို့ကျတော့လဲ သတင်းတွေ..။ လတ်တလော ဖြစ်ပျက်သွားတဲ့ သတင်းပူပူနွေးနွေးတွေကို အံ့သြတကြီး ဖတ်ရတတ်တယ်။ နာရေး၊ သာရေး၊ လူမှုရေး အကုန် အစုံပဲ။ နာရေးဆို ဟာ..ကနဲ ဖြစ်ရ။ သာရေးဆို ၀မ်းသာရ။ လူမှုရေးဆို သာဓုခေါ်ရ ပေါ့။ ကမ္ဘာရွာဆိုတာ ဒါ နေမှာ..။
အရင်ကတော့ ရွာက လူ မြို့တက်လာလို့ အိမ်ရောက်မှ ခေါင်းပေါ်က အထုပ်လေးချ၊ ပတ်လာတဲ့ ပုဝါလေး ဖြုတ်ပြီး ယပ်ခတ်ပါစေအုံး စောင့်ရတာ။ အမောပြေမှ ရေလေး တခွက် တိုက်စမ်းပါအုံးအေ လုပ်သေးတာ။ ပြီးမှ ဖြေးဖြေးချင်း ပြောလာတဲ့ သတင်းစကား နားထောင်ရတာမျိုးကိုး။ အဲဒီတော့မှ ကစားဖော်ကစားဖက် အေးသာ ဟိုလူကြီးနဲ့ လိုက်ပြေးသွားပြီ ဆိုတာမျိုး သိရတာကိုး။
အခု ကမ္ဘာရွာဖြစ်ပုံများကတော့ ရွာက ကြီးဒေါ်ကြီးကိုလဲ စောင့်စရာ မလိုဘူး။ လကြတ် နေကြတ်တာက စလို့ မင်းသမီး ပါးရိုက်တာအဆုံး မိနစ်ပိုင်း အတွင်း ခရေစေ့တွင်းကျ သိရတော့တာ..။ ထင်မြင်ချက်အမျိုးမျိုး၊ ဆန္ဒအမျိုးမျိုး ကို ရှုထောင့်မျိုးစုံကနေ ဖတ်ရတယ်။ စကားဝိုင်းလေးတွေ ဟိုနား တစု၊ ဒီနား တစု ဖြစ်သွားတတ်တယ်။ စကားဝိုင်းမှာ ၀င်မဆွေးနွေးဘဲ အနားမှာ ငြိမ်ငြိမ်သက်သက် ၀င်နားထောင် နိုင်တယ်။
တချို့ကျတော့လဲ ဗီဒီယိုလေးတွေ..။
ဟိုတလောက ချစ်ခင်ရတဲ့ ညီမလေးတယောက်က သူ့သားကလေး ချိုပြုံးရွှင်ပုံကို ဗီဒီယိုရိုက်ပြီး တင်တယ်။ ကိုယ်ကလဲ ကလေးချစ်တတ်သူမို့ အဲဒါလေးသွားသွားကြည့်ပြီး ကလေးနဲ့အတူ ရီမောလို့ သဘောကျနေတာ။ နောက်မှ ကိုယ့်အဖြစ်က အံတီမာမာအေးရဲ့ သီချင်းတပုဒ်နဲ့ တူနေတာ သတိရပြီး ကွန်မန့်ရေးခဲ့တယ်။ ပုံ/ကျွဲမ ဆိုပြီးတော့လေ..။
နောက်မှ ပြန်စဉ်းစားတာ ကလေးရူးမအကြောင်းက ကျွဲမ မဟုတ်သေးပါဘူးလို့..။ သီချင်းပြန်ဆိုကြည့်မှ အာယားမ သီချင်း ဖြစ်နေလို့ အာယားမ ရေးရမှာ ကျွဲမ သွားရေးမိတယ် လို့ ပြန်သွားပြောရသေးတယ်။ သူကလဲ ဘာ ကျွဲမ ပါလိမ့် စဉ်းစားနေတာ တဲ့၊ လိုက်မေးအုံးမလို့ တဲ့။ နောက်တော့ ကိုယ်ကလဲ ခပ်ညိုညိုမို့ ကျွဲမလဲ ဟုတ်တော့ ဟုတ်ပါတယ်လေ..လို့ မလုပ်ချင်ဘဲ လုပ်လိုက်ရသေးတယ်။ ကျွဲမ သီချင်းထဲမှာ ထမင်းအိုးဖင် လို့ဆိုထားတော့ တူတော့ မတူချင်ဘူးပေါ့။
တခါတလေ သီချင်းလေးတွေ နားထောင်ရ၊ ရုပ်ရှင်တိုလေးတွေ မျှဝေတာ ကြည့်ရသေးတယ်။ ဒါ ကိုယ်ငယ်ငယ်က သိပ်ကြိုက်ခဲ့တဲ့ သီချင်းပဲ ဆိုပြီး လိုက်များတောင် ဆိုလို့..။ ပျော်ဝင်လွယ်တာများ ပြောပါတယ်။ ရုပ်ရှင်ကျတော့လဲ ကြိုက်ရပြန်ပါပြီ။ ကောလိပ်ဂျင်နေ၀င်းကားဆို ၂ခါလောက်တော့ ကလစ် လိုက်တာပဲ။
တချို့ကျတော့လဲ Virus တဲ့။ မည်သို့မည်ပုံ လုပ်လိုက်သည် မသိ၊ ကိုယ့် facebook wall မှာ ကြိုးလေးတချောင်းတည်း sexy ပုံကြီး လာပေါ်နေတယ်။ ဟ..ဘယ့်နှယ့်ဟာကြီးပါလိမ့် လို့ ဖြစ်ရသေးတယ်။ ပို့တဲ့ မိတ်ဆွေကို မေးကြည့်တော့ သူဖွင့်ရုံ ဖွင့်လိုက်တာပါ တဲ့၊ ကိုယ့်ဆီ အလိုအလျောက် ရောက်သွားတယ် ပြောတယ်။ အဲဒါ Virus တဲ့။ အဲဒီလို Virus တွေလဲ ရှိတယ်လို့ ပြောချင်တာပါ။
ခက်တယ်။ တကယ် ခက်တယ်။ အရင်က ဘလော့ တခုတည်းတောင် အလုပ်က များလှပြီ။ အခု facebook ပါ ဆိုတော့ ကိုယ့်အိမ်ကို လာလည်တဲ့ မိတ်ဆွေများက ဟာ..ရန်ကုန်က အလုံ အမှိုက်ပုံကြီး LA ရွှေ့ထားပါလား ထင်ကြမှာ..။ ဒါတောင် မိတ်ဆွေတယောက် က twitter လုပ်သေးလား တဲ့။ ဒါမျိုး နောက်တခုရှိသေးတာလား ဆိုပြီး ကိုယ့်နဖူးကိုယ် ရိုက်မိတယ်။
မနက် နိုးတာနဲ့ မနက်စာ စားဖို့ ပြေးလုပ်၊ ပြီးရင် ကွန်ပျူတာ ထဲ ခေါင်းဝင်နေတယ်။ ဟင်းချက်နည်း စာအုပ်ထုတ်မလားလဲ စဉ်းစားနေတယ်။ အမြန်စာ၊ ပြီးစလွယ်စာ၊ မနူးမနပ်စာ၊ ကတိုက်ကရိုက်စာ စသဖြင့်ပေါ့။ ဒါမျိုးတွေချည်း အိမ်မှာ ချက်ကျွေးနေမိလို့ပါ။ အစိမ်းမစားရသေးတာ တော်သေးတာပေါ့လို့ အကောင်းဖက်လှည့်တွေးရင်တော့ ဖြစ်ပါတယ်။
ကျောင်းကလဲ တဖက်တက်သေးတော့ ကျောင်းမှာ စာစီစာကုံးရေးရင်း အီးမေးလ်ကို ယောင်ယောင်ပြီး ဖွင့်ကြည့်မိတယ်။ facebook က စာတွေလာတာတွေ့ရင် ဟယ် သူ ဘာများ ရေးပါလိမ့် တဲ့ (ကိုယ့်စိတ်ထဲမှာ ဖြစ်နေတာ ရေးပြတာပါ)။ ဒါနဲ့ လိုက်သွားကြည့်တော့ မြန်မာစာ ဖတ်လို့မရတဲ့ကွန်ပျူတာ ဖြစ်နေတာမို့ လေးထောင့်တုံးတွေ မြင်ရမှ လက်လျှော့ ပြန်လာတယ်။ ဆရာမက control လုပ်ပြီး သူ့ကွန်ပျူတာကနေ ကျောင်းသားတွေ ဘာလုပ်လဲ ကြည့်နေတာမို့ နောက်တခါ စာလုပ်ချိန် စာမလုပ်ရင် အမှတ်လျှော့မတဲ့။ မျက်နှာလေး ငယ်ပြီး မကြားသလို လုပ်နေရတယ်။
ကိုဇာဂနာ့ ဟာသ လို “ကျန်းမာရေးကလဲ မကောင်း..” လို့ ညည်းမလို့ လုပ်ရင် “ဘယ်ကောင်းမှာလဲ၊ လမ်းလေးဘာလေးလျှောက်၊ လေ့ကျင့်ခန်းလေး ဘာလေးမှ မလုပ်ဘဲကိုး” တဲ့။ “အားတဲ့အချိန် ကွန်ပျူတာပဲ ကြည့်နေတာ” တဲ့။ သနားမလား အောက်မေ့တယ်၊ လက်ပစ်ဗုံးနဲ့ ထုတယ်။
ဆီးချိုကလဲ တရိပ်ရိပ် တက်..။ ဆရာဝန်ပြတော့ အားလပ်ချိန် ဘာလုပ်သလဲ တဲ့။ အချိုရည် သောက်ရင်း ကွန်ပျူတာမှာ စာထိုင်ဖတ်တာပဲ လို့ ပြောရင် လူနာစာရင်းကတောင် ထုတ်လိုက်မဲ့ကိန်း ရှိတယ်။ သူကြားချင်တာက diabetes ပညာပေး သင်တန်း တက်နေပါတယ်တို့ ဘာတို့..။ ဒါပေမဲ့ အိပ်မက်ဟာ တကယ်ဖြစ်မလာ.. ဆိုတာ သူ မသိသေးဘူး။
အခုတော့ Facebook တို့ ဘလော့တို့ မပါဘဲ နေကြည့်မယ်ဆိုတော့ နည်းနည်း လိမ်မာအုံးမယ် လို့ ပြောချင်တဲ့သဘောများလား။ ဒါမှမဟုတ် မိတ်ဆွေ တယောက် ပြောသလို အမူးပြေရင်တော့ ထန်းပင်ကို ပြန်မော့ကြည့်နေမဲ့သူများ ဖြစ်နေမလား။
အကောင်းဆုံးကတော့ ဘ၀မှာ လုပ်ချင်တာနဲ့ လုပ်သင့်တာကို မျှပြီး ဟန်ချက်ညီညီ လုပ်နိုင်ဖို့သာ ကြိုးစားရမှာပဲ။ ဒါမှ တကယ့်ပျော်ရွှင်မှုရမယ်လို့ ထင်မိတာပဲလေ..။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
လူကြီးသူမတွေ ပြောတာ ကြားဖူးတယ်။ နေ့နံနဲ့ လိုက်လို့ လူတွေက စိတ်သဘောထားတွေ ပြောင်းတတ်တယ် တဲ့။
ဟုတ်မဟုတ်တော့ ကိုယ်လဲ သေချာ မသိပါဘူး။ ကြားဖူးနားဝ ရှိတာကို ပြောပြတာပါ။ “သူက စိတ်ကြီးမှာပေါ့ စနေသမီးကိုး” ဆိုတာမျိုး၊ “ကလေးက အေးတယ်၊ ကြာသပတေးသမီးလေ..” ဆိုတာမျိုး၊ “သောကြာသားမို့ စကားကတော့ များသလား မမေးနဲ့” ဆိုတာမျိုးတွေပေါ့။
အနောက်နိုင်ငံတွေမှာတော့ မွေးတဲ့ နေ့အလိုက် အစွဲအလန်းတွေ သိပ်မကြားမိတတ်ဘူး။ သူတို့ကတော့ ရာသီခွင်နဲ့ လူတွေရဲ့ အတွင်းစိတ်ကို ပိုစိတ်ဝင်စားတတ်ကြတာပါ။ အဲဒီရာသီခွင်တွေကလဲ အများအားဖြင့် မှန်တတ်၊ တိုက်ဆိုင်တတ်လေတော့ စိတ်ဝင်စားစရာပါပဲ။
တိရိစ္ဆာန်အကောင်တွေနဲ့လဲ မွေးနှစ်တွေကို ပိုင်းခြား သတ်မှတ်ထားတာမျိုး ရှိသေးတာ..။ တခါက အသိတယောက်က ကိုယ့်ကို ဘာအကောင်လဲ မေးလို့ အတော် အူကြောင်ကျား ဖြစ်သွားသေးတယ်။ ငါက မြင်းလေ..ဒါကြောင့် တချိန်လုံး ပြေးနေရတာ ဆိုပဲ။
နင်ကတော့ ၀က် တဲ့..၊ သူ အဲဒီလို ပြောတော့ ၀မ်းနည်းလိုက်တာ..။ ကိုယ့်ကို တယ်နှိမ်ပါလား ထင်မိသေးတယ်။ တကယ်က မွေးတဲ့ ရာသီခွင် အကောင်ကို သူက ရည်ညွှန်းချင်တာ..။ ကိုယ့် ခန္ဓာကိုယ်ကို စောင်းပြောတာ မဟုတ်ရှာပါဘူး။ တိုက်ဆိုင်မှုရှိပေမဲ့ ခွင့်လွှတ်လိုက်ရပါတယ်။
နေ့နံနဲ့ ပတ်သက်တာ ပြန်ကောက်ရရင် ကိုယ်ကတော့ ကျားပါ။ တနလာင်္ ကျား၊ နတ်ပြည်သွား..လို့ ငယ်ငယ်က ပျော်ပျော်ရွှင်ရွှင် ဆိုခဲ့တဲ့ ကျားပေါ့။ တခြား တနလာင်္တွေ ဘယ်လို စိတ်မျိုးရှိတယ် မသိတတ်ပေမဲ့ ကိုယ်ကတော့ တခါတခါ စိတ်ကြီးတတ်တာကလွဲရင် သဘောကောင်းတဲ့ ကျားလေးပါ။ (တီဗီမှာတင်မဟုတ်၊ ဘလော့မှာလဲ အဲဒီလို ကြော်ငြာ ဖြတ်ဝင်တာတွေ ရှိတတ်တယ်။)
တနေ့တော့ ကျားနဲ့ ဆင် RC 2 မှာ တွေ့ကြတယ်။ သူက ဗုဒ္ဓဟူး လေ..။ ရှေးအဆိုအရ ဆိုရင်တော့ ခန္ဓာကိုယ် အင်အားကြီးသူချင်း တွေ့ရင် ချကြတယ်လို့ ဆိုလိုချင်သလားမသိ။ ပုံပြင်ထဲမှာ ရန်ဖက် ပေမဲ့ ကိုယ်တို့နှစ်ယောက်ကတော့ အိမ်ထောင်ဖက် ဖြစ်ခဲ့ကြတယ်။ ကိုက်တော့ ကိုက်ကြပါတယ်။ ကြာကြာ တခါ၊ မကြာ မကြာ တခါ ပေါ့။
ကျားလေးက music ကြိုက်တယ်။ အားရင် ဇိမ်လေးနဲ့ စာအုပ်လေးဖတ်၊ သီချင်းလေး နားထောင်ပြီး အမြီးလေးတလှုပ်လှုပ် နေချင်တယ်။ တခါတလေ ရုပ်ရှင်ကိုသွား၊ ကြော်ငြာဘုတ်ဒ် တွေကို ငေးမောပြီး ပေါက်ပေါက်ဆုပ်လေး မြုံ့ရင်း မျက်လုံးပြူးပြီး ပိတ်ကားကို စိုက်ကြည့်နေရတာ အရသာ လို့ ထင်တယ်။
ကျားမှာ သူငယ်ချင်းတွေကလဲ အကောင်ပလောင်စုံလို့ အများကြီးး။ သူငယ်ချင်းတွေက ဒါကို ၀ါသနာပါရင် ကျားကလဲ အလွယ်တကူ ပျော်ဝင်လိုက်ဖို့ ၀န်မလေးဘူး။ သူတို့က ဒါ ဆို ကျားကလဲ ဒါ၊ သူတို့က ဟိုဟာဆို ကျားကလဲ ဟိုဟာ..။ အပြင်းအထန်ကြီးတွေ ကျားက မကြိုက်ဘူး။ အေးရာအေးကြောင်း ကျား။
အဲဒီကျားလေးရဲ့ အဖော် ဆင်ကတော့ တမျိုး။ သူကတော့ အေးအေးဆေးဆေးပဲ နေမယ်။ တခုခု ကို စွဲစွဲမြဲမြဲ လုပ်တတ်တယ်။ ရှေ့ကိုတိုးမယ်ဆိုရင်တောင် ရှေ့နောက် စဉ်းစားတယ်၊ ကျားလို ၀ူးဝူးဝါးဝါး ပြေးမသွားဘူး။ မစဉ်းစားလို့ မရဘူးလေ..။ ကျားတလွဲလုပ်သမျှ ဆင်က ဖြေရှင်းရတာကိုး။ ကျားက လုပ်ချင်တာတွေ လုပ်ပြီးလို့ မျက်စိသူငယ်နဲ့ ခေါင်းငိုက်စိုက်ချနေရင် ဆင်က ၀င်ကူရတာပဲ။ အဲဒီလိုကူရပေါင်းလဲ များပြီ။
တခုခုဆို ကျားနဲ့ဆင် ခေါင်းချင်းဆိုင်ပြီး တိုင်ပင်ကြတယ်။ ကိစ္စအကုန်လုံးကို နှစ်ယောက်စလုံးရဲ့ ရင်ထဲက အသည်းနှလုံးကို ဗဟိုပြုပြီးမှ စဉ်းစားဆုံးဖြတ်ကြတာများတယ်။ လွဲတဲ့အခါတွေလဲ ရှိတာပေါ့။ တခါတလေ တောင်အကြီးကြီးပေါ် တက်ရတဲ့အခါတွေ ရှိတယ်။ ချောက်အနက်ကြီးကို ဖြတ်ကူးရတဲ့အခါတွေ ရှိတယ်။ ပင်လယ်ကြီးနဲ့ ရင်ဆိုင်တိုးရတာတွေလဲ ရှိသေးတယ်။ အဲဒီအခါဆို ကျားက အသံမျှင်းမျှင်းလေးပဲ ထွက်တော့တာ။ အမြီးလေးသိမ်းပြီး ခွေနေတာ..။
အဲဒီအခါဆို ဆင်က မတ်မတ်ရပ်မှ ဖြစ်တော့မယ်။ ကျားလေးကို ထ ထ ဆိုပြီး ဆွဲထူရတယ်။ ကျားလေးပါမှ ဆင်ကြီး ဖြောင့်ဖြောင့်သွားနိုင်မယ် လို့ ပြောတယ်။ ဒါဆို ကျားလေးက ပြန်လန်းပြီး ဆင်ကြီးနောက်က ဆတ်တောက် ဆတ်တောက် လိုက်လာတယ်။ ဒီလိုနဲ့ လမ်းလေးကျဉ်းကျဉ်းကို အတူတူ သွားကြပြန်ပါရော..။
အခုတော့ ဒီကျားနဲ့ ဒီဆင်မှာ ကလေးလေးတကောင်ရှိပြီ။ လူလေးတော့ မဟုတ်ဘူး။ အမေနဲ့ နည်းနည်းဆင်တဲ့ အမြီးလေးနဲ့ ကြောင်အဖြူလေးပေါ့။ သမီးက အဖေကို ချစ်တယ်၊ အမေကို နိုင်တယ်။ ကြောင်လေးရှိတဲ့အတွက် ကျားရော ဆင်ရော ဘ၀မှာ ချမ်းမြေ့တယ် လို့ ထင်ကြတယ်။ ပင်ပန်းသမျှ သမီးမျက်နှာမြင်တာနဲ့ အကုန်ပျောက်တယ်။ တနေ့တနေ့ သမီးမျက်နှာတကွက်စာကို ငုံ့ငုံ့နမ်းရတာအမော..။
ညညဆို သားအမိ သားအဖ ၃ယောက် အတူတူအိပ်ကြတယ်။ ခူး ခလော ဂူး အသံတွေ စုံနေတာပေါ့။ တခါတလေ ဖေဖေဆင်ကြီးက သမီးကြောင်လေးကို ပွေ့ရင်း အိပ်တယ်။ သမီးကြောင်လေးက တဂူးဂူးနဲ့ ကျေနပ်နေတာ..။ မေမေကျားက သူတို့ကို ကြည့်ပြီး ကြည်နူးရင်း အိပ်တယ်။ ညလယ်ကျရင်လဲ သမီးကလေး ဘယ်လိုအိပ်သလဲလို့ အဖေတွေ အမေတွေက ထ ထကြည့်ရတယ်။ သမီးကလေး ကံကောင်းတယ်။
နောက်ပြန်လှည့်ကြည့်ရင် ခြေရာလေးတွေ တွေ့ရမယ်။ ဒါက ပျော်ပျော်သွက်သွက် အတူ လျှောက်ခဲ့တာ..။ ဒါကတော့ ကျားလေး နေမကောင်းလို့ တရွတ်ဆွဲ လိုက်ရတာ..။ ဆင်ကြီးက ပုခုံးပေါ်တင်ပြီး ထမ်းခေါ်ရတာ..။ ဒါကတော့ ကျားက ကပ်ဖဲ့လုပ်ပြီး ဟိုလျှောက် ဒီလျှောက် လျှောက်နေတာ..။ ဒီ လမ်းဆုံမှာတော့ နှစ်ယောက်သား ရပ်နေပုံပဲ။ ခေါင်းချင်းဆိုင် တိုင်ပင်နေသလား။ နှစ်ယောက်သား လမ်းလေးတကွေ့ အတူကွေ့လိုက်ပြန်ပေါ့။
ဘာလိုလိုနဲ့ အတူလျှောက်ခဲ့တာ ၁၄နှစ် ရှိခဲ့ပြီ။ ကဗျာထဲကလို ခယောင်းတောကို ပန်းကော်ဇောအဖြစ် ပြောင်းမပစ်နိုင်တောင် လမ်းကလေး ပြာပြာမှောင်၊ သာယာအောင်တော့ ဖန်တီးနိုင်ခဲ့ပါတယ်။
မိုးချိုသင်း
(မတ်လ ၁ရက်နေ့ အမှတ်တရ)
အပြည့်အစုံဖတ်မယ်...
ပြန်ခေါက်ထားခဲ့မယ်...
အခုလို ဆောင်းတွင်းအေးအေး မှာ မိုးစောစောချုပ်တာမို့ ပတ်ဝန်းကျင်တခုလုံး မှောင်မဲ လို့..။ ရောင်စုံမီးလေးတွေနဲ့ အလှဆင်ထားတဲ့ သစ်ပင်ကြီးတွေက ခန့်ခန့်ကြီး မားမားမတ်မတ် ရပ်လို့..။ ညဖက် အိမ်အပြန်လမ်းတွေမှာ ကိုယ်တို့နှစ်ယောက် အမြဲပဲ သုတ်သုတ် သုတ်သုတ်နဲ့ ကိုယ့်အိမ်လေးဆီကို အပြေးပြန်လာတတ်ကြတယ်။
အိမ်အပြန် လမ်းတလျှောက် ကားပေါ်ကနေ အပြင်ကို ကြည့်လိုက်ရင် အိမ်ပုပုလေးတွေကို နွေးနွေးထွေးထွေး တွေ့ရတတ်တာ။ မှန်ပြူတင်းပေါက် အကွက်လေးတွေကြားကနေ အိမ်တွင်း အလှဆင်ထားတဲ့ ခရစ်စမတ်သစ်ပင်လေးတွေကို ရိပ်ကနဲ ရိပ်ကနဲ မြင်ရတတ်တယ်။ ဒါမှမဟုတ် မိသားစု ထမင်းဝိုင်း…။ စားပွဲဝိုင်းဘေးမှာ ဆော့နေတဲ့ ကလေးလေး ရီသံတောင် ကြားလိုက်ရသလို ထင်မိတယ်။
ကိုယ်တို့ငယ်ငယ်ကလဲ မိသားစု ထမင်းဝိုင်းတွေဟာ ပျော်စရာ ကောင်းခဲ့ပါတယ်။ အဖေရယ် အမေရယ် ကိုယ်တို့ မောင်နှမ ၅ယောက်ရယ် အမြဲ ထမင်းလက်ဆုံစားတတ်ကြတယ်။ အထူးသဖြင့် ညစာ ပေါ့။ မိသားစုဝင်တယောက်ယောက် နောက်ကျရင်လဲ အမေက စောင့်ပြီး စားစေတာ၊ နောက်ကျသူကလဲ ညစာအမီ ပြန်လာတာပါပဲ။
ထမင်းဟင်းတွေက အမြဲ ပူပူနွေးနွေး ပဲ။ ဟင်းကတော့ အမယ် မများဘူး။ အသားတခွက်၊ အရွက်ကြော် တမျိုး နဲ့ ချဉ်ရည် တခွက် ပါလေ့ရှိတယ်။ ဟင်းခွက်က လက်လည်တယ် မရှိဘူး။ တယောက်လက် တယောက် ကမ်းလိုက်၊ ထည့်လိုက်ကြတာပဲ။ အသုတ်တမျိုးမျိုးပါရင် ခဏလေးနဲ့ ပန်းကန်က ပြောင်သွားပြီ။ ပြီးမှ ထည့်တာများသွားတဲ့သူဆီ ငါ့နည်းနည်းပေး တောင်းရတယ်။
ပြီးရင် မောင်နှမတွေ ဆူဆူညံညံ နဲ့ ပန်းကန်တွေ ဆေးကြတာ။ ကိုယ့်အမအကြီးတွေ ဖြစ်တဲ့ မစံ နဲ့ မအေးက အားလုံးရဲ့ ပန်းကန်တွေ အမြဲတမ်း ဒိုင်ခံ ဆေးလေ့ရှိတာ။ ကိုယ်တို့အငယ်တွေက စားပြီးရင် ကိုယ့်ပန်းကန်လေးကိုင်ပြီး လက်ဆေးကန်နားမှာ ရပ်စောင့်လို့။ အမတွေက ထားခဲ့ ထားခဲ့ ငါ ဆေးလိုက်မယ် လို့ ပြောရင် ၀မ်းသာသွားတာ။
လက်ကလေး မြန်မြန်ဆေးပြီး အိပ်ယာပေါ်လှဲ ဇိမ်နဲ့ စာသွားဖတ်တာ။ ဒါမှမဟုတ် မိသားစု စကားဝိုင်းထဲ ဟိုတိုး ဒီခွေ့နဲ့ နားထောင်။ ဒါမှမဟုတ် ရေဒီယိုက ညဖက်လာတဲ့ ဇာတ်လမ်းတွေ၊ သီချင်းတွေကို စောင်ကြီးခြုံပြီး ၀ိုင်းနားထောင်ကြတယ်။ တီဗီပေါ်လာတော့ တီဗီရှေ့ ကို စောင်တွေ ခေါင်းအုံးတွေ ယူသွားပြီး သွားမော့တာပေါ့။
မိသားစု အပန်းဖြေချိန်လေး ပေါ့။
နောက်တော့ မိသားစု ထမင်းဝိုင်းလေးက လူနည်းနည်းလာ..။ ကိုယ်ချစ်တဲ့သူနောက် လိုက်ပြီး ကိုယ့်မိသားစု ကိုယ်ထူထောင်ကြတော့ မိသားစု ၀ိုင်း အကြီးကြီးကနေ မိသားစုဝိုင်း သေးသေးလေးတွေ ဖြစ်ကုန်တာပေါ့။ အဲဒီအခါကျတော့လဲ တမျိုးတဖုံ ပျော်စရာကောင်းတာ မှန်ပေမဲ့ အရင်က မိသားစု ထမင်းဝိုင်းကြီးကို လွမ်းမိတတ်တာပဲ။
အခုတလော မိသားစု ထမင်းဝိုင်းတွေကို သတိရနေမိတာမို့ နှစ်ကိုယ်တူ ဘ၀ ထူထောင်တော့ ထမင်းလက်ဆုံစားခဲ့တာလေးတွေလဲ သွားသတိရမိသေးတယ်။ ကိုယ်တို့နှစ်ယောက် ချစ်စ က ထမင်း ပထမဆုံး လက်ဆုံစားဖူးတာ လှည်းတန်းက ဓနုဖြူ ဒေါ်စောရီ ထမင်းဆိုင်မှာပါ။
အဲဒီတုန်းက နှစ်ယောက်စလုံး မိဘဆီ မုန့်ဖိုး လက်ဖြန့်တောင်းနေရတုန်းအရွယ်ပေါ့။ တက္ကသိုလ် ကျောင်းသူ ကျောင်းသားဘ၀ပေါ့။ တနေ့တော့ လှည်းတန်းသွားရင်း ဒေါ်စောရီဆိုင်မှာပဲ ထမင်းစားလိုက်ကြရအောင် တဲ့။ ကိုယ်လဲ ကောင်းသားပဲ ဆိုပြီး ၀င်စားကြတယ်။
ဆိုင်ရောက်တော့ သူက မှာချင်တာ မှာစား တဲ့။ ကိုယ့်ကို ခွင့်ပေးတယ်။ ကိုယ်လဲ သူ ခွင့်ပေးတယ် ဆိုတော့ ရိုးရိုးပဲတွေးပြီး စားချင်တာ မှာ လိုက်တာပေါ့။ ကိုယ်မှာလိုက်တာ ပုဇွန်တုပ်ကြီးဟင်းပါ။ ညှာညှာတာတာ မှာဖို့ အဲဒီတုန်းက တကယ် မစဉ်းစားမိဘူး။
နောက်မှ သူပြန်ပြောပြတာက သူက ကိုယ်အားရပါးရစားနေတာကို ငေးကြည့်နေတာ တချိန်လုံး တဲ့။ ကိုယ်ကြိုက်တယ်ဆိုလို့လဲ ၀မ်းသာတယ်၊ ဒါပေမဲ့ bill လာရင် ပိုက်ဆံ မလောက်ရင် ဒုက္ခ ဆိုပြီး ပူပန်မိနေလို့ ကိုယ့်ထမင်း ကိုယ် မစားနိုင်ဘဲ အိပ်ကပ် တစမ်းစမ်း ဖြစ်နေတာ တဲ့။ ကိုယ်ကတော့ အပူအပန်မရှိ ပျော်ပျော်ရွှင်ရွှင် ကြိတ်သလေ..။
နောက် ပိုက်ဆံရှင်းမှ ပါလာတဲ့ ပိုက်ဆံ နဲ့ လောက်င လို့ သူ ဟင်းချနိုင်ပါတယ် တဲ့။ တကယ်က ပုဇွန်တုပ်ကြီးဟင်းက အတော် ဈေးများတာပါ။ ကိုယ်ကလဲ ရိုးရိုးပဲတွေးမိတာ၊ မှာချင်တာ မှာ၊ ပုဇွန်တုပ်ကြီးတော့ မပါစေနဲ့ လို့မှ မပြောဘဲ။ အဲဒါ ပထမဆုံး လက်ဆုံစားခြင်းပေါ့။
နောက်တော့ ကိုယ်နဲ့ နေ့စဉ်နေ့တိုင်း ထမင်းအတူ စားဖို့ သူ့ကိုပဲ ရွေးခဲ့ပါတယ်။ ဘာဖြစ်လို့လဲဆိုတော့ သူက ထမင်းစားရင် သိတတ်သူမို့ပါ။ သူ့ပန်းကန်ထဲက အသားတွေကို ကိုယ့်ပန်းကန်ထဲ ထည့်ပေးတတ်သူလေ (တကယ်က သူက အသားထက် အရွက်ပိုကြိုက်လို့ပါ)။
သူနဲ့အတူတူ မိုးရွာတုန်း လမ်းဘေးဆိုင်လေးထဲ ပြေးဝင်ပြီး ထမင်းသုတ်လေးကို ငရုတ်သီးတောင့်လေးကိုက်ပြီး ညစာလုပ် အတူစားဖူးတယ်။ အိမ်မှာ လက်ဖက်သုတ်လေး နဲ့လဲ ထမင်းမြိန်ခဲ့တယ်။ ကြက်ဥကြော် နဲ့လဲ နှစ်ပါးသွားဖူးတယ်။ ခမ်းခမ်းနားနားနေရာတွေလဲ အတူသွားစားခဲ့ဖူးပါတယ်။ တခါတလေတော့ လေ ထဲမှာ…။ ခရီးအတူသွားရင်း လေယာဉ်ပျံပေါ်မှာ ညစာစားရတာကို ပြောတာပါ။
တခါကတော့ နှစ်သစ်ကူးညတညမှာ နယ်စပ်မြို့လေးတမြို့ရဲ့ ဟိုတယ် အခန်းလေးထဲမှာ ဖယောင်းတိုင်မီးလေး နဲ့ အတူထမင်းစား ဖူးသေးတယ်။ အဲဒီတုန်းက တာချီလိတ်မှာ ညနေ ၆နာရီထိပဲ မီးပေးတယ် ထင်တာပဲ။ ဟိုတယ်အခန်းလေးထဲမှာ ဖယောင်းတိုင်လေးထွန်း၊ ထမင်းစားရင်း ဟိုဖက်ကမ်းက မီးထိန်ထိန် ကို နှစ်ယောက်သား ငေးကြည့်မိခဲ့လို့ အမှတ်တရ ဖြစ်ခဲ့တာ။ အဲဒီအချိန်လေးကလဲ ကိုယ်မမေ့နိုင်တဲ့ အချိန်လေး တခုပဲ။
ကိုယ်က သူ့ကို ပြောခဲ့တယ်။ ကိုယ်တို့အတူ ရင်ဆိုင်ရမဲ့ ဘ၀တွေ နိမ့်ပါစေ၊ မြင့်ပါစေ၊ ဘ၀ရဲ့ ဘယ်လိုအခြေအနေမှာ ဖြစ်ဖြစ် စိတ်ထဲမှာ သန့်သန့်ရှင်းရှင်း ကြည်ကြည်နူးနူး နဲ့သာ ထမင်းလက်ဆုံစားချင်ပါတယ် လုိ့..။
ကိုယ်က ကဗျာဆရာ၊ ကျောင်းဆရာမ ရဲ့ သမီးပါ၊ မွေးကတည်းက ဟင်းတွေ အလျှံပယ် ပေါများ တဲ့ ထမင်းဝိုင်းမျိုးနဲ့ အမြဲစားလာတာမဟုတ်လို့ ဘာနဲ့မဆို စားတတ်ပါတယ်၊ လိပ်ပြာသန့်သန့် ပျော်ပျော်ရွှင်ရွှင် နဲ့သာ ဖြစ်ပစေ၊ တနေ့ ထမင်း ၂ နပ် ပါပဲ လို့ သူ့ကို အားပေးဖူးပါတယ်။
အဲဒီတော့ သူက အသေအချာစဉ်းစားပြီး ပြန်ပြောပါတယ်။
“ထမင်း ၂ နပ်??? ….၊ က မယ် မထင်ပါဘူး” တဲ့။
သူပြောတာ ခပ်တိုးတိုးပါပဲ။ ဒါပေမဲ့ ကိုယ် အကျယ်ကြီး ကြားလိုက်ရတယ်။
အော်.. အကြောင်းသိကုန်ပြီကိုးလေ…။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
တယ်လီဖုန်းဆိုတာ ဝေးနေတဲ့ ချစ်ခင်သူတွေကို နီးသွားစေတာမျိုး၊ ၀မ်းသာစရာ ၀မ်းနည်းစရာ သတင်းတွေကို အလျင်အမြန်နဲ့ သိသွားစေတာမျိုးဆိုတော့ ခေတ်နဲ့အတူ ပေါ်ပေါက်လာတဲ့ တိုးတက်မှုတွေထဲမှာ သာဓုခေါ်စရာ ကောင်းတဲ့ တီထွင်မှုတခုပေါ့။
ကိုယ်တို့ငယ်ငယ်က တယ်လီဖုန်းတွေ အင်မတန် ရှားသေးတယ်။ အဲဒီတုန်းက တယ်လီဖုန်းတွေက ဒီလို လှလှပပ ပါးပါးလျလျလေးတွေ ဘယ်ဟုတ်ပါ့မလဲ။ အားရပါးရ လူကို ကောက်ထုရင် ခေါင်းကွဲသွားနိုင်လောက်တဲ့ ထုထည်ကြီးတွေနဲ့ အမဲရောင် ဖုန်းကြီးတွေပါ။ ဒါပေမဲ့လည်း အဲဒီလို မဲမဲဖုန်းကြီးတွေနဲ့ပဲ အလှဓာတ်ပုံရိုက်တဲ့ မင်းသမီးပိုစတာပုံတွေ ခေတ်စားသေးတယ်။
ကိုယ်တို့ငယ်ငယ်လေးတုန်းက အိမ်မှာ ဖုန်းမရှိပါဘူး။ ဖုန်းကို ပထမဆုံး မြင်ဖူးတာ တက္ကသိုလ် ဆရာများဆောင်မှာလို့ ထင်တာပဲ။ ကိုယ်တို့ ခြံကနေ ဟိုဖက်ကားလမ်းကူးလိုက်ရင် တက္ကသိုလ် ဆရာများဆောင်ကို ရောက်တယ်။ ဖုန်းဆက်ဖို့ ကိစ္စတခုခု ရှိရင် လမ်းကူးပြီး အမတွေ ဖုန်းဆက်သွားရင် ကိုယ်က ဘေးက လိုက်သွားတတ်တာပါ။ အမတွေ ဖုန်းဆက်နေရင် ကိုယ်က အောက်ကနေ မော့ပြီး ငေးနေတာပါ။
ဆရာဆောင်က ဖုန်းက သစ်သား သေတ္တာလို ပုံးမျိုးနဲ့ တခါတလေ သော့ပိတ် ထားတတ်သေးတယ်။ ကိုယ်တို့ကလေးတွေ ဖုန်းလာဆက်ရင် ဖုန်းဆက်ချင်လို့ပါ လို့ ပြောလိုက်ရုံပါပဲ။ ထမင်းစားခန်းထဲမှာ ရှိနေတဲ့ ဆရာ တယောက်ယောက်က ဆက် ဆက် လို့ ခွင့်ပြုတာပါပဲ။ သော့ခတ်ထားရင်လဲ သော့ပေးလိုက်ပါ လို့ ပြောလိုက်တာပါပဲ။ ဆရာ၊ ဆရာမ သားသမီးတွေမှန်း သိနေတော့လဲ သိပ်ထူးထွေ မမေးပါဘူး။
ကိုယ်တို့လဲ ကလေးပေမဲ့ ကိစ္စရှိမှ ဆက်ရတယ်လို့ နားလည်တယ်။ တယ်လီဖုန်းဆိုတာကြီးက ရှားပါး ပစ္စည်းကြီးမို့ ရိုရိုသေသေ သုံးရတယ်လို့ ထင်နေသလား မပြောတတ်ဘူး။ ကိုယ်တို့ဆက်ရင် များသောအားဖြင့် အမေ့အမ ကြီးကြီးတို့ဆီကို ဆက်တာပါပဲ။ အမေပြောခိုင်းလို့ လူကြီးမှာတာပြော၊ ပြီးတာနဲ့ တန်းချလိုက်တော့တာပဲ။
နောက် နှစ်ရှည်လများ လျှောက်ထားတဲ့ ကိုယ်တို့အိမ်လဲ ဖုန်းရတဲ့ လျှောက်လွှာလေး ကျလာတယ်။ အဲဒီတုန်းကများ အံ့သြလွန်းလို့။ တယ်လီဖုန်းဆိုတာ တော်ရုံတန်ရုံ လူမရဘူးလို့ သိထားတာကိုး။ အဲဒီတုန်းက အဖေက “ဖုန်းလျှောက်ထားတဲ့ ပါမစ်ကျပြီ၊ ရုံးမှာ ငွေလာသွင်းပါ” ဆိုတဲ့ စာရွက်ကို မယုံ့တယုံနဲ့ ဖုန်းရုံးကို ယူသွားမေးရတာ။ အဲဒီတုန်းက ဖုန်းဖိုးရော၊ ကြိုးသွယ်ခရောပါမှ ၁၁၀ကျပ်လား ပေးရတယ်။
ခလုတ်လေးတွေနဲ့ ဖုန်း။ ဒိုင်ခွက် လှည့်ရတာမျိုး မဟုတ်ဘူး။ တနေ့လုံး ကြည့်မ၀ဘူး။ ဖုန်းစာအုပ်သေးသေးလေးတွေဝယ်၊ သူငယ်ချင်း ဖုန်းနံပါတ်တွေလဲ တကုပ်ကုပ်နဲ့ မှတ်ရသေးတာ။ ဖုန်းကို ဖုန်တက်မှာစိုးလို့ သိုးမွှေးချည်လေးတွေနဲ့ ထိုးထားတဲ့ အဖုံးလေးနဲ့ လဲ အုပ်ထားရသေးတာ။
ဖုန်းရှိတော့ တာဝန်လဲ ကျေတယ်။ သာရေး နာရေး မေးတာ သွားတာ ပိုလွယ်ကူသွားတယ်။ သူများတွေရဲ့ လိုအပ်နေတာတွေလဲ ကူခွင့်ရတယ်။ ကိစ္စရှိရင် ဘယ်သူမဆို တခြံလုံး ဆက်ကြတာပဲ။ အဖေတို့ အမေတို့ကလဲ ဘယ်သူ ဘယ်လောက်ဆက်ဆက် ငြိုငြင်တယ် မတွေ့ဖူးဘူး။
အဲဒါကတော့ ငယ်ငယ်က ကိုယ် တယ်လီဖုန်းနဲ့ စ ရင်းနှီးခဲ့ရတဲ့အကြောင်းပါ။ ကိုယ့်အဖေ ဖုန်းစ ကိုင်ဖူးတဲ့အကြောင်းလဲ ပြောချင်သေးတယ်။
အဖေ တက္ကသိုလ်ကျောင်းသားဘ၀က ရန်ကုန်လာလည်တော့ ရှုမ၀တိုက်မှာ အဖေ ထိုင်နေတုန်း အဖေ့ဆီ ဖုန်းလာပါသတဲ့။ အဖေကလဲ တကယ့်တောသား ဆိုတော့ ဖုန်းကိုင်ရမှာ လန့်နေတယ်။ ဒါပေမဲ့ စာရေးလေးက ဆရာ ဖုန်းလာတယ်လို့ ပြောတော့ သူ မပြောတတ်ပါဘူး ဆိုမှ ဖုန်းဆက်လာတဲ့ သူငယ်ချင်းကိုလဲ စိတ်ထဲက စိတ်တို လိုက်သေးသတဲ့။
ဒါနဲ့ ဖုန်းသွားကိုင် သူငယ်ချင်း အချင်းချင်းတောင် ဖုန်းအရှိန်နဲ့ ရိုရိုသေသေ ပြောနေတုန်း စာရေးလေးက ဘေးနားကနေ အသာရောက်လာပြီး ရှက်သွားမှာစိုးလို့ ဘာမှ မပြောဘဲ ဖုန်းခွက်ကို လှည့်ပေးလိုက်သတဲ့။ တကယ်က အဖေက ဖုန်းပြောတာ နားထောင်ခွက်ကို ပြောထည့်နေတာပါ။ အသံတိုးလှချည့်လို့ ထင်တော့ ထင်သား တဲ့။ အဖေလဲ ရှက်လိုက်တာ မပြောပါနဲ့တော့ တဲ့။
နောက်တော့ ခေတ်ကလဲ တိုးတက်လာ၊ ကိုယ်တို့လဲ ပြည်ပမှာ အလုပ်လုပ်ကြတဲ့အခါ ဖုန်းဆိုတာ မထူးဆန်းတော့ဘူး။ ရန်ကုန်မှာသာ ဖုန်းတွေက ဈေးကြီးနေတာ၊ ပြည်ပမှာက လူတန်းစားမရွေး ကလေးကအစ ဖုန်းကိုင်ကြတာမျိုး။ အဲဒီလို ဖုန်းတွေ ပေါ နေပြီဆိုမှတော့ ကိုယ်တို့သားအဖမှာလဲ လက်ကိုင်ဖုန်း ကိုယ်စီ ရှိကြရပြီပေါ့။
ကိုယ်တို့ သားအဖ ဖုံးနှစ်ခုကို အကောင့်တခုတည်းမှာ လင့်ခ်လုပ်ထားတာမို့ ကြိုက်သလောက်သာ ပြော၊ ပိုက်ဆံ မပေးရဘူး လို့ အိမ်က ဆရာကြီးက ပြောတာပါပဲ။ ဒါနဲ့ ကိုယ်အလုပ်သွားလဲ အချင်းချင်းဆို ပိုက်ဆံမပေးရဘူးဆိုပြီး အဖေက ဖုန်း စမ်း ခေါ်ကြည့်နေ တော့တာပါ။ ဖုန်းရတဲ့နေ့ကတော့ သားအဖ နှစ်ယောက် မိတ်ဆွေတွေ နံပါတ်တွေ သွင်းလိုက်ကြတာ တတီတီနဲ့ နားတောင် မနားရပါဘူး။
ဝယ်ပေးထားတဲ့ ဖုန်းက ဓာတ်ပုံရိုက်လို့ရတဲ့ ကင်မရာပါ ပါသေးတယ်။ တကယ်က ကိုယ်က ဖုန်းဆိုရင် ဖုန်းပဲ ပီပီသသ သုံးချင်တာ။ သုံးချင်တာထက် သုံးတတ်တာ ဆိုရင် ပိုမှန်မယ်။ ကိုယ်တို့လို ခေတ်ပေါ်နည်းပညာတွေနဲ့ လားလားမှ မဆိုင်သူအဖို့ ဘယ်လောက် function များများ လုပ်မှ မလုပ်တတ်ဘဲ။
သားအဖနှစ်ယောက် ဖုန်းကင်မရာနဲ့ ဘောင်ထဲဝင်အောင် ခေါင်းအတင်း ထိုး၊ တိုးဝှေ့ ရိုက်ထားတဲ့ပုံကို အဖေဖုန်းမှာရော ကိုယ့်ဖုန်းမှာပါ wall paper တင်လိုက်ပြီးရင် ကိုယ်တို့ လုပ်တတ်သမျှ ကုန်သွားပါပြီ။ ဖုန်းကို ကိုယ်နဲ့မကွာ စောင့်ရှောက် ထိမ်းသိမ်းရတဲ့ ၀တ္တရားတခုကို ရင်ဝယ်ပိုက်ထားလိုက်ရတာပါပဲ။ ဘာဖြစ်လို့လဲဆိုတော့ ဖုန်းပြုတ်ကျလို့ လဲရတာ ခဏခဏ။ ဘယ်နေရာမှန်း မသိ ကျန်ခဲ့တာက ခဏခဏ မို့ပါ။
ဒါပေမဲ့ အခုလို ရပ်ဝေးမှာ နေရတဲ့သူအဖို့ အထီးကျန်သမျှ ဒီဖုန်းလေးက အတော်အသုံးဝင် ပါတယ်။ အဖေဆိုရင် ဖုန်းက သူ့အဖော်မို့ ဆေးလိပ်နီးပါး စွဲရှာတာ။ အဖေ့အသည်းလေး လို့ ကိုယ်တို့က နံမည်ပေးထားရတာ။ အဖေ့သူငယ်ချင်းတွေ၊ မိတ်ဆွေ တပည့်တပန်းတွေ နဲ့ ပြောနေတော့တာ တနေ့လုံး။
တခါကတော့ ညဖက် အဖေ အိပ်တုန်း ၀ူးဝူးဝါးဝါး ထ ယောင်လို့ အလန့်တကြား ဖြစ်ရသေးတယ်။ ကိုယ့်ကို နိုးလာတာနဲ့ မေးတာက “သမီး စုန်းမကို မိလိုက်သလား၊ မိလိုက်တယ် မဟုတ်လား” တဲ့။ ဘယ်က စုန်းမလဲ လို့ မေးတော့ အဖေ့ဖုန်းကို စုန်းမတယောက် လု ပြေးတယ် တဲ့။ ကိုယ့်မလဲ ရီတောင် မရီရက်ပါဘူးလေ။
တခါကတော့ အဖေက စိတ်မကောင်းဖြစ်ပါသေးတယ်။ အဖေ့မိတ်ဆွေတချို့က ဆရာ့ကို ဖုန်းခေါ်တာ မရဘူး၊ မက်ဆေ့ခ်ျထားခဲ့တာလဲ မပြန်ဘူး ဘာညာ ပြောကြတော့ အဖေက ဖုန်းလွတ်သွားမှာ သိပ်စိုးရိမ်တယ်။ ဒါနဲ့ ကိုယ်လဲ အကြံထုတ်ရတယ်။ “အခု ပြောနေတာ ဦးတင်မိုးဖုန်းကပါ၊ မက်ဆေ့ခ်ျ မသွင်းခဲ့ပါနဲ့ရှင်။ အဖေ ပြန်မခေါ်တတ်ပါဘူး” လို့ ဖုန်းထဲမှာ အသံ သွင်းထားလိုက်မှ ကိစ္စအေး သွားပါတော့တယ်။ အဖေနဲ့သမီးကတော့ ဟုတ်နေတာပါပဲ။
ကိုယ်ကသာ အဖေ့အကြောင်း ပြောနေတာ တကယ်က ကိုယ်လဲ သိပ်တော့ မထူးပါဘူးလေ။ တလောကတော့ ည ၈နာရီခွဲလောက် Zumba Class က ပြန်လာတယ်။ ညကလဲ မှောင်နေပြီ။ အိမ်နဲ့ကလဲ လမ်းလျှောက်ရင် ၃မိနစ်ဆိုတော့ လာမကြိုခိုင်းဘဲ တယောက်တည်းပဲ ပြန်လာတယ်။
ဒီညမှပဲ မှောင်တာ အတော်စောတယ်။ ကိုယ့်မှာက အက်ရှင်ကားတွေ ကြည့်ပြီး ညဖက် ကားပါကင်ထဲ တယောက်တည်း မသွားရဲတာတို့ ညဖက် လမ်းအကွေ့တွေ မသွားရဲတာတို့ စိတ်အခံက ရှိနေတယ်။ အခုလဲ မိုးကချုပ်၊ တယောက်တည်း ပြန်လာရတော့ သတ္တိက ပြလာတယ်။ ဒါနဲ့ အိတ်ကလေး လွယ်ပြီး ခပ်သုတ်သုတ်ပဲ လမ်းလျှောက်လာတယ်။
အိမ်က ရောက်တော့မယ်။ အဲဒီအချိန်မှာ ဘယ်က ကားနက်ကြီးမှန်း မသိ ကိုယ့်ဘေးကနေ ကွေ့ပြီး ပေါ်လာတာ။ ရုပ်ရှင်တွေထဲကလို လူဆိုးတွေ ဆင်းလာ၊ ဖမ်းတင်သွားတတ်တဲ့ ကားမျိုး။ ကိုယ်လဲ လေအေးလို့မဟုတ်ဘဲ ကျောက စိမ့်ပြီး လက်ဖျားတွေတောင် အေးလာတယ်။ အဲဒီအချိန်မှာ ခလောက် ဆိုပြီး အသံကြားလိုက်ရတာပဲ။
ကိုယ့်အထင်တော့ ကိုယ့်ကို ရေသန့်ဗူးနဲ့ ပေါက်လိုက်ပြီလို့ ထင်မိတာ။ လမ်းသရဲတွေ ဖြစ်မယ်၊ ပြေးမှ ဆိုပြီး အိမ်ကို တချိုးတည်း ပြေးတာ တန်းနေတာပါ။
အိမ်အ၀င်ကျတော့ ချက်ချင်း အိနြေ္ဒဆယ်တယ်။ သတ္တိမရှိဘူး အပြောခံရမှာစိုးလို့ ခပ်တည်တည်ပဲ အိမ်ထဲ ၀င်ခဲ့တယ်။ အိမ်မှာ အလ္လာပသလ္လာပ ပြောပြီး ဘလော့ဖတ်နေတဲ့ထိ မသိသေးဘူး။ နောက်တော့ အိမ်ကို ဖုန်းလာတာနဲ့ ကိုင်လိုက်တာ ညီမတယောက် ဖြစ်နေတယ်။ အမ ဖုန်းကို ခေါ်တာ ခေါ်လို့ကို မရဘူး တဲ့။ ဒါနဲ့ ကိုယ်လဲ ငါဖုန်းဖွင့်ထားပါတယ်ဆိုပြီး ရှာလိုက်တာ ဒေါင်းတောက်ပါရောလား။
နောက်မှ ခုနက အိမ်အပြန် ကားနက်ကြီးအနားအရောက် ခလောက်လို့ ကြားလိုက်တာ ကိုယ့်ဖုန်း ပြုတ်ကျတဲ့အသံ ဖြစ်နေတာကိုး။ ကိုယ်က ရေသန့်ဗူးနဲ့ ပေါက်တယ်ထင်ပြီး လှည့်မကြည့်ဘဲ တချိုးတည်း ပြေးလာတာလေ။ ဒါနဲ့ နှစ်ယောက်သား လက်နှိပ်ဓာတ်မီးကိုင်ပြီး လမ်းတလျှောက် ညကြီး မင်းကြီး ဖုန်း လိုက်ရှာကြသေးတယ်။ မတွေ့တော့ပါဘူး။
အခုတော့ ကိုယ် ဖုန်း အသစ် ကိုင်ထားရတယ်။ ဖုန်းကိုလဲ ရှေ့ရေး မျှော်တွေးပြီး warranty ၀ယ်ထားလိုက် ရတယ်။ Zumba သွားရင် အသွားရော အပြန်ရော လမ်းမလျှောက်စေဘဲ ကားနဲ့ သူ လာကြိုပေး ပို့ပေးရတယ်။
ဒီလိုဆိုတော့လဲ သူ့ကုသိုလ်နဲ့သူ ဖြစ်လာတာ ဘယ်တတ်နိုင်ပါ့မလဲ။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
မနေ့က ကိုယ် သင်တန်းတခု စ အပ်ပါတယ်။ ဆရာဝန်က ကိုယ့် ကျန်းမာရေး အတွက် ကိုယ်လက်လှုပ်ရှား လေ့ကျင့်ခန်းတခုခု မဖြစ်မနေ လုပ်ရမယ်လို့ အကြံပေးလို့ပါ။ နို့မို့ဆိုရင်တော့ ဆေးတွေ တိုးပြီး ထိုးရ၊ သောက်ရတာသာ အဖတ်တင်ပါလိမ့်မယ် တဲ့။
ဒါနဲ့ ဆရာဝန်ရယ်၊ သူငယ်ချင်းတွေရယ်၊ မိသားစုရယ် ၀ိုင်းပြီး ဂရုစိုက်လိုက်ကြတာ လူလဲ စိတ်ဓာတ်တော်တော်ကျသွားတယ်။ ကိုယ့်ကို ဂရုစိုက်တာ ချစ်ခင်လို့ ပြောကြတာမှန်း သိတာပေါ့။ ဒါပေမဲ့ ကိုယ်က လိုက်မလုပ်နိုင်တဲ့အခါ ကိုယ့်ကိုယ်ကို အမြဲ အပြစ်မြင်မိပြီး အဲဒီစိတ်က ၀န်ထုပ် ၀န်ပိုးကြီး တခုလိုဖြစ်နေတာပါ။ အတော်ခံရခက်တဲ့ ဝေဒနာပါပဲ။
ဒါနဲ့ အိမ်နဲ့ နီးနီးနားနားက Community Center မှာ ညနေဖက် လမ်းလျှောက်ရင်း သင်တန်းလေးတွေ သွားစုံစမ်းမိတယ်။ ကောင်တာက မိန်းမချောလေးက ကိုယ့်ကို လမ်းညွှန်ပါတယ်။ Zumba ဆိုတဲ့ သင်တန်းက ကိုယ်နဲ့သင့်တော်မယ် လို့ ထင်ပါသတဲ့။ သူက သီချင်းလေးတွေ ဖွင့်ပြီး သက်သက်သာသာ လေ့ကျင့်ခန်း လုပ်ရတာမျိုးပါ တဲ့။
ဒါနဲ့ ကိုယ်လဲ အချိန်စာရင်းကြည့်လိုက်တော့ တပတ်မှာမှ တရက်တည်း၊ အဲဒီတရက်မှာလဲ ၁နာရီ ဆိုတော့ လုပ်နိုင်လောက်တယ် ဆိုပြီး ပိုက်ဆံသွင်းလိုက်တယ်။ အိမ်နဲ့ ၅ မိနစ်လောက် လမ်းလျှောက်ရုံအကွာအဝေးဆိုတော့လဲ အဆင်ပြေတယ်လေ။ ဒါနဲ့ မနေ့က ရုံးအပြန် ညနေစာ စောစောစားပြီး အိမ်က လူကုန် ကိုယ့်ကို ကလေးကျောင်း လိုက်ပို့သလို လိုက်ပို့ကြတယ်။
ကိုယ်ရောက်တော့ စောနေသေးတယ်။ ခမ်းမကျယ်ကျယ်တခုမှာ သင်တန်းပေးမှာ။ ကိုယ်က အသစ်ဆိုတာ သိနေတော့ သင်တန်းမစခင် စကားစမြည် လာပြောကြတယ်။ မိန်းကလေးတွေ ချည်းပဲ။ လူငယ်တွေများပါတယ်။
ဘယ်လိုသင်ပေးတာလဲဆိုပြီး မေးကြည့်တော့ သင်တန်းဆရာမက သီချင်းအတိုင်း လှုပ်ရှားတာကို လိုက်လုပ်ရုံပဲ တဲ့။ ရီစရာတော့ ကောင်းတယ်၊ ဒါပေမဲ့ မရှက်ပါနဲ့ တဲ့။ အဓိက က ကိုယ်လက်လှုပ်ရှားဖို့ပဲ ဆိုတော့ သူလုပ်သလိုသာ လိုက်လုပ်ပါ တဲ့။ ချွေးထွက်ဖို့သာ ပြင်ထားပေတော့ တဲ့လေ။
ဒါနဲ့ ဆရာမလာတော့ သီချင်း စ ဖွင့်တယ်။ ဆရာမက ဘော်ဒီတောင့်တောင့်။ အားကစားသမား အကြိုက်။ သီချင်းကတော့ ထုံးစံလို အမြူးသီချင်းပါ။ ကိုယ်ကတော့ ရှက်ရှက်နဲ့ နောက်နားကျကျမှာ သွားနေတာ ကိုယ့်နောက်မှာ ကောင်မလေး တယောက်သာ ကျန်တော့တာ။ အဲဒီကောင်မလေးကတော့ ကိုယ့်ထက်များ ပိုရှက်သလား မသိ၊ နံရံနဲ့တောင် ဖြစ်နိုင်ရင် ကပ်နေမဲ့ပုံ။
သီချင်း ဖွင့်တာနဲ့ ဟေးဟေးဟားဟား သူတို့ လုပ်ကြတယ်။ ပထမတော့ ခြေထောက်လေး လှုပ်ရုံပါပဲ။ နောက်တော့ သီချင်းအတိုင်း သွက်လိုက်ကြတာ ကိုယ့်မှာ ပါးစပ်အဟောင်းသား။ ကိုယ်လဲ ကမန်းကတန်း အမီ လိုက်ရတော့တာ။
ကိုယ်လဲ လိုက်တော့ လိုက်တာပါပဲ။ ဒါပေမဲ့ ယုန်တောင်ပြေး ခွေးမြောက်လိုက် ဆိုသလို ဖြစ်နေပါပြီ။ ဆရာမက သီချင်းဆိုနေတဲ့ကြားက ဘာတွေ သဘောကျတယ် မသိ၊ တဟီးဟီးရီပြီး ညာဖက်ကို ပြေးသွားရင် ကိုယ်က ဘယ်ဘက်ကို ပြေးမိရက်သားကြီး။ သူက နောက်ကို သုံးလှမ်းလောက် ဆုတ်ရင် ကိုယ်က ၇လှမ်းလောက် ဆုတ်မိနေပေါ့။
လက်တွေကိုလဲ ဆန့်လိုက် ကွေးလိုက်နဲ့ လုပ်ကြသေးတယ်။ ဘယ်ဘက်လက်ကို ဘေးကို ဆန့်လိုက် ကွေးလိုက် လုပ်တော့ ကိုယ်က ညာဖက်ကို အားရပါးရ ထုတ်လိုက်တာ ဘေးက ခလေးမကို ထိုးမိတော့မလို့။ ဘေးကကြည့်ရင် သီချင်းနဲ့ က နေတာနဲ့ မတူဘဲ ရန်များဖြစ်သလား ထင်မယ်။
နောက်တော့ လက်ကို အပေါ်ကိုမြှောက် ပြီး မက္ကဆီကန် အကတွေ ကသလို သူတို့ က ကြပြန်တယ်။ ကိုယ့်မှာတော့ လက်လဲ မြှောက်ထားပါရဲ့၊ ဒါပေမဲ့ က တာနဲ့ မတူ၊ ဒို့ အရေး လုပ်သလိုမျိုး လုပ်မိတယ်။ ဒီတခုတော့ ပိုင်သလေ။ ဘေးကများကြည့်ရင် ဘယ့်နှယ့်ဟာကြီးပါလိမ့် ထင်မှာ။
ခက်တော့နေပါပြီ။ ကိုယ်တော့ နေရာမှားပြီ ထင်ပါရဲ့။ ကိုယ်က လေ့ကျင့်ခန်းလုပ်ရမှာ ပျင်းလွန်းလို့ အိမ်မှာ မလုပ်ဘဲ အဖော်အပေါင်းရှိတဲ့ သင်တန်းလာတက်မိတာ အမှားကြီး မှားပါပြီ။ ကိုယ်က သီချင်းလေးနဲ့ နူးနူးညံ့ညံ့ ထင်မိတာကိုး။ နောက်တော့ ရပ်ပြီး ရီနေမိတော့တာပေါ့။
ကိုယ်ရီတော့ ဆရာမကလဲ သဘောကျပြီး ရီတယ်။ ပြီးတော့ လုပ် လုပ် ဆိုတဲ့သဘော ကိုယ့်ကိုအားပေးသလိုမျိုး မေးထိုးပြတယ်။ ရပ်မနေနဲ့ ဆိုတဲ့သဘော။ သီချင်းကလဲ မရပ်မနား non stop! အဲဒီတော့ သူ ကြိုးတွေ လုံးသလို လုပ်ရင် ကိုယ့်မှာလဲ လိုက်လုံးရ၊ ရေကူးသလိုမျိုး ကူးနေရင် ကိုယ့်မှာလဲ လိုက်ကူးရ။ သူက ဟန်ပါပါ ကိုယ်လေးကို လှည့်တော့ ကိုယ်က စကောဝိုင်း လိုက်သလိုမျိုး ရွှီးကနဲပဲ။
ဆရာမက ကိုယ့်ကို မျက်စိကျသွားပုံပဲ။ ဒါမှမဟုတ် ကိုယ်ခိုနေတာကို သိသွားလို့ရင်လဲ ဖြစ်မယ်၊ ကိုယ့်ဘေးနားလာပြီး ကိုယ်နဲ့အတူ လုပ်တော့တာပါ။ ဂွတော့ ကျနေပါပြီ။ သူက ကိုယ့်ကို အသစ်ဆိုပြီး တွဲခေါ်နေတာပါ။ သူ က တာ အင်မတန်လှတာပါ။
တကယ်က ဒီတခန်းလုံးမှာ သူ့နီးပါး လိုက်လုပ်နိုင်တာ ၃ယောက်လောက် ရှိတာပါလေ။ ကျန်တဲ့လူတွေက သူ့ကိုကြည့်ပြီး လိုက်လုပ်ကြတာ။ ဒါပေမဲ့ သူတို့က ဒီမှာမွေး၊ ဒီအကတွေနဲ့ ကြီးခဲ့ကြတာမို့ နည်းနည်းပြရင် သဘောပေါက်ကြတယ်။ ကိုယ့်မှာသာ အစိမ်းသက်သက်။ ကိုယ်တို့ မြန်မာဆီမီးခွက် အကလောက်ဆို ကိုယ်လိုက်နိုင်မှာ အမှန်ပါ။
ဆရာမက မြန်လဲမြန်သေးတယ်။ သူရှေ့ကို ပြေးသလိုလုပ်တော့ ကိုယ်လိုက်ပြေးရင်ဘဲ သူက နောက်ပြန်ဆုတ်နေပြီ။ သူအဆုတ် ကိုယ်အတက် တိုက်မိတော့မှာ။ တခါမှာ မျက်နှာချင်း အတော်နီးသွားလို့ သူလဲ လန့်သွားတယ်။ ဒါနဲ့ ဟိုးရှေ့မှာပဲ သွားပြန်လုပ်နေတော့တယ်။
အချိန်က တနာရီမို့ပဲ။ တကမ္ဘာလောက်ကြာသလို ခံစားမိတယ်။ ချွေးတွေလဲ တကိုယ်လုံး ရွှဲနေပြီ။ ဒါနဲ့ သီချင်းလဲဆုံးရော ဂွတ်ဒ်နိုက် တဲ့။ ဒီစကားအချိုဆုံးပဲ။ သင်တန်းပြီးသွားတဲ့သဘော အားလုံးပျော်ပြီး ဟူးးးး ရေးးးး နဲ့ လက်ခုပ်တီးကြတော့ ကိုယ့် လက်ခုပ်သံ အကျယ်ဆုံး ထင်မိတယ်။
နောက်တပတ်သွားဖို့တော့ စဉ်းစားကာ နေရအုံးမယ်။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
အခုတလော လျှောက်တွေးကြည့်မိတာလေးတွေ ပြောပြချင်သေးတယ်။
ဟိုတနေ့က ဘာရယ်မဟုတ်ဘူး၊ စိတ်ထဲမှာ ပင်ပန်းလာတာနဲ့ လိုကို ဖြစ်ချင်တယ် လို့ ရေးလိုက်မိတယ်။ အဲဒီတော့ ရင်းနှီးတဲ့ ဘလော့ဂ် မိတ်ဆွေတွေက ကိုယ့်ကို သိပ်စိတ်ဓာတ်များ ကျနေသလား၊ နေမှ ကောင်းရဲ့လား၊ ကျန်းမာရေးရော ဂရုစိုက်ရဲ့လားဆိုပြီး ပူပန်ကြပါတယ်။
ကိုယ်လဲ အဲဒီတုန်းက ရေးမဲ့သာ ရေးလိုက်တာ၊ ရေးလဲ ပြီးရော စိတ်ညစ်လဲ ပျောက်ရော ဆိုပါတော့။ ကိုယ်ရေးခဲ့တာတွေလဲ မေ့၊ LAမှာလုပ်တဲ့ သင်္ကြန်ပွဲကို ပျော်ပျော်ကြီး ချီတက်သွားတယ်။ ဟိုမှာလဲ မိတ်ဆွေတွေနဲ့ ဆုံ၊ ကိုယ့်အကြိုက် အစားအသောက်တွေက ပုံ နေတဲ့အပြင် သင်္ကြန်သီချင်းတွေနဲ့မို့ တပြုံးပြုံး နေမိတယ်။
လိုကို ဖြစ်ချင်သူက သင်္ကြန်မှာ ဒီလို ဓာတ်ပုံ အရိုက်ခံလိုက်သေး
အဲဒီတော့ မိတ်ဆွေတယောက်က ပြောတယ်။ ရေးတော့ဖြင့် လိုကို ဖြစ်ချင်တယ်လေး ဘာလေးနဲ့ အတော် စိတ်ဓာတ်ကျနေပြီမှတ်တာ တဲ့။ သူများတွေက မြန်မာနှစ်ဆန်းမို့ ဆုတွေ တောင်းကြ၊ ကုသိုလ်တွေ လုပ်ကြ နဲ့ အရှိန်ရနေတုန်း သူက လိုကို ဆိုတော့ ဘယ်လိုနားလည်ရမလဲ ဖြစ်သွားတယ် တဲ့။
သူ ဒီလိုပြောမှ ကိုယ်လဲ သတိထားမိတာ။ ဟုတ်တာပေါ့။ သင်္ကြန် ပြီးလို့ မြန်မာနှစ်ဆန်း တရက်မှာ အေးအေးချမ်းချမ်းနဲ့ အနာဂတ်ကို မျှော်နေတုန်း ကိုယ်က ရူးချင်တယ် တဲ့။ အ၀င် မတတ်တာ ပြောပါတယ်။ သူများတွေက ငြင်ငြင်သာသာ စီးဆင်းနေတုန်း ကိုယ်က ဗိန်းမောင်း တိုက်သလိုပေါ့။ တယောက်တည်း ဟတ်ကော့ကြီး။
အရင်ကလဲ ကိုယ် အဲဒီလိုမျိုး အကြိမ်ကြိမ် ဖြစ်ဖူးပါတယ်။ များလွန်းလို့ မေ့တောင် မေ့ပစ်လိုက်ပြီ။ တခါကတော့ အဖေ ကိုယ်တိုင် စိတ်ညစ်သွားရသေးတာပေါ့။ အဲဒီတုန်းက ကိုယ်တို့မြို့မှာ စာပေဟောပြောပွဲ လုပ်တာမို့ ထုံးစံအတိုင်း ကိုယ်တို့အိမ်မှာပဲ စာရေးဆရာတွေ တည်းပါတယ်။
ကိုယ်လဲ ဆရာတွေစားဖို့ ထမင်းဟင်းချက်ရင်း သောက်ဖို့ အမြည်းလေးတွေ လုပ်နေတုန်း။ ထမင်းမစားခင် အဖေနဲ့ ဆရာမောင်သစ်ဆင်း နဲ့ စာပေအကြောင်းတွေ ပြောကြတာ အရှိန်တော်တော်ရနေတယ်။ အဖေကလဲ စိတ်တူ ဘာသာစကားတူသူချင်း ဆုံရတော့ ၀မ်းသာအားရ ပြောမ၀။ ဆရာ မောင်သစ်ဆင်းကလဲ မောင်သစ်တုံး ဖြစ်ခဲ့တာတွေ မေ့၊ အဖေနဲ့ ကရားရေလွှတ် တတွတ်တွတ်။
အဲဒီလို မြန်မာစာပေရေစီးကြီး အရှိန်ကောင်းနေတုန်းမှာ ကိုယ်လဲ ဘေးကနေ လုပ်ကိုင်နေရင်းက ချိုသင်းလဲ တခု မေးချင်တယ် လို့ ကြားဖြတ်ပြောလိုက်မိတယ်။ အဖေရော ဆရာရော မျက်နှာဝင်းပ သွားတာ သိသာလွန်းတယ်။ အဖေက အဲဒီတုန်းက ကိုယ်စာမရေးတော့တာကို စိတ်မကောင်းဖြစ်နေတာ။ အခု စာပေအကြောင်း ပြောတုန်း သမီးစိတ်ဝင်စားလာပြီး ဆွေးနွေး မေးမြန်းတော့မယ် ဆိုပြီး မျက်လုံးလေး လက်သွားတယ်။
မေး၊ မေး သမီး၊ ဘာမေးမလဲ တဲ့။ ကိုယ်မေးလာမဲ့ မေးခွန်းကို နှစ်ယောက်သား ပြုံးပြီး နားထောင်နေတယ်။ အဲဒီမှာ ကိုယ်က မေးလိုက်ပါတယ်။ “အဖေတို့ ထမင်းအရင် စားကြမှာလား၊ အရက်အရင် သောက်ကြမှာလား၊ ဘယ်ဟာ အရင်လုပ်ရတာလဲ၊ ချိုသင်း မသိလို့” တဲ့။
သူတို့ နှစ်ယောက်စလုံး ဟာ..ကနဲ ဖြစ်သွားတယ်။ ငါ့သမီးနှယ် စာပေရေစီးကြောင်း အားကောင်းတုန်း ဘယ့်နှယ် မေးလိုက်ပါလိမ့် တဲ့။ သူတို့ မျှော်လင့်နေတာက မော်ဒန်ဆိုတာ စကားလုံးတွေ နိမိတ်ပုံတွေ အားကောင်းတာပေါ့နော် ဆိုတာမျိုး။ ၀တ္တုတွေဟာ ခေတ်အရိပ်ကို ထင်ဟပ်..ဘာညာပေါ့။
ကိုယ့်မလဲ ဘာများ မှားသွားပါလိမ့် လို့။ ကိုယ်က ဒီအစားအသောက် ပြင်တဲ့အထဲ စိတ်ရောက်နေတာဆိုတော့ သိချင်တာ မေးမိတာပါပဲ။ အဲဒီလိုပဲ အ၀င်မတတ်တော့ ဂွကျတာတွေ ဖြစ်တတ်တယ်။
အ၀င်တတ်ဖို့တင် မဟုတ်၊ သူများ ၀င်လာရင်လဲ အသာ ဆီး ပိတ်တတ်မှ အဖွင့် အပိတ် လှတာမျိုး ရှိတတ်သေးတယ်။ အဲဒီမှာလဲ ကိုယ်ညံ့ပြန်ပါရော။
မှတ်မိတာတခု ပြောရရင် အဲဒီတုန်းက ကိုယ်က ရန်ကုန်မှာ သင့်ဘ၀မဂ္ဂဇင်း လုပ်နေစဉ်က ပေါ့။ ညနေဆိုရင် ၄၈ ဒတ်ဆန်းကားလေးတွေ စီးပြီး အင်းစိန်ကို ပြန်ရတယ်။ အဲဒါဆို ညနေတိုင်း ဘတ်စ်ကား မှတ်တိုင်မှာ လူတန်းရှည်ကြီး တန်းစီစောင့်ရတယ်။ ဘတ်စ်ကားလာရင် တန်းစီတက်ရတာပေါ့။
အဲဒီလိုအချိန်ဆိုရင် အလုပ်က ဆင်းလာတော့ လူတွေအားလုံး ပင်ပန်းပြီး အိမ်မြန်မြန် ရောက်ချင်နေပြီ။ ကြားဖြတ်ရင် လူတွေက မကြိုက်ဘူး။ ကိုယ်ချင်းစာပါပေါ့၊ ဒီမှာ အကြာကြီး တန်းစီထားရတာ အဲဒီလိုမျိုး။
တနေ့တော့ ကိုယ်လဲ အိမ်ပြန်မလို့ ကျောပိုးအိတ်လေးလွယ်ပြီး တန်းစီရင်း ဘတ်စ်ကား စောင့်နေတယ်။ ဒီတခါ တန်းက အတော်ရှည်တယ်။ အဲဒီအချိန်မှာ ကိုယ်တို့ မဂ္ဂဇင်းတိုက်က ဒီဇိုင်းဆရာ ကေကေ က လွယ်အိတ်လေး လွယ်ပြီး အနားရောက်လာတယ်။
ဟာ.. မချိုသင်း၊ ကျနော့်ကို စောင့်နေတာလား၊ ကျနော် နည်းနည်း နောက်ကျသွားတယ်ဗျာ တဲ့။ သူပြုံးပြီး ပြောလိုက်တဲ့အချိန်မှာ ကိုယ်လဲ မျက်နှာ ထူပူ သွားတာပဲ။ ဟယ် ငါလဲ သူ့ကို မစောင့်ဘဲနဲ့ ဘာတွေ လာပြောနေပါလိမ့်ပေါ့။ အထာ ကို မသိဘူး။ ဒါနဲ့ ချက်ချင်းပဲ ပြန်ပြောလိုက်တယ်။ မစောင့်ပါဘူး၊ ဘာလို့ စောင့်ရမှာလဲ၊ ကိုယ့်ဖာသာကိုယ် ဘတ်စ်ကားစောင့်နေတာ လို့။
အဲဒီမှာ တန်းစီနေတဲ့ ကိုယ့်နောက်ကလူတွေက ရီလိုက်ကြတာ။ ကေကေကလဲ ကိုယ့်ကို တိုးတိုး လာပြောတယ်။ မချိုသင်းကလဲ၊ ကျနော်က ကြားဖြတ်ချင်လို့ ပြောနေတဲ့ဟာကို တဲ့။ ကိုယ်လဲ မသိဘူးလေ။ ပြောမှ မပြောထားတဲ့ဟာ။ ဒါနဲ့ နောက်ကလူတွေက ကဲ ကဲ ၀င်ပါဗျာ တဲ့။ ရီရီမောမောနဲ့ ခွင့်ပြုလိုက်ကြတယ်။
ကိုယ်က ဒါမျိုးတွေ ခဏခဏ ဖြစ်ဖူး ခံဖူးတော့ ကိုယ့်လို မဖြစ်အောင် ပြောပြရတာပါ။ လောကမှာ အ၀င်တတ်ဖို့လဲ လိုသေးတာဆိုတာ ခံပါများတော့ နည်းနည်းသိပြီ။
ကိုယ့်လို ထီးထီးကြီးလဲ ထွက်မသွားနဲ့၊ အတိုင်အဖောက်လဲ ညီပါမှ။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
အခုတလော အလုပ်များတာနဲ့ ဘလော့ဂ်ကို လျှော့မယ်ဆိုပြီး ပထမ ၂ရက်တခါလောက်ရေး၊ နောက်တော့ ၃ရက်တခါလောက် ဖြစ်၊ အခုတော့ ၅ရက်ကြာမှ စာရေးဖို့ ထိုင်မိတယ်။ မရေးနိုင်ဆို ကိုယ့်အမျိုးသားအမေ မာမားက ဆေးရုံတက်ပြီး ခွဲစိတ်ရဖို့ ကြုံလာတာမို့ ညဖက်တွေမှာ ဆေးရုံမှာ အဖော်လုပ် အိပ်နေတယ် ဆိုပါတော့။
မနက်ဆိုရင် အလုပ်ကို နေ့လည်လောက်မှာ သွား၊ ညနေ အလုပ်က ပြန်ဆင်းရင် ဆေးရုံမှာ ည အိပ်တယ်။ အဲဒီတော့ လူမမာစောင့် လုပ်နေတာ ပင်ပန်းပြီး အလုပ်များမှာပေါ့လို့ ကြားသူများ သနားသလိုလိုရှိရင် ကိုယ်က ပြုံးမိတယ်။
တကယ်တော့ ကိုယ်လဲ တခါမှ ဆေးရုံမှာ အခုလို လူမမာစောင့် ညအိပ်ဖူးတာ မဟုတ်ပါဘူး။ ကိုယ်ငယ်ငယ်ကလဲ ကလေးလိုလို ခွေးလိုလိုမို့ ဘယ်သူမှ ဆေးရုံစောင့်ပေးဖို့ ကိုယ့်ကို အားမကိုးကြတာလဲ ပါမယ်။ နောက်ပြီး ဖြစ်လိုက်ရင် ကိုယ်ကချည်းပဲ ဆိုတော့ ကိုယ်ဆေးရုံတက်သမျှ အမတွေ စောင့်အိပ်ရတာချည်းပါ။
ဒီတခါတော့ ပြေးပြီး ရေတွက်လိုက်မှ သူရယ် ကိုယ်ရယ် နှစ်ယောက်တည်းဆိုတော့ မာမား ဆေးရုံတက်ရမဲ့အချိန်မှာ နှစ်ယောက်သား ဂျူတီခွဲပြီး သူက Day shift ကိုယ်က Night shift တာဝန်ယူလိုက်ကြတယ်။
မာမားကို ခွဲခန်းထဲက ထုတ်လာတော့ နေရမဲ့ အခန်းက နှစ်ယောက်ခန်း ဖြစ်နေလို့ အတော်သဘောကျသွားတာပါ။ ဟိုဖက်ကုတင်က လူနာ မရှိလေတော့ ကိုယ့်ဖို့ပဲဆိုပြီး ကုတင်လေးကို မျက်စပစ်ထားတယ်။ လူနာရှိရင် ကိုယ်က ထိုင်ခုံမှာ စောင့်အိပ်ရမှာမို့ သိပ် အဆင်ပြေမှာ မဟုတ်ဘူးလေ။ နောက်လူနာရော လာအုံးမလားဆိုတော့ မလာပါဘူး တဲ့။
အဆင်ကပြေချင်တော့ ကိုယ့်သူငယ်ချင်း ဘိုဘိုက အင်တာနက်သုံးလို့ရတဲ့ သူ့ Notebook လေး ယူထား တဲ့။ ကိုယ့်မှာ ပြုံးနေတာ တချိန်လုံး။ ဒါဆို ညမှာ အီးမေးလ်လေး ချက်ခ်၊ ဘလော့လေးကြည့် ဆိုပြီး ကိုယ့်အတွေးနဲ့ကိုယ် ပြုံးနေတာ။ ဆေးရုံမှာဆိုတော့ အိမ်မှာလို ဟင်း ချက်စရာလဲမလို၊ ဇိမ်ပဲ။ မာမားက လက်လာဆွဲမှ လူနာစောင့်ရမှာ သတိရသွားတယ်။
ပထမနေ့မှာပဲ ကိုယ့်မှာ အခက်ကြုံရတာပါ။ ကိုယ်အိပ်ရမဲ့ ကုတင်ကို ဘယ်သူကများ အမြင့်ကြီး လုပ်သွားတယ် မသိ။ ရင်ခေါင်းနီးပါးလောက် မြင့်နေတာ။ ကိုယ်လဲ အိပ်ယာတွေ့ရင် လှဲပြုနေချင်စိတ်က အလိုလို ဖြစ်နေတာဆိုတော့ ငါ အိပ်ရင် ကုတင်ပေါ်ကို လှေကားများ ထောင်တက်ရမလား တွေးနေရတယ်။ ခလုတ်တွေလဲ မနှိပ်ရဲ။
လူမမာကိုသာ တဖက်ကလုပ်ပေးနေတာ၊ ဘေးက ကုတင်လေးကို တကြည့်ကြည့်ဆိုတော့ ကိုယ့်သူငယ်ချင်းက ရိပ်မိတယ်။ အဟမ်း အဟမ်း၊ လူမမာထက် လူမမာ့ချွေးမက ပိုအရေးကြီးတယ်၊ သူတလွဲတွေလုပ်ရင် လူမမာ ပိုခံရနိုင်တယ် လို့ ပြောပြောဆိုဆို ဟိုခလုတ် ဒီခလုတ် နှိပ်လိုက်တာ ကုတင်ကြီးလဲ နိမ့်ပြီး ကိုယ်တက်လှဲနိုင်တဲ့ အနေအထား ဖြစ်သွားရော။ တော်သေးတာပေါ့လေ။
လာကြည့်တဲ့လူတွေလဲ ပြန်ကြပြီ။ မာမားကလဲ မေ့ဆေးအရှိန်နဲ့ဆိုတော့ အေးအေးချမ်းချမ်းကို အိပ်တော့တာပါ။ ကိုယ့်ကိုလဲ မအိပ်ခင် ပြောသေးတယ်၊ သမီးပင်ပန်းနေပြီ၊ အိပ်၊ အိပ် တဲ့။ ကိုယ်ကလဲ စာလေးဖတ်၊ ဘလော့လေး လည်ပြီး အိပ်ပါ့မယ်လို့ ပြောလိုက်တယ်။ ဒါနဲ့ကွန်ပျူတာက ကုတင်ပေါ်မှာ ဆိုတော့ ကိုယ့်အလှည့်ရောက်ပြီဆိုပြီး ဝမ်းသာအားရ ကုတင်ပေါ်တက်လိုက်ရင်ပဲ ဟ၊ ဟ လုပ်ပါအုံး ဖြစ်သွားရတယ်။
သူ့ကုတင်က ဘီးတွေနဲ့ကိုး။ သူငယ်ချင်းက ကုတင်သာ နှိမ့်ပေးသွားတာ ဘီးတွေကိုတော့ lock မလုပ်ပေးသွားဘူးကိုး။ ဒါကြောင့် ကိုယ်တက်လိုက်တာနဲ့ လျှောပြီး ကုတင်က နံရံနဲ့ ပြေးဆောင့်တော့မှာ။ မနည်း ခုန်ချ ကုတင်ကို ဖမ်းဆွဲ ဘရိတ်အုပ်လိုက်ရတယ်။ ဂလုံးဂလွမ်းနဲ့ အသံတွေ မြည်ရင် ကိုယ့်ကြောင့် လူမမာ အိပ်ရေးပျက်တော့မယ်လေ။
အော်..ဒုက္ခ၊ ဒုက္ခ။ အိပ်ဖို့ရာ ကျောကလေးဆန့်ဖို့ ကုတင်ကြီးကလဲ ကိုယ့်ရှေ့မှာ။ ကုတင်ပေါ်မှာလဲ ကွန်ပျူတာက ပွင့်ရက်လေး။ အဲဒီကွန်ပျူတာထဲမှာ ကိုယ်ချစ်ခင်တဲ့ သူငယ်ချင်းတွေဆီကို သွားဖို့ လင့်ခ်လေးတွေ ရှိနေတယ်။ ဒါပေမဲ့ ကုတင်ပေါ်လဲ မတက်ရဲတော့ ခေါင်းကုတ်ပြီး ကြည့်နေရတယ်။
အဲဒီအချိန်မှာ မေခလာကယ်မ လို့ နာ့စ်မ ရောက်လာတယ်။ ဒါနဲ့ သူ့ကို ကုတင်ကြီး ရွေ့နေလို့ ဘီးကို lock လုပ်ပေးဖို့ ပြောရတယ်။ ကိုယ်က အသစ်အဆန်းတွေ ခလုတ်တွေဆို လန့်တဲ့စိတ်က ရှိနေလို့သာပါ။ သူ နှိပ်လိုက်တော့ လွယ်လွယ်လေးပါ။ ဒါနဲ့ ကိုယ်လဲ စမတ်ကျသွားတာပေါ့။
ကုတင်ကို သေချာကိုင်ကြည့်၊ တွန်းကြည့်၊ မရွေ့တော့ဘူးဆိုမှ ကုတင်ပေါ်တက်တယ်။ ဒါနဲ့ အီးမေးလေးစစ်၊ ဘလော့လေးလည် လုပ်နေတာပေါ့။ မြန်မာဖောင့်ကတော့ ရိုက်မရလို့ ကွန်မန့်ရေးမရဘူး။ စာဖတ်နေရင်း စိတ်ထဲမှာ တမျိုးပဲ။ တရှူးရှူးနဲ့ ကုတင်က မြည်နေတာကိုး။ ဟိုဖက်ဖိရင် ဒီဖက်ကမြည်၊ ဒီဖက်ဖိရင် ဟိုဖက်က မြည်။ ဘယ့်နှယ်ဟာကြီး ဖြစ်ပြန်ပါလိမ့်။
တကယ်က မွေ့ယာက အထူးပြုလုပ်ထားတဲ့ လေမွေ့ယာ။ လူမမာတွေ bed sore မရအောင်၊ သွေးလည်ပတ်တာ မှန်အောင်၊ ကုတင်ကြီး မပူအောင် အထူးပြုလုပ်ထားတာလေ။ အော် ဖြစ်ရလေ။ ငါ့နှယ် လူမမာကုတင် တက်အိပ်မိတော့လဲ ဘယ်တတ်နိုင်ပါ့မလဲ။
ဒါနဲ့ စိတ်ညစ်ပြီး အိပ်ရော ဆိုပါတော့။ ကုတင်က ကလေးကုတင်လေးလို ဘေးကို ပြုတ်မကျအောင် အကာလေးတွေနဲ့။ ကိုယ်လဲ သဘောကျပြီး ကလေးလေးတောင် ပြန်ဖြစ်သွားသလိုလို။ အထိန်းနဲ့အကွပ်နဲ့ အိပ်ရတာလဲ တမျိုးကောင်းတာပါပဲ။ အဲဒီကာထားတဲ့ ဘောင်မှာ ခလုတ်လေးတွေ ခေါင်းဖက်အခြမ်းကို မြှင့်တာ၊ ခြေထောက်ဖက် အပိုင်းကို မြှင့်တာ နိမ့်တာ အစုံတွေ့တယ်။ နာ့စ်ကို ခေါ်ချင်ရင် နှိပ်ရတဲ့ ခလုတ်ကိုလဲ တွေ့တယ်။
အင်မတန်ကောင်းပါလား လို့ ကိုယ့်စိတ်ထဲမှာ ဖြစ်မိတယ်။ လူနာ အဆင်ပြေအောင် အလွယ်တကူ ခေါ်ရအောင် လုပ်ထားတာကိုး။ အိပ်ရာက မထ နာ့စ်ကို ခေါ်လို့ရတယ်လေ။ ဒါနဲ့ ကိုယ်လဲ မှေးကနဲ အိပ်လိုက်တာ လူသံလိုလို ကြားလို့ လန့်နိုးလာတယ်။
ဘာအကူအညီလိုလဲ၊ ဘာလုပ်ပေးရမလဲ တဲ့။ ခေါင်းထူပြီး လူရှာတော့လဲ မတွေ့၊ အင်္ဂလိပ်လို မေးနေတာပါ။ နောက်မှ လိုက်ရှာတော့ ကုတင်ထိပ်က စပီကာက အသံထွက်နေတာ။ “ရှင် နာ့စ် အကူအညီလိုလို့ ခလုတ်နှိပ်လိုက်တယ် မဟုတ်လား” တဲ့။ အမ်..ကိုယ်အိပ်ရင်း ဘောင်က ခလုတ်တွေ သွားဖိမိတယ် ထင်ပါရဲ့။ မတော်တဆပါ၊ အကူအညီ မလိုပါဘူး။ ကျေးဇူးတင်ပါတယ် လို့ ပြန်ဖြေလိုက်ရတယ်။
ဒါနဲ့ အိပ်လိုက်၊ ခလုတ်တွေကို လက်နဲ့ တွန်းမိလိုက် station က စပီကာနဲ့ လှမ်းမေးလိုက်၊ မတော်တဆပါ ဖြေလိုက်။ ပြန်အိပ်လိုက် ကိုယ်ကြီးနဲ့ ဖိမိလိုက်၊ စပီကာကို ဆောရီးပါ လှမ်းပြောလိုက်။ ကိုယ်လဲ လူနာစောင့်တာ အတော် အိပ်ရေးပျက်သွားတယ်။
နောက်တော့ မဖြစ်ချေဘူး ဆိုပြီး အဲဒီဘောင်တွေကို ခေါင်းအုံးနဲ့ကာလိုက်တော့မှ သွားမထိမိတော့ဘူး။ မာမားကို ထ ကြည့်တော့လဲ မာမားက အိပ်မောကျလို့။ ဒါနဲ့ အေးအေးဆေးဆေးပဲ၊ ပြန်အိပ်မယ်ဆိုပြီး အိပ်လိုက်တာ တချိုးတည်းပဲ။
အရမ်းကို အိပ်မောကျနေပြီ၊ ဟောက်တောင် ဟောက်ချင်နေပြီဆိုမှ ကိုယ့်ကို တယောက်ယောက်က လာနှိုးနေသလိုလို ထင်မိတာကိုး။ စန်းစန်း၊ စန်းစန်း တဲ့။ အဲဒါ မာမား နံမည်ပဲ။ ဒါနဲ့ ကမန်းကတန်း ကုန်းထ လိုက်တော့ ကုတင်ဘေးမှာ ဆရာဝန်ငယ်ငယ် ချောချောလေး တယောက်။ မျက်လုံး သေချာပွတ်ပြီး ကြည့်လိုက်တာလေ။
ကိုယ့်ကို မာမားထင်ပြီး လူမှားပြီး လာနှိုးနေတာ။ သူက စမ်းသပ်မလို့။ ခွဲစိတ်တဲ့ အခြေအနေ၊ ခေါင်းမူးသလား၊ နာသလား မေးမလို့။ မီးမှိတ်ထားတော့ မသဲမကွဲနဲ့ ကုတင်မှားပြီး ကိုယ့်ကို လာနှိုးနေတာ။ ဗိုက်ခွဲထားတဲ့ ချုပ်ရာ ကြည့်မယ် တဲ့။ ဘုရား ဘုရား။ လူမှားနေပြီ။ စန်းစန်းက ဟိုဖက်ကုတင်လို့ ပြောလိုက်ရတယ်။ နာရီကြည့်လိုက်တော့ မနက် ၆နာရီကျော်နေပြီ။
နေ့လည်ရောက်လို့ ကိုယ့်အမျိုးသားလာတော့ မာမားက ပြောတယ်။ ညက သမီးတယောက် မအိပ်ရှာဘူး တဲ့။ သူနိုးလာလို့ ကြည့်လိုက်တိုင်း သူ့ကို ကြည့်နေတာ တွေ့တယ် တဲ့။ သမီးက စိတ်ပူတတ်လို့ ပင်ပန်းရှာတယ် တဲ့။
ကိုယ်ကတော့ ပြုံးပဲ နေလိုက်ပါတယ်လေ။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
ကိုယ်လဲ ခုတလော စာရေးချင်စိတ် မရှိဘူး ဖြစ်နေတယ်။ ဒါနဲ့ တရက် နှစ်ရက်လောက် ကွန်ပျူတာ မဖွင့်ဘဲ ပစ်ထားလိုက်တယ်။ ကိုယ့်ဘလော့ဂ်လဲ သွားမကြည့်ဘူး။ ရမလား လို့ နေကြည့်တာ၊ ပြီးတော့လဲ အညှို့ခံရတဲ့သူလို သူ့ရှေ့ သွားထိုင်မိပြန်တာပါပဲ။
စာလာဖတ်တဲ့ ညီမလေးတွေက သူတို့ သိနေတဲ့ အကြောင်းအရာလေးတွေ ဆွဲထုတ်ပြီး ကိုယ့်ကို ဟိုအကြောင်းလေး ရေးပါလား၊ ဒီအကြောင်းလေး ပြောပါအုံး ဆိုပြီး ပြောတယ်။ ကျေးဇူးလဲ တင်ပါတယ်။ ဒါပေမဲ့ တခါတလေကျရင်တော့ ကိုယ့်ဖာသာကိုယ် အားငယ်ပြီး စာဖက်မလှည့်ဘဲ တခြားဟာတွေ စိတ်ဝင်စားနေပြန်ပါရော။
တခါက ကိုယ်လဲ စာမရေး စာမဖတ်ဘဲ တခြား ကိစ္စတွေ စမ်းလုပ်ကြည့် စိတ်ဝင်စားဖူးပါတယ်။ အဲဒီတုန်းက ကိုယ်က စင်ကာပူကနေ ရန်ကုန်မှာ ပြန်နေစဉ်ကာလ။ ၂၀၀၀ ခုနှစ်လောက်က ပေါ့။ အဲဒီတုန်းက ကိုယ့်အမျိုးသားရော ကိုယ်ပါ ပြန်လာပြီးမှ သူက အလုပ်ကိစ္စတွေ မပြတ်သေးတာမို့ ပြန်သွားရတယ်။ သွားလိုက် ပြန်လိုက်ပေါ့။
ကိုယ်ကတော့ လည်ရာ ပြန်စားရေး။ ကလေး ကဗျာစာအုပ်လေးတွေ၊ ကိုယ်တို့ နှစ်ယောက် ကြိုက်တဲ့ ဟိုးအရင် ရွှေသွေးမှာပါတဲ့ ဆရာဦးဘကြည် ပန်းချီနဲ့ စာလေးတွေ ဆရာကြီးဆီက ခွင့်တောင်းပြီး သပ်သပ်ရပ်ရပ် ၄ရောင်နဲ့ ပြန်ထုတ်ဖို့ လုပ်နေတုန်း။ အဲဒီမှာ ဒီဇိုင်း ကိစ္စနဲ့ အကိုလို ခင်နေတဲ့ ဒီဇိုင်းဆရာ ကိုစိုးဝင်းငြိမ်းအိမ် ၀င်ထွက်တော့ အိုးလေးတွေမှာ ပုံလေးတွေကပ်ထားတဲ့ (အိုးပန်းချီ ခေါ်မလား မသိဘူး) အရုပ်အိုးလေးတွေ တွေ့တာကိုး။
တွေ့တွေ့ချင်း သဘောကျလိုက်တာ။ ဘယ်လိုလုပ်ရလဲ သင်ပေးပါဆိုပြီး ပူဆာတော့ သူက အိုးလုံးလုံး လှလှလေးတွေ ၀ယ်ပြီး ခံဆေး သုတ်၊ ပြီးရင် ပုံလေးတွေကို ကပ်တာ တဲ့။ ဒါနဲ့ သူကိုယ်တိုင် မင်းဓမြ လမ်း (တကယ်က မင်းဓမ္မလမ်းပါ) မှာ အိုးလေးတွေ သွာ်းဝယ်ကြတယ်။
ပန်းစိုက်ဖို့လဲ မဟုတ်၊ ပုံကပ်ဖို့ လွယ်အောင် အိုးလုံးလုံးလေးတွေ လိုက်ရွေးဝယ်ရတာ။ ဒါနဲ့ ကိုယ်က အိုးကြီးကြီး တလုံးရယ်၊ အိုးအသေးလေး ၂လုံးရယ် ဝယ်ခဲ့တယ်။ ခံဆေးသုတ်ဖို့ ဆေးအဖြူလဲ ဝယ်တယ်။
ကိုယ့်မှာ လုပ်ချင်လိုက်တာ အခုကိုပဲ ထမင်းမေ့ ဟင်းမေ့ လုပ်လိုက်ရမှ နေသာ ထိုင်သာ ရှိတော့မယ် ဆိုတဲ့အတိုင်း။ ဒါနဲ့ ဘာပုံကပ်ရမလဲ စဉ်းစားလိုက်တာ သူလဲ အိမ်မှာ မရှိတော့ သူ့အတွက် အမှတ်တရ တခုခု လုပ်ပေးမယ်လို့ စိတ်ကူးမိတယ်။
အဲဒီတုန်းက အိမ်မှာ သူဖတ်တဲ့ ဘောလုံးဂျာနယ် (အားကစား ဂျာနယ်) တွေ တပုံကြီး ဖြစ်နေတာ။ ဒါနဲ့ သူ့အကြိုက် ဘောလုံးသမားတွေ အကုန်လုံး လက်နဲ့ ကိုယ် လိုချင်သလောက်လေး ဆုတ် ဆုတ်ပြီး လိုက်ဖက် လှပအောင် အိုးမှာ ကပ်တယ်။ ကတ်ကြေးနဲ့ ညှပ်ရင် ရသားပေါ့။ ဒါပေမဲ့ မလှဘူး ထင်တယ်။ လက်နဲ့ ဆုတ်ထားတာကို ကပ်မှ ပိုလှတယ် ထင်လို့လေ။
ဘက်ခမ်းနဲ့ သူ့သားလေးပုံ၊ ဇီဒန်းပုံ၊ ရွိုင်းကင်း ပုံ။ အဲလက်စ် ဖာဂူဆန်တောင် ပါသေး။ အိုးက လက်တပွေ့လောက် ကြီးတော့ တော်တော် ပုံရှာကပ်ယူရတာ။ အိုး အတွင်းရော အပြင်ရောပေါ့။ စ လုပ်တော့ ညနေပိုင်းလောက် ကနေ လုပ်တာပါ။ တညလုံး ညလုံးပေါက် မပြီး မချင်း ပုံရှာ ဆုတ် ကပ် လုပ်တယ်။ အရင်လိုတာလဲ မဟုတ်ဘဲနဲ့။
အိုးလေးပြီးတော့ ကျေနပ်ပြီး ဧည့်ခန်းမှာ ထားလိုက်တယ်။ ဘောလုံးသမား ပုံတွေချည်း။ ကိုယ့်ဖာသာကိုယ် သဘောတွေကျလို့၊ သူနားက ဖြတ်သွားတိုင်း ကြည့်လိုက်၊ ပြုံးလိုက်၊ အိုးလေးကို ပွေ့ထားလိုက်၊ မြှောက်ကြည့်လိုက်၊ သူငယ်ချင်းတွေ လာရင် ပြ လိုက်။
ဒါနဲ့ သူ ပြန်လာရော ဆိုပါတော့။ လေဆိပ်က ကြိုလာကတည်းက အိမ်ရောက်ရင် အံ့သြစရာ ပြချင်တာ ရှိတယ် ပြောလာတယ်။ အိမ်ရောက်တော့ အရုပ်အိုးလေးကို ပြလိုက်တာပေါ့။ သူကလဲ အံ့သြပြီး လှလိုက် ကောင်းလိုက်တာ တဲ့။ ဘယ်လိုလုပ်သလဲ တဲ့။ ဒါနဲ့ ကိုယ် ဆုတ်ထားတဲ့ မဂ္ဂဇင်းတွေ၊ ဂျာနယ်အပုံလိုက်ကြီးကို လက်ညှိုးထိုးပြလိုက်တာပေါ့။
အစုတ်စုတ်ပြဲနေတဲ့ သူ့ဂျာနယ်တွေ မဂ္ဂဇင်းပုံကြီးကို ကြည့်ပြီး တော်တော်မျက်နှာ မကောင်းဘူး။ ဟာ ကနဲ မိုက် ကနဲ ဖြစ်သွားပုံရပေမဲ့ ကိုယ်က ပြုံးကြည့်နေတော့ သူ အတော် အိနြေ္ဒဆယ် ထားရပုံပဲ။ သူက ဒါတွေ ဖတ်လိုက် သဘောကျလိုက်နဲ့ အပန်းဖြေတာ မဟုတ်လား။ မချိပြုံးပေါ့။
နောက်တော့ ကိုယ်က အလိုက်တသိနဲ့ ဓာတ်ပုံဖက် လှည့်သွားပါတယ်။ ဓာတ်ပုံတွေ ကူး၊ ရေဆွတ်ပြီး ဓာတ်ပုံ စက္ကူသားတွေ ခွာပြီး အိုး လုပ်ပြန်တယ်။ ဓာတ်ပုံဆိုတော့ အရောင်လေးတွေ တောက်ပြီး တမျိုး လှပြန်တာပဲ။ ဒီတခါတော့ နှစ်ယောက်တည်း ပုံတွေချည်း ရွေးထုတ်ပြီး ကူးရ၊ ကပ်ရ ပေါ့။ ပုံကူး၊ ပြန်ဆုတ် ဆိုတော့ ပိုက်ဆံကုန်တာပေါ့။ ဒါလဲ မသက်သာဘူးပေါ့လေ။
ဘောလုံးပုံနဲ့ အိုးကတော့ ရန်ကုန်အိမ်မှာ ရှိသေးမယ် ထင်တယ်။ အဲဒီ နှစ်ယောက် ဓာတ်ပုံတွေနဲ့ အိုးကတော့ သူနဲ့ စိတ်ဆိုးတုန်းက နံရံကို ပစ်ပေါက်ပြီး ခွဲလိုက်လို့ အစိတ်စိတ် အမွှာမွှာ ဖြစ်သွားပြီ။ ကိုစိုးဝင်းငြိမ်းကတော့ ပြောတယ်၊ performance တွေ သိပ်မလုပ်နဲ့ တဲ့။
အခုတော့ ကျောက်တုံးလေးတွေပေါ်မှာ ပန်းချီခြယ်တာ စိတ်ဝင်စားပြီး ဆေးတွေ ဝယ်ထားလိုက်တယ်။ ကျောက်တုံးဆိုတော့ မကွဲနိုင်တာလဲ ပါတာပေါ့လေ။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
လူတွေများ စကားပြောရင် ပုံစံအမျိုးမျိုး။
တချို့က ဖြေးဖြေးမှန်မှန် အသေအချာ စဉ်းစားပြီးတော့ ပြောတတ်တယ်။ တချို့ကတော့ အားတက်သရော မြန်မြန်ဆန်ဆန်။ တချို့ကတော့ တလျှောက်လုံး ငြိမ်နေပြီးမှ ပြောလိုက်တဲ့တလုံးကျတော့လဲ ပိဿာလေးနဲ့ နံဘေးပစ်သလို ပြောပြန်ရော။
အဲဒီလို ပြောတဲ့အခါမှာလဲ ကိုယ်စွဲနေတဲ့စကားလုံးကို စကားပြောနေရင်း ထပ်ခါထပ်ခါ သုံးတတ်တာ သတိထားမိတယ်။ အခုတလော ကိုယ့်ပတ်ဝန်းကျင် အသိုင်းအ၀ိုင်းထဲမှာရော၊ ခင်မင်ရင်းနှီးတဲ့ မိတ်ဆွေတွေထဲမှာရော အဲဒါမျိုးလေးတွေကို ကိုယ် သတိထားမိနေတယ်။ အဲဒါကလဲ အထူးတလည် လုပ်ယူတာမဟုတ်ဘဲ ကိုယ့်ဖာသာကိုယ် သတိမထားလိုက်မိခင် ဖြစ်သွားတတ်တာမျိုး။ အကျင့်ဖြစ်နေတာ လို့ ပြောရမလား မသိဘူး။
ကိုယ့်အမျိုးသားရဲ့ သူငယ်ချင်း နယူးယောက်ခ်က အကိုတယောက်ကတော့ စကားပြောရင် အမြဲထည့် ပြောတတ်တာက “အေးလေ၊ အေးလေ” တဲ့။ ဒီကဖြင့် ဘာမှ မပြောရသေးဘူး။ သူက အေးလေ၊ အေးလေ နဲ့ ထောက်ခံနေပြီ။ သဘောကောင်းပုံများ ပြောပါတယ်။ သူများပြောရင် follow လိုက်ပေးတာ အကျင့်ပါနေတယ် ပြောရမှာပေါ့။
နောက်တယောက်ကတော့ စကားပြောရင် အမြဲ ထည့်ပြောတတ်တာက “ကိုယ်တကယ် အကောင်းပြောတာ” တဲ့။ သူကတော့ သူပြောမဲ့ စကားတခွန်းကို အလေးအနက် ဖြစ်စေချင်ပုံပါ။ ဒါပေမဲ့ သူ တခါမှ အတည် မပြောလေတော့ ဘယ်သူမှ မယုံကြလို့ ဒီတခါတော့ အတည်ပြောတာပါ လို့ ပြောချင်သလားမသိ။ ကိုယ်တကယ်အကောင်းပြောတာ လို့ စပြောရင် ပြုံးစိစိ ဖြစ်ရပြီ။ ချင့်ချိန်သာ ယုံပေတော့။ သူ ရွှီးတော့မယ်။
တချို့ကျတော့လဲ နိုင်ငံခြားရောက်နေလို့ ထင်ပါရဲ့၊ စကားပြောတာမှာ အင်္ဂလိပ်လို ထည့်ပြောတတ်တာပါ။ ကိုယ်ကတော့ အဲဒီလူနဲ့ စကားပြောရင် ရီချင်နေတတ်လို့ မနည်း အောင့်ထားရတာ။ သူက ဗမာလိုချည်း တောက်လျှောက် ပြောသွားပြီး နောက်ဆုံး အပိတ်လေးမှာ အင်္ဂလိပ်လိုလေး နဲ့ ပိတ်တတ်တာပါ။ you know what I mean တဲ့။
ကိုယ်လဲ အစကတော့ ကိုယ့်ကို ရှင်းပြနေတာမို့ အဲဒီလို ပြောတာ ထင်မိတယ်။ ဘယ့်နှယ် ဟုတ်ရမှာလဲ။ သူ့ဟာက အခွန်းတိုင်း ရှင်းပြတာ ဟုတ်ဟုတ် မဟုတ်ဟုတ် အဲဒါကြီးနဲ့ ပိတ်တော့တာ။
“ဒီကနေသွားရင် Garfield ရောက်တော့ ညာချိုးလိုက်၊ ဆိုင်လေးက အဲဒီနားမှာပဲ ရှိတယ်၊ you know what I mean?”
“ကျနော်လဲ အဲဒီ့ဆိုင်မှာပဲ အမြဲ ၀ယ်ဖြစ်တယ်။ သူက ဈေးလဲ သက်သာတယ်လေ။ you know what I mean”
နောက်တယောက်ကတော့ စကားအဆုံးမှာ မဟုတ်ဘူး၊ စကားအစမှာ ပြောတတ်တာပါ။ သူလဲ ဘိုလို တော့ခ်တာပါပဲ။ ဒါပေမဲ့ သူ့ဘိုစကားက သူများကို အလုပ်ပေးတဲ့ စကားပါ။ you remember တဲ့။
စကား စ မပြောနဲ့၊ ပြောတာနဲ့ you remember က စတယ်။ မေးခွန်းမေး အတော်ဝါသနာ ပါတာလား၊ မှတ်မိလားလို့ အဖော်စပ်တာလား မသိ။ သူ့မေးခွန်း မလာခင် စဉ်းစားရတာ ဦးနှောက်လဲ ပူပြီ။ ကြာတော့ မမှတ်မိဘူးဟေ့ လို့ အော်လိုက်ရတယ်။ ဘယ့်နှယ်၊ ပြော မပြောရသေးဘူး၊ ကိုယ်က ဘာမှတ်မိရမှာတုန်း။
နောက်တယောက်ကတော့ ပူးတွဲ အသုံးပြုတာပါ။ အင်္ဂလိပ်လိုရော ဗမာလိုရော ထည့်ပြောတာပါ။ နားထောင်နေတဲ့ ကိုယ် နားမလည်မှာ စိုးရှာပုံပါပဲ။ သူကျတော့ telling the truth တဲ့။
“Telling the truth အမ။ ကျမ တကယ် လိမ်မပြောဘူး။ အဲဒီအကျီ င်္လေးက ၁၅ကျပ်ပဲ ပေးရတာ” တဲ့..
“Telling the truth အမ။ ကျမ လိမ်မပြောဘူး။ သူက အဲဒီလိုကြီး မေးတာနော်” တဲ့.. အေးပါဟယ်၊ နင်လိမ်မပြောတာ ငါသိပါပြီ လို့..။
ကိုယ်ချစ်ခင်ရတဲ့ အမတယောက်ကတော့ ဆရာမလေ။ စာတွေ ရှင်းပြရလွန်းလို့လား၊ မိသားစုမှာ ဦးဆောင် အကြံထုတ်ရတဲ့သူမို့လား မသိ။ သူက စကားပြောရင် အနှစ်ချုပ် တတ်တယ်။ “အိသည်တော့ ” တဲ့..။
ပြောချင်တာက “အဲဒီတော့….” ပါ။ ဒါပေမဲ့ ကိုယ်တို့က အိသည်တော့ ပဲ ကြားတယ်။ ပထမတော့ နားထဲမှာ တမျိုးလေး၊ အဆန်းလေး ကြားလိုက်မိသလိုလို။ နောက်တော့ အဲဒီ အိသည်တော့…လေးကိုပဲ နားစွဲနေမိတော့တာလေ။
“အိသည်တော့၊ ပထမဆုံး ဟောလီးဝုဒ်ကို သွားမယ်၊ ပြီးမှ ဘိခ်ျကို ချီတက်ကြတာပေါ့၊ ဟုတ်ဖူးလား”
“အိသည်တော့၊ အမက ဟင်းချက်မယ်၊ ရှင်က ကြက်သွန်လှီး ပေး” တဲ့။
အမ အမျိုးသားကတော့ တမျိုးပါ။ ဘယ်လောက်များ သဘောတရားရေးတွေ စိတ်ထဲမှာရော အပြင်မှာပါ ဆွေးနွေး ငြင်းခုန်နေသလဲ မသိ။ သူအမြဲ ပြောတတ်တာက “သဘောတခုက…” တဲ့။ သဘောတရားရေးတွေ မဆွေးနွေးလဲ သူ့ သဘောတခုက ပါလာတာပါပဲ။ ဟုတ်ပါပြီ၊ သဘော ဘယ်နှစ်ခုများ ဖြစ်ချင်သေးလို့လဲ။
“သဘောတခုက ဒီလိုရှိတယ်လေ။ ကျနော်တို့ ပထမအဆင့်အနေနဲ့ ဒီလိုလေး သွားကြည့်မယ်၊ ပြီးတော့ ဟိုလို လုပ်ကြည့်တာပေါ့” တဲ့။
“သဘောတခုက ကျနော်တို့ ယောကျာင်္းလေးတွေက ကားတစီးနဲ့ သွားပြီး၊ ခင်ဗျားတို့ မိန်းကလေးတွေ က နောက်တစီးနဲ့ လိုက်ခဲ့ပေါ့” တဲ့..။
သူများတွေ အကြောင်းချည်း ပြောပြီး ကြိတ်ရီနေတယ် ဖြစ်မှာစိုးလို့ ကိုယ့်အကြောင်းလဲ ပြောပါအုံးမယ်လေ။ ကိုယ်က အခုလို စာရေးနေတဲ့အချိန်သာ မပါတာပါ၊ စကားပြောရင်တော့ အမြဲထည့်ပြောတတ်တာက “ဟို ဘာလဲ” တဲ့ (မရီပါနဲ့လေ..)
“ကိုယ်လဲ တယောက်တည်း (ဟို ဘာလဲ) အခုလို ရီစရာလေးတွေ ကြံဖန် ဟိုတွေး ဒီတွေး တွေးနေတော့ (ဟို ဘာလဲ) အနားမှာ အဖော်မရှိလဲ ပျင်းတော့ မပျင်းရဘူးပေါ့ ၊ ဟို ဘာလဲ ဘာလဲ ဘာပြောမလို့ပါလဲ….မေ့ကုန်ပါပြီလေ”
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
ဒီလ တလလုံး ကိုယ်စာသိပ်မရေးဖြစ်ဘူး။ မရေးဖြစ်ပေမဲ့ စိတ်ထဲမှာ ပင်ပန်းနေတယ်။ တနင့်တပိုး လေးလေးပင်ပင်ကြီး ခံစားနေရတယ်။
ကိုယ်ဒီဘလော့ဂ်လေးလုပ်တာလဲ ၂၆ရက်နေ့က ၆လ ပြည့်သွားပြီ။ စာ စရေးတုန်းကတော့ အားသွန်ခွန်စိုက် ရေးလိုက်တာ၊ ညတိုင်း စာရေးဖို့ ထိုင်မိတာပဲ။ တနေ့တပုဒ် ပြုံးပြုံး ပြုံးပြုံးနဲ့ ရေးနေလို့ မိတ်ဆွေတယောက်က ဘလော့ဂ်ရေးတာ အဲဒီလို မရေးရဘူးလေ တဲ့။
ကိုယ်ကလဲ နားမလည်ပါဘူး။ ရေးချင်စိတ်ရှိတုန်းလေး ရေးနေမိတာ။ မရေးချင်တော့လဲ ကြည့်ပါလား၊ ပို့စ်တင်တဲ့ အရေအတွက်က တလထက်တလ နည်းနည်းသွားပြီး ဂရပ်ဖ်သာ ဆွဲလို့ကတော့ အောက်ကို ထိုးဆင်းနေလို့ မြေကြီးကို ဒုတ်ဒုတ်ထိနေပါပေါ့။
ကိုယ့်မှာကလဲ ရွေးချယ်စရာ ဘာမှ မရှိဘူး။ စာပဲ ရေးစရာ ရှိတယ်။ သူများတွေလို ကဗျာလဲ မစပ်တတ် (ဒါတောင် အဖေ့ ကဗျာလေးတွေ ကယ်နေပေလို့)။ ငယ်ငယ်ကစိတ်နဲ့သာ ကဗျာ စပ်လိုက်ရင် အကုန်ပြေးကုန်မှာ။ တခါတည်း မိဘမျက်နှာ အိုးမည်းသုတ်ပြီးသား ဖြစ်သွားမယ်။
ပန်းချီလဲ မဆွဲတတ်။ ဆွဲဖို့တော့ ကြိုးစားဖူးပါသေးတယ်။ ကောင်မလေးချောချော မျက်လုံးလေး ထောင့်ကပ်နေပုံပေါ့။ (ဆွဲတာ ရိုးရိုး မဆွဲဘူး။ မတတ်ရတဲ့အထဲ အတတ်က ဆန်းချင်သေးတာ၊ မျက်လုံးထောင့်ကပ်နေပုံ တဲ့။) အဲဒါ မျက်လုံးနှစ်လုံးက ဟိုတဖက် ဒီတဖက် ကပ်နေလို့ ပြောင်သလိုတောင် ဖြစ်နေသေး။ အစွယ်တပ်ပေးလိုက်ရင်တော့ ဘီလူးဖြစ်ပြီ။
ဓာတ်ပုံလဲ ရိုက်တတ်ချင်ပါတယ်။ သူများတွေ ရိုက်တာ ကြည့်ပြီးလဲ အားကျမိပါတယ်။ ဒါပေမဲ့ ရိုက်မယ်ကြံတိုင်း ကိုယ့်လက်က တုန်ချင်တယ်။ ကိုယ်ရိုက်တဲ့ပုံတွေကို ကြည့်လိုက်.. လှိုင်းလေးတွေ ဖြစ်နေတယ်။ လှုပ်နေလို့ ၀ါးနေတာ။ နောက်ပြီး ကိုယ်က မလှရင် ရိုက်လိုက် ပြန်ဖျက်လိုက် အမြဲလုပ်နေတာမို့ ဘက်ထရီ အပိုတွေ အမြဲဝယ်ထားရတယ်။ တပုံရိုက်ပြီး ၁၀ခါလောက် ပြန်ကြည့်၊ နောက်ဆုံးတော့ ဖျက်တဲ့ ဘူတာဆိုက်တာပါပဲ။
ဟင်းချက်တာကျတော့ရော..။ ဒါကတော့ ခင်တဲ့သူတိုင်း သိပြီးသားပါလေ။ သူများ ဘလော့ဂ်တွေမှာ ဟင်းချက်ပြီး တင်ရင် ကိုယ့်ကို မယောင်မလည်နဲ့ အမြဲ တွေ့ရမှာပါ။ သူတို့ ဟင်းချက်နည်းလေးတွေ ကြည့်လိုက်၊ သဘောကျလိုက်။ တခေါက်ပြန်သွားကြည့်လိုက်၊ သွားရည်ကျလိုက်။ မချက်တတ်တော့ ခေါင်းငိုက်စိုက်ချပြီး ပြန်လာလိုက်။
အဖေ့ ၂နှစ်ပြည့် ဆွမ်းကျွေးလုပ်မယ်ဆိုတော့ အိမ်မှာ မိတ်ဆွေအနည်းအကျဉ်း ဖိတ်ပြီး ဆွမ်းကျွေးဖို့ စီစဉ်မိတယ်။ ဘုန်းဘုန်းက ဘာစီစဉ်ထားလဲ တဲ့။ ပွဲမလုပ်ခင် မေးပါတယ်။ လူတွေအတွက်ကတော့ ခင်မင်ရင်းနှီးတဲ့ မိတ်ဆွေတွေ ဖြစ်တဲ့ ဖြူဖြူ နဲ့ Mam က ဒံပေါက် ချက်ပေးမယ်၊ ဘုန်းဘုန်းတို့အတွက်တော့ တပည့်တော် ကိုယ်တိုင် ဆွမ်းဟင်းချက် ကပ်မယ် ဘုရား လို့ ပြုံးပြုံးရွှင်ရွှင်နဲ့ လျှောက်လိုက်တယ်။ ဘုန်းဘုန်း မျက်နှာမကောင်းဘူး။ ဘုန်းတော်ကြီး ဆိုတော့လဲ ဘာပြောကောင်းမှာလဲ၊ ကိုယ့်လက်ကို သိနေတော့လဲ ခက်တယ်။
မိတ်ဆွေတွေကလဲ မလုပ်ခင် ဖုန်းဆက်မေးကြတယ်။ ဘာချက်မယ် စဉ်းစားသလဲ ချိုသင်း တဲ့။ ကိုယ်ကလဲ ပြန်ပြောတယ်။ ၀က်သားရယ်..၊ ၀က်သားရယ်..၊ အင်း..၀က်သားရယ်..။ တကယ်က ကိုယ်ဘာချက်ရမယ်မှန်း မသိလို့ စိတ်တွေများပြီး မေ့ကုန်တာ။ ၀က်သားကနေ ရှေ့ဆက် မတက်တော့ဘူး။ ကဲ ကဲ နေပါ၊ အမလဲ ကူချက်ပါတော့မယ် တဲ့။
ကိုယ်ကိုယ်တိုင် လက်စွမ်းပြ တော့မယ် ဆိုတော့ ၀ိုင်းကြ ၀န်းကြရတာပေါ့။ ဒါနဲ့ ဆိတ်သားနှပ်မဲ့သူ၊ ငါးနုသန်း ချက်တဲ့သူ၊ ငပိချက် ချက်တဲ့သူ၊ အမဲသားနှပ် နဲ့ မုန်လာဥချဉ်သုတ် တဲ့၊ ပဲစောင်းခါးသီးသုတ် နဲ့ ငပိရည် တို့စရာ တဲ့။ ငပိကြော် ကြော်လာကြ၊ ချဉ်ရည်လေး လုပ်ပါအုံးဟေ့။ ကြက်အသည်းအမြစ်လေးလဲ လုပ်အုံးမှ။ ဒါနဲ့ ကိုယ်ချက်စရာ မကျန်ဘဲ တစားပွဲလုံး ပြည့်ပါလေရော။
ကိုယ်ကလဲ မနေပါဘူး။ ဒီလောက် အတင်းတားတဲ့ကြားက ၀က်သားနှပ်နဲ့ ပုဇွန်တော့ ၀င်ကိုင်လိုက်သေးတာပါ။ အားလုံးစားပြီးသောက်ပြီးမှာ နောက်တနေ့အတွက် ဟင်းတွေပိုလို့ ကျန်နေတာ အဲဒီနှစ်မျိုးတည်းပါ။ ကိုယ်လဲ ကိုယ့်ဟင်း သူများမစားလို့ ကျန်နေတယ် မဖြစ်အောင် ဖိစားတာပါပဲ။ ဒါလဲ ကျန်တာပါပဲ။
အခုတော့ ကိုယ့်ဘလော့ဂ်မှာ ပို့စ် အသစ် မတက်လဲ နားလည်ယူကြပါတော့။ ကိုယ်ရေးတဲ့ ကဗျာကြီး တက်မလာတာ၊ ကိုယ်ဆွဲတဲ့ ပန်းချီပုံကြီး ထွက်မလာရင်ဘဲ ဒီနေ့အဖို့ သင့် ရာသီဥတု သာယာနေလောက်ပါပြီ။ အကြံကုန်လို့ ကိုယ်လက်စွမ်းပြထားတဲ့ ဟင်း ချက်ပြီး ကိုယ်တိုင် ဓာတ်ပုံရိုက်ပြီး တင်ပြီဆိုရင်တော့ ကွန်ပျူတာ ပိတ်ပြီးသာ ပြေးပေတော့။ ။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
ဘလော့ဂ်လေးလဲ ဖုန်တက်နေပြီ။
မိတ်ဆွေတွေက စာမရေးတာ ကြာလို့ ကိုယ့်လူ စာရေးတော့လေ၊ နှစ်ကူးနေတာ အင်္ဂလိပ်နှစ်ကူးပြီးတော့ ကရင် နှစ်ကူး၊ ပြီးတော့ တရုတ် နှစ်ကူး၊ နောက် မြန်မာ နှစ်သစ်ကူးတောင် ရောက်တော့မယ် တဲ့။ ဒါတော့ တဆိတ် ပိုပြီ ထင်တယ်။
တကယ်က ကိုယ်လဲ ရေးမလို့ ကြိုးစားနေတာပါပဲ။ မရေးဖြစ်တာက သွားကိုက်နေတာနဲ့ လက်ပါ ရော ကိုက်သွားပြီး စာမရေးနိုင် ဖြစ်သွားတယ်။ ကိုယ့်အဖို့မှာတော့ သွားကိုက် သွားဖုံး ယောင်တဲ့ အနာဟာ နာသမျှ အနာတွေထဲမှာ အဆိုးဆုံးလို့ ထင်မိတယ်။ ဘယ်လောက်ပဲ ပါးကြီးယောင်ကိုင်းနေပါစေ၊ နဂိုက ပါးဖောင်းပြီးသားဆိုတော့ နဂိုဖောင်းပဲ ထင်ပြီး ရုပ်က သနားစရာလဲ မဖြစ်ပြန်တော့ ပိုခံရတယ် ထင်မိတယ်။
အရေးထဲ ကိုယ်ကလဲ သတ္တိခဲ ဆိုတော့ သွား နှုတ်တဲ့ ကိရိယာ တန်ဆာပလာတွေ မြင်ရင် ရင်ထဲမှာ တလှပ်လှပ် ဖြစ်နေတယ်။ ဒါတောင် ပြတဲ့ ဆရာဝန်က ကိုယ့်အမလို ခင်ပြီး ရင်းနှီးပြီးသား။ ကိုယ်ကြောက်တတ်မှန်းသိလို့ အသက်သာဆုံး လုပ်ပေးမှာ ယုံကြည်ရပြီးသား။ ဒါတောင် ကြောက်လွန်းလို့ တုန်တုန်ရီရီနဲ့ ဆေးခန်းထဲ ၀င်ရတာပါ။
အခုအချိန်က ပါးစပ်လှုပ်တာတောင် တရားမှတ်သလို သတိနဲ့ လှုပ်နေရပေမဲ့ လက်ကတော့ လှုပ်လို့ရသေးတာမို့ ကီးဘုတ်ပေါ်ကို လက်တင်လိုက်ပါပြီလေ။
မြန်မာပြည်မှာတော့ စနေ၊ တနင်္ဂနွေနေ့လည်တွေဆိုရင် ရုပ်ရှင်ပြီးရင် တီဗီမှာ တပတ်အတွင်း သတင်း လာတတ်တာ သတိရသေးတယ်။ အဲဒီအချိန်ဆိုရင် တီဗီကြည့်နေတဲ့လူတွေက ကြည့်စရာတွေ ကုန်ပြီလို့ သဘောထားလေသလား မသိ၊ အညောင်းတွေဘာတွေဆန့်၊ လုပ်စရာရှိတာတွေ အခုမှ သတိရသွားသလို ထ လုပ်တတ်တာ။
အခုလဲ ကိုယ်က ကိုယ်စာမရေးဖြစ်တဲ့ တပတ်အတွင်း ဘာတွေလုပ်ဖြစ်သလဲ ဆိုတာကို ပြောပြရရင် တပတ်အတွင်း သတင်းနားထောင်ရသလို ဖြစ်ချင်ဖြစ်နေမှာ။ ဒါပေမဲ့ သတင်းက ကြည့်သူ မရှိလဲ လွှင့်မြဲ လွှင့်နေသလို ကိုယ်ကလဲ ဖတ်သူမရှိလဲ တောင်ရောက် မြောက်ရောက် လျှောက် ရေးနေသလို ဖြစ်နေပြီ ထင်ပါရဲ့နော်။
ဖြစ်ပုံက ကိုယ့်အတတ်ကိုယ်စူးတာပါ။ ကိုယ်က သူငယ်ချင်းတွေကို အံ့သြအောင် surprise လုပ်တတ်လွန်းလို့ အခုတော့ ကိုယ့်အလှည့်ဖြစ်သွားတာ။ နှစ်ကူးမှာ ဆန်ဖရန်စစ်စကိုက မိတ်ဆွေတွေက လာမယ်လို့ ကြိုပြောပြီးသား။ လွတ်လပ်ရေးနေ့မှာ က မဲ့ သီးလေးသီး အငြိမ့် အတူတူကြည့်ကြမယ် လို့ ချိန်းပြီးသား။ ဒါပေမဲ့ သူတို့က ဘာမှ ကြိုမပြောဘဲ အံ့သြ ၀မ်းသာသွားအောင် တပတ်လောက် စော လာလိုက်တယ်။
အဲဒီညက ခရစ်စမတ်ပြီး နောက်တည။ ညစာစားနေတုန်း အိမ်ရှေ့က ဘဲလ်တီးသံ ကြားတော့ လိုက်ကာကြားက အပြင်ကို ချောင်းကြည့်လိုက်မိတယ်။ ဟာ..။ မမျှော်လင့်ဘဲ သူငယ်ချင်း ကိုတွေ့တော့ ၀မ်းသာလွန်းလို့ အမကို ဖက်ပြီး ခုန်နေတာ အိမ်ရှေ့က မြေကြီးတောင် နည်းနည်း နိမ့်သွားသလိုပဲ။ အိမ်ရှေ့မှာ ကိုယ်အံ့သြသွားတာကို ပြုံးပြီး ကြည့်နေတဲ့ အမ ဆိုတာ (စန်တာ က ပေးတဲ့) ခရစ်စမတ်လက်ဆောင်မို့ အကြီးကြီးပါလား လို့။
တကယ်က သူတို့က နီးနီးနားနား ခရီးထွက်ဖို့လာတာ။ ဒါနဲ့ ကိုယ်တို့ နှစ်ယောက်လဲ တခါတည်း အထုပ်အပိုးပြင်ပြီး ကောက်ကောက်ပါအောင် လိုက်သွားတော့တာပဲလေ။ ဒီလိုနဲ့ Nevada က Las Vegas လဲ ရောက်သွားတယ်၊ Arizona က Grand Canyon ကိုလဲ သွားတယ်။ အဲဒီ့က အပြန် Sedona ဆိုတဲ့ အရမ်းလှတဲ့ မြို့လေးကိုလဲ ရောက်သွားတာပေါ့။
Las Vegas ဆိုလို့ ကန္တာရထဲက နိဗ္ဗာန်ဘုံမို့ အထင်တွေ ကြီးပြီး လောင်းကစားလုပ်၊ ပျော်ပါးနေတယ် မထင်ပါနဲ့အုံး။ လမ်းမကြီးတလျှောက် လက်တွဲလျှောက်ရင်း စကားပြောကြတာပါပဲ။ လမ်းလဲ လျှောက်ရလွန်းလို့ လူတောင် ကွ တ နေတာပါ။ ကြုံရာ ကော်ဖီဆိုင်လေးတွေမှာ ထိုင်၊ ကိုယ်အကြိုက်ဆုံး ဖြစ်တဲ့ Venetian ဆိုတဲ့ Casino မှာ ဗင်းနစ်သားတွေ ဟိုတယ်ကြီးထဲက မြစ်ရိုးလေးတလျှောက် သီချင်းဆိုရင်း လှေလှော်တာကို သွားငေးမောတာပါပဲ။
ကိုယ် Las Vegas သွားတိုင်း လောင်းကစားဝိုင်းတွေ မတွေ့ရတဲ့ (တကယ်က အထပ် သပ်သပ်ခွဲထားတာပါ) အဲဒီ သီချင်းဆိုရင်း လှေလှော်ကြတဲ့ နေရာလေးကို မရောက်ရောက်အောင် သွားတာပဲ။ အေးချမ်းလို့လေ။ ကိုယ့် dream ကလဲ ဗင်းနစ်စ်မြို့မှာ လှေစီးဖူးချင်တာမို့ပါ။ ပြီးရင် မဒမ်တူးဆော့တ် ဖယောင်းပြတိုက် ၀င်ကြည့်တယ်။ Las Vegas မှာ ကိုယ်တို့ သွားတတ်တာ ဒါ အကုန်ပဲ။
နှစ်ကူးတဲ့ အချိန်ကတော့ Grand Canyon သွားနေချိန်ပေါ့။ ၂၀၀၉ ကိုကူးတဲ့ ည ၁၂နာရီထိုးတဲ့ အချိန်က သူများတွေလို စိတ်ကူးယဉ်စရာ မကောင်းဘူး။ ညကြီးက မှောင်မိုက်လို့၊ လမ်းပေါ်မှာ ကိုယ်တို့ ကား တစီးတည်း မိုက်မိုက်မဲမဲ မောင်းနေတယ်။ ပြီးတော့ တောင်ပေါ်တက်နေတဲ့အချိန်။
ကိုယ်လဲ နှစ်ကူးတာ ၀မ်းမြောက်ဝမ်းသာ ကြိုဆိုမလို့ပါပဲ။ ကားကို လမ်းဘေးမှာရပ်၊ ကားပေါ်က ခုန်ဆင်း၊ ဦးထုပ်တွေ မာဖလာတွေ လေထဲ ပစ်မြှောက်၊ ဟက်ပီးနယူးယား မယ်ပေါ့။ ဒါပေမဲ့ ကားက တောင်ပေါ်တက်နေချိန်မို့ လမ်းဘေး ကားမရပ်ရ တဲ့၊ သတိပေး ဆိုင်းပုဒ်တွေ ရေးထားတယ်။
လမ်းနံဘေးမှာလဲ နှင်းတွေက ဖွေးဖွေးလှုပ်ပြီး ဖြူဆွတ်လို့။ အပြင်ဖက်မှာ -11 ဒီဂရီဆိုလား။ ကားလေးက တရိပ်ရိပ်ပြေးလို့၊ ဖုန်းတွေ ဆက်ပြီး နှုတ်ဆက်မယ်ဆိုတော့ LAက မိတ်ဆွေ တယောက်ဆီပဲ ဖုန်းဆက်လို့ရခဲ့တယ်။ ဟေး..ဟက်ပီးနယူးယား ဆိုတော့ ၁၂နာရီထိုးဖို့ တနာရီတောင် လိုသေးတာ တဲ့။ ကိုယ်ရောက်နေတာက Arizona မို့ California ထက် တနာရီ စောနေတာလေ..။ ဖြစ်ပုံက..။
နောက်တော့ တောင်ကြားလမ်းမို့ network မမိတော့လို့ ဖုန်းလဲ ဆက်မရတော့လို့ ဘယ်သူမှ နှုတ်မဆက်လိုက်ရတော့ဘူး။ ဒါနဲ့ ကားထဲမှာပဲ ငုတ်တုပ်လေး ထိုင်ပြီး တမိနစ်တခါလောက် ကိုယ်နှုတ်ဆက်ချင်တဲ့သူတွေကို စိတ်မှာတွေးပြီး ဟေး..ဟက်ပီးနယူးယား လို့ အော်နေလိုက်တာပေါ့။ ဒါလဲ ပျော်တာပါပဲ။
Grand Canyon ကတော့ ဒါ ပထမဆုံးအကြိမ် ရောက်ဖူးတာပါ။ ကမ္ဘာ့အံ့ဘွယ်လဲဖြစ်၊ ဘူမိဗေဒ နဲ့လဲ ကျောင်းပြီးသူမို့ ကျောက်တွေကို ချစ်မိတာ လွန်သလား။ ကျောင်းစာတွေကတော့ မေ့ကုန်ပါပြီ။ သက်ရင့် သက်နု ကျောက်တွေ အရောင်အမျိုးမျိုးနဲ့ လှနေတာကို တ၀ကြီး ကြည့်ခဲ့ရတယ်။ သဘာဝဟာ အံ့သြလောက်အောင် လှနိုင်ပါပေ့။
နောက်..ကိုယ်တို့က Economy ခရီးသွားနည်းနဲ့ သွားခဲ့တာမို့ ထမင်းဟင်းတွေလဲ သယ်သွားသေးတာ။ ညကြီးမိုးချုပ် Rest Area မှာ ကားရပ်တော့ ထမင်းစားကြမယ်ပေါ့။ ဒါနဲ့ ထမင်းတွေ၊ ငါးရံ့ခြောက်ဖုတ်၊ လက်ဖက်၊ ချဉ်ပေါင်ကြော်တွေ ထုတ်ကြတယ်။ မှောင်ထဲမှာ အိမ်သာက မီးရောင်လေး မမြင်မကန်းနဲ့ သူငယ်ချင်း ၆ယောက် ဝေပုံကျ ဟင်းတွေ ပုံကြတယ်။
ရာသီဥတုကလဲ အေးလိုက်တာ မပြောပါနဲ့တော့။ ဒါနဲ့ ထမင်းပေါ် ဟင်းပုံပြီးတော့ ကားထဲမှာ ပြန်ထိုင်စားကြတာပေါ့လို့ သဘောတူကြတယ်။ ဒီလိုနဲ့ လေအေးအေးမှာ တုန်ခိုက်ရင်း ထမင်း ပန်းကန်တွေကိုင်ပြီး “ကားဆီကို ပြေးကြဟေ့” တဲ့၊ တယောက်က လောဆော်တယ်။
ကိုယ်ကလဲ မှောင်နဲ့ မဲမဲ ဘာကိုကိုင် ပြေးရမယ်မှန်း မသိဘဲ ယောင်နန ဖြစ်နေတုန်း ကိုရစ်က အဲဒီရေဗူး ယူခဲ့ တဲ့၊ လှမ်းပြောတယ်။ ကိုယ်လဲ ဥာဏ်အလင်းပွင့်ပြီး စားပွဲပေါ်က ရေဗူးယူပြီးတော့ ကားဆီကို ပြေးနေတဲ့ လူအုပ်နောက်က ပြေးလိုက်ရတယ်။
ပြေးရင်းတန်းလန်း စဉ်းစားမိတာက ရေဗူးထဲမှာ ရေက တ၀က်လောက်သာ ကျန်တော့တယ်၊ ဘာလို့ ဒီရေဗူး သယ်နေမလဲပေါ့၊ ငါသောက်လိုက်ရင် မြန်မြန် ကုန်၊ လွှင့်ပစ်ရတာပဲဆိုပြီး ပြေးရင်းတန်းလန်း ရေဗူးကို မော့သောက်လိုက်တာ တမျိုးတော့ ဖြစ်သား။ ရေကလဲ ဘယ့်နှယ် ရေ ပါလိမ့် ချွဲတဲတဲ နဲ့ဆိုပြီး မီးမှိန်မှိန်မှာ သေချာကြည့်လိုက်တာ အားပါးပါး..လက်ဖက်သုတ်ဖို့ ယူလာတဲ့ ဆီပုလင်း ဖြစ်နေတာကိုး။ ဆီက နှစ်ဆယ်သားလောက် ဗိုက်ထဲ ၀င်ပြီးပေါ့..။
ကိုယ်လဲ ခရီး စ ထွက်ကတည်းက ချောင်းဆိုးနေတာပါ။ ချွဲမရှိဘဲ ချောင်းခြောက်ကြီး ဆိုးနေတာမို့ စိုစိုပြေပြေ ဖြစ်သွားအောင် လည်ချောင်းထဲ ဆီလောင်း လိုက်ရတဲ့သဘောပါ။ အတော်တော့ အီလည်လည် ဖြစ်သွားတယ်။ ချောင်းလဲ အဲဒီကတည်းက ဓာတ်ကြမ်းတိုက်လိုက်သလို ဖြစ်ပြီး လန့်သွားပုံရတယ်။ လုံးဝမဆိုးတော့ဘူး ဆိုပါတော့။
သွားခဲ့တဲ့အထဲမှာတော့ ဆီဒိုးနားဆိုတဲ့ မြို့ကလေးက ချစ်စရာ အကောင်းဆုံးပါ။ မြို့လေး သေးသေးမှာ ကော်ဖီဆိုင်လေးတွေနဲ့ ပြည့်နေပြီး မြေကြီး နီနီ တွေနဲ့။ Cathedral ကျောက်တောင်ဘေးက ချောင်းကလေး တလျှောက် လမ်းကလေး ကွေ့ကောက်ကောက် လိုက်ခဲ့ကြသေးတယ်။ တကယ့် တောရိပ် တောင်ရိပ်။
၂ရက်နေ့ ညမှာ LA ပြန်ရောက်ပြီး ၄ရက်နေ့ လွတ်လပ်ရေးနေ့မှာ သီးလေးသီး အငြိမ့်ကို ကြည့်ဖို့ အသင့်ဖြစ်နေပြီ။ သီးလေးသီးဆိုရင် တည်ထောင် ပျိုးထောင်ခဲ့သူ ကိုဇာဂနာကို ချန်ထားလို့ မရပါဘူး။ အခုအချိန်မှာ မြစ်ကြီးနားထောင်မှာ ထောင် ၅၉နှစ် ကျနေတဲ့၊ ထောင်ဝင်စာတောင် ပုံမှန်တွေ့ခွင့် ဝေးလံခက်ခဲနေတဲ့ ကိုဇာဂနာကို သတိရစရာ လွမ်းဆွတ်စရာတွေ ဖြစ်ရတာပေါ့။ မေတ္တာလက်မှတ်ပေးလို့ လာကြည့်တဲ့ အမ မလွင်မာတို့ သားအမိကတော့ ပို သတိရစရာ ဖြစ်ရှာမှာပေါ့။
လွတ်လပ်ရေးနေ့မှာ လွတ်လပ်စွာ ပြောဆို ရယ်မောခွင့်ကို သီးလေးသီး နဲ့ ဆေးရောင်စုံ အငြိမ့်က မြန်မာပြည်သူပြည်သား ကိုယ်စား ခဏပေးလိုက်သလိုပါပဲ။ ကြည့်ရင်း ကိုယ်တို့ချစ်တဲ့ မြန်မာပြည်ကြီးကို လွမ်းလိုက်တာ။ တရားမျှတ လွတ်လပ်ခြင်းနဲ့ မသွေ ဒို့ပြေ၊ ဒို့မြေ တဲ့၊ ဘယ်တော့များမှ သီချင်းစာသားထဲကအတိုင်း ဖြစ်ပါ့မလဲ။
နောက် လွတ်လပ်ရေးနေ့နဲ့ လိုက်ဖက်ညီတဲ့ လွတ်လပ်ရေး ဗိသုကာ၊ ကိုယ်တို့အားလုံးရဲ့ တဦးတည်းသော ဗိုလ်ချုပ်၊ ဗိုလ်ချုပ်အောင်ဆန်း ရဲ့ သီချင်းကိုတော့ ဆိုရတာ အားရပါးရ အရှိဆုံးပါပဲ။ မျက်ရည်လဲ ၀ဲမိတယ်။
သီးလေးသီးကိုတော့ တာဝန်ကျေပွန်တဲ့ အနုပညာသမား ပီသ သူများလို့ ပြောချင်တယ်။ သူတို့ဟာ သာမန်လူတွေပါ၊ ဒါပေမဲ့ ပြောသင့်တာ လုပ်သင့်တာကို ရဲရဲဝင့်ဝင့် စိုးရိမ်ကြောင့်ကြမှု မရှိဘဲ ဆရာသမားရဲ့ လမ်းအတိုင်း အနုပညာနဲ့ ပြတ်ပြတ်သားသား ရပ်တည်ပြခဲ့၊ တင်ဆက်ခဲ့တာ ချီးကျူးစရာပါပဲ။
သူတို့တွေက ယဉ်ကျေးမှုတက္ကသိုလ်ကျောင်းဆင်းတွေမို့ ပညာလဲ အသင့်အတင့်ရှိတယ်၊ အဲဒီမှာ ရပ်တည်ချက် မှန်ကန်တဲ့အတွက် အလှမှာ အယဉ်ဆင့်သလို ဖြစ်ပြီး ကြည့်သူတိုင်း ကြည်နူး ပီတိ ဖြစ်ရပါတယ်။ ဖျော်ဖြေရေး သက်သက် မဟုတ်ဘဲ အမှန်တရားကို ထိတွေ့ခွင့်ရတဲ့အတွက်ကြောင့်မို့ ထင်ပါတယ်။ အခုလိုပဲ တည်တည်ငြိမ်ငြိမ်နဲ့ မှန်ကန်တဲ့ အနုပညာခရီးကို ဆက်လျှောက် သွားနိုင်ပါစေလို့ ဆုတောင်းမိပါတယ်။
ကဲ…တပတ်အတွင်း သတင်းတော့ ပြီးပါပြီ။ သတင်းကြေငြာသလို ကိုယ်ပြောချင်တာတွေ ပြောပြီးတော့ အောက်က ပရိသတ်ကို ကြည့်လိုက်တော့ အိပ်တဲ့လူက အိပ်လို့။ ထိုင်သူ မရှိတဲ့ ဖျာတောင် လေထဲ လွင့်ပြေးတော့မှာပါကလား။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
တနေ့က ညီမလေးတယောက် နဲ့ စကားပြောရင်း အိမ်ထောင်ဖက် ရွေးချယ်တာတွေ၊ မိဘကို အသိပေးရတာတွေ၊ လက်မထပ်မီ လူကြီးတွေ ဆုံးမကြတာတွေကို စကားရောက်သွားတယ်။ ပြောမိတာတော့ အစုံပဲ။ ကိုယ့်အကြောင်းလဲ ပါ၊ စဉ်းစားဆင်ခြင်ရတာတွေလဲ ပါ ဆိုပါတော့။
တကယ်တော့ အိမ်ထောင်ရေးဆိုတာ မိန်းကလေး ဖြစ်စေ၊ ယောကျာင်္းလေး ဖြစ်စေ ဘ၀မှာ အလေးအနက်ထား စဉ်းစားသင့်တဲ့ အရာပေါ့။ ချစ်တာကို အခြေခံပြီး ချစ်ရုံနဲ့ မပြီးဘဲ တဦးကို တဦး နားလည် ခွင့်လွှတ်ပြီး အပေးအယူမျှမယ်၊ မောင်တထမ်း မယ်တရွက် နဲ့ မိသားစု ဘ၀လေးကို အတူ ညှိနှိုင်း တိုင်ပင်မယ်ဆိုရင်တော့ စိတ်ချမ်းသာရတာပေါ့။
ကိုယ်တို့အိမ်ကတော့ အိမ်ထောင်ဖက် ရွေးတာမှာ မိဘ ဆွေမျိုးက ၀င်ရောက်စွက်ဖက်တယ် ဆိုတာ ထုံးစံ မရှိခဲ့ဘူး။ ကိုယ်ချစ်ရင် ကိုယ်သဘောမျှရင် လက်တွဲနိုင်တယ်။ မိဘ ဆွေမျိုးက ကိုယ့်နှလုံးသားနဲ့ အသိဥာဏ်နဲ့ပဲ ဆုံးဖြတ်စေခဲ့တယ်။
ကိုယ်တို့ မောင်နှမတတွေ အရွယ်ရောက်လို့ အသီးသီး ကိုယ်ချစ်တဲ့သူတွေ တွေ့ကြတော့ ကိုယ်တို့မှာ အဖေပဲ ရှိတော့တာ။ အဖေကတော့ သမီးက ချစ်ရင် အဖေကလဲ လိုက်ချစ်ရမှာပေါ့ လို့ပဲ ပြောခဲ့တာပါ။ သားသမီးတိုင်းကို မိဘ မေတ္တာအပြည့်နဲ့ ရေးတဲ့ ကဗျာတပုဒ်နဲ့ လက်ဖွဲ့တတ်သူပါ။ ဒါကြောင့်မို့လဲ အဖေ့သူငယ်ချင်း တက္ကသိုလ်မင်းမော်က ကဗျာနဲ့အတူ၊ သမီးလှူသည်၊ နတ်လူသာဓု ခေါ်စေသောဝ် လို့ ကဗျာစပ်ခဲ့တာ။
ကိုယ်သူ့ကို အိမ်နဲ့ ပထမဆုံးအကြိမ် မိတ်ဆက်ပေးခဲ့တုန်းက အဖေက အထဲမှာ။ အဲဒီတုန်းက ကိုယ်လဲ သူ့အိမ်က ထမင်းဖိတ်ကျွေးလို့ သွားစားရင်း သူ့မိဘ၊ အမတွေနဲ့ ဆုံပြီးပြီ။ ကိုယ့်အိမ်ကို တလှည့် မိတ်ဆက်မယ်ဆိုတော့ အမတွေကို ကြိုပြောထားတာမို့ သူတို့ကလဲ ထမင်းစားဖိတ်မယ်လို့ ပြင်ဆင်ကြတယ်။ အမေအစား အမေ့အမ ကိုယ်တို့ ကြီးကြီးတယောက်ကိုလဲ အသိပေးတဲ့အနေနဲ့ အိမ်မှာ ခေါ်ထားတယ်။
ကိုယ်တကယ်ပူတာက ကိုယ်နဲ့ အထက်အောက် တနှစ်ကြီး တနှစ်ငယ် မောင်လေးနဲ့ အဆင်ပြေပါ့မလား ပူတာ တခုပါပဲ။ သူက မကျေနပ်ရင် ၀ူးဝူးဝါးဝါး လုပ်တတ်လို့ပါ။ အဲဒီတုန်းကများ လန့်လိုက်၊ ထိတ်လိုက်တာ။ ဘာမှ မဖြစ်သလို မနည်း ဟန်ဆောင်နေရတယ်။ သူတလှည့် ကိုယ်တလှည့် တယောက်နဲ့ တယောက် အားပေးနေရတယ်။
တကယ် သူ လာတော့ အားလုံး အဆင်ပြေပါတယ်။ ကိုယ်က ဒီလူကို တသက်တာ ရည်ရွယ်ပါတယ်လို့ အသိပေးပြီးပြီပဲ။ ကိုယ်စိုးရိမ်တဲ့ ကိုယ့်မောင်လေးကလဲ ဘာမှ ပူညံပူညံ မလုပ်တဲ့အပြင် သူထမင်းစားတာကို ဘေးကနေ ထိုင်ပြီး စကားတွေ ဖောင်အောင် ပြောလို့။ အဒေါ်ကလဲ အေးအေးချမ်းချမ်း။ အမတွေကလဲ အေးအေးဆေးဆေး။ မကြေမချမ်း သဘောမတူကြတာက ကိုယ့်ကြောင်လေး တွေပါ။ မထင်တဲ့အကွက်က ထ ဖောက်တာပေါ့။
သူလာတဲ့ အချိန် သောင်းကျန်းလိုက်ကြတာ ဗြောင်းကို ဆန်လို့။ သူ့ကို တိုက်တဲ့ ကော်ဖီခွက်လဲ ပြေးလွှားရင်း တိုက်ပစ်လို့ ကျကွဲလို ကွဲ။ သူထမင်းစားနေတုန်း နံဘေးက ကြောင်အိမ်ပေါ်က သကြားပုလင်းကို တွန်းချလိုက်လို့ ပုလင်းကွဲပြီး သကြားတွေ ပြန့်ကြဲ။ တခါမှ ဒီကြောင်တွေ အဲဒီလို မဆော့ဖူးဘူး။ သူတို့ အချစ်ကိုလုမဲ့သူလို့ သိနေသလိုလိုပါ။
အဖေ အပြင်ရောက်တဲ့အချိန်က သူက ရန်ကုန်မှာ မရှိတော့ဘူး။ အလုပ်သွားလုပ်နေပြီ။ အဖေ့ကို သူ့အကြောင်း မပြောရသေးဘူး။ အဲဒီနေ့က အဖေ လွတ်တယ်ဆိုတော့ အိမ်မှာ လူတွေကလဲ မစဲ၊ ဖုန်းလဲ မနားရ နှုတ်ဆက်ကြ၊ ၀မ်းသာကြနဲ့။ ကိုယ်တို့လဲ လာသမျှ မိတ်ဆွေတွေကို ဧည့်ဝတ်ကျေအောင် ကျွေးဖို့ မွေးဖို့ ပြင်ဆင်ကြပေါ့။
အဖေ့ကိုတော့ အေးအေးဆေးဆေးတနေ့မှ ကိုယ့်မှာ ရည်ရွယ်ထားသူ ရှိကြောင်း ပြောမယ်လို့ပဲ။ အမေရှိရင်တော့ အမေကတဆင့် အသိပေးခွင့်တောင်းမိမှာပဲ။ အခုတော့ အဖေ့ကိုပဲ တိုက်ရိုက် မျက်နှာပူပူနဲ့ ပြောရတော့မှာပဲ လို့ ထင်ထားတာ။ ဒါပေမဲ့ အဲဒီလို ကိုယ် မျက်နှာမပူရဘဲ ကံကောင်းသွားခဲ့တာ။
ဘာဖြစ်လို့လဲဆိုတော့ အဲဒီနေ့က အဖေလွတ်လို့ ၀မ်းသာပြီး ဖုန်းတွေ ဆက်ကြတာမှာ ဖုန်းတခုက သူ့အမေရဲ့ ဖုန်းဖြစ်နေခဲ့တာ။ ဆရာကြီး လွတ်တာ ၀မ်းသာပါတယ် လို့ လှမ်းနှုတ်ဆက်လိုက်တာပါ။ အဲဒီတော့ အဖေက ဘယ်သူပါလဲ လို့ မေးတာပေါ့။ အဲဒီတော့ သူ့အမေ မာမားက သူ့သားနဲ့ သမီးမိုးချိုသင်းက သိပ်ခင်ကြပါတယ် တဲ့။
သူ့သားနဲ့ ကိုယ့်သမီး သူငယ်ချင်းဖြစ်ရုံနဲ့ ခုလို မိခင်ဖြစ်သူက တကူးတက ၀မ်းသာကြောင်း နှုတ်ဆက်ပြောတာ တော်ရုံ တန်ရုံ ခင်မင်မှုတော့ ဘယ်ဟုတ်လိမ့်မလဲ လို့ အဖေလဲ ရိပ်မိသွားတော့တာပေါ့။ ဒါနဲ့ အဖေလဲ ကိုယ့် အမအကြီးဆုံးကို မေးမြန်းရင်း အသိပေးပြီးသား ဖြစ်သွားတာပဲလေ။ အဲဒီကတည်းက ယဉ်ကျေး သိမ်မွေ့တဲ့ သူ့မိဘနှစ်ပါးကို ခုချိန်ထိ ကျေးဇူးတင် ချစ်ခင်နေခဲ့ရတာ။
လက်ထပ်တော့မယ် ဆိုတော့ ကိုယ့်အလုပ်က ဆရာဖြစ်တဲ့ ဆရာ ဦးတင်မောင်သန်းက ကိုယ့်ကို ပြောပါတယ်။ ချိုသင်းရေ..နင်တို့က ချစ်လို့ ယူကြတာဆိုပေမဲ့ တယောက် စိတ်သဘောထား တယောက် အသေးစိတ် သိကြတာ မဟုတ်သေးဘူး။ အခုမှ အသေအချာ သိရမှာဆိုတော့ အမြင်မတူတာတွေ ရှိချင် ရှိနိုင်တယ်။ ဒါတွေကို အသေအချာ သိအောင် ၁နှစ်တော့ သည်းခံ တဲ့။ တနှစ်ကြာရင် သူက ဘယ်လို၊ ဘာကြိုက်တယ်-မကြိုက်ဘူး၊ ကိုယ်က သူနဲ့ ဘာမတူဘူး စသဖြင့် အကုန် သိသလောက် ဖြစ်ပြီ တဲ့။ အဲဒီအခါ နားလည်မှုရအောင် ညှိယူပေတော့ တဲ့။ ဒါဆို ပျော်ရလိမ့်မယ် တဲ့။
ကိုယ်လဲ ကိုယ့်ဆရာပြောလို့သာ နားထောင်လိုက်တာ။ ကိုယ်တို့ချင်း သိပြီး နားလည်ပြီးသား၊ နောက် ချစ်လဲ ချစ်ပြီးသားမို့ ဘာသည်းခံစရာ လိုမလဲ ထင်တာပေါ့။ ဘယ်ဟုတ်လိမ့်မလဲ။ နှစ်ယောက်အတူတူနေရတော့မှ မတူ ကွဲလွဲတာတွေ တပုံကြီး။ တကယ့် လက်တွေ့မှာ ကိုယ့်ကို မကြိုက်တာတွေလဲ ပေါ်၊ သူ့ကို မကြိုက်တဲ့အချက်တွေလဲ သိ ဆိုတော့ တဂျိမ်းဂျိမ်းပဲ။
နှစ်ယောက်စလုံးက မိသားစုထဲမှာ အငယ်တွေ။ သူက ဒုန်းဆို ကိုယ်က ဒိုင်း။ အရင်ကတော့ ကျောင်းသွား၊ကျောင်းပြန် ကြိုပို့ လုပ်တာလောက် သိတာကိုး။ အဲဒီတုန်းကတော့ သူမကြိုက်တာလဲ ကိုယ်မပြော၊ ကိုယ်မကြိုက်တာလဲ သူမလုပ် ကိုး။ အခုတော့ ၂၄နာရီအတူနေရတော့ သိရပြီ။ အဲဒီ transition time တနှစ်လောက်က အတော်ညှိလိုက်ရတယ်။ ဒါတောင် ချစ်လို့ ယူကြတဲ့ အတွဲနော်။ မချစ်သာ မချစ်ရင် ဘယ်လိုနေကြမယ် မသိ။
အဖေ ဆုံးမတာကတော့ တမျိုးပါ။ ဇနီး ခင်ပွန်းဆိုတာ ကိုယ်နဲ့ အရင်းနှီးဆုံးပဲ တဲ့။ အပြင်လူနဲ့ဆိုရင် ကိုယ်က သဘောကောင်း လိုက်လျော ဟန်ဆောင်နေလို့ ရချင်ရတတ်ပေမဲ့ အိမ်မှာတော့ ကိုယ့်စိတ်သဘောထား အမှန်၊ ကိုယ့်အားနည်းချက်၊ ကိုယ့် လိုအပ်ချက်ကို အရင်းနှီးဆုံး ကိုယ့် အိမ်ထောင်ဖက်က အသိဆုံးပဲ တဲ့။
အဲဒီအခါ ကိုယ့်ကို သိလေ ချဉ်လေ မဖြစ်ရအောင် အနီးဆုံးလူက ကိုယ့်ကို လေးစားအောင် နေတတ်ပါစေ ငါ့သမီး တဲ့။ အချင်းချင်းတွေမို့ လေးစားဖို့ မလိုအပ်ဘူးလို့ မထင်ပါနဲ့ တဲ့။ ကိုယ့် အနီးဆုံးလူက ကိုယ့်ကို ချစ်လဲ ချစ်မြတ်နိုး၊ လေးလဲ လေးစားရင် သမီးတို့ အိမ်ထောင်ရေး သာယာပါလိမ့်မယ် တဲ့။
ကိုယ့်အမေဆုံးတော့ အမေ့ကို မြေမချမီ အဖေ့ထက် ၃နှစ်ငယ်ပေမဲ့လည်း အမေ့ မေတ္တာတရားကို ကျေးဇူးတင် လေးစားလို့ အဲဒီဂုဏ်ကို ကန်တော့ခဲ့တာ လို့ အဖေက ရှင်းပြဖူးပါတယ်။
ကိုယ်လဲ perfect မဟုတ်တာတော့ သေချာပါတယ်။ ဒါကြောင့် အားနည်းချက်တွေ လိုအပ်ချက်တွေ များလှတယ်။ ဒါကြောင့်မို့ တခါတလေ စိတ်လိုက်မာန်ပါ ဖြစ်ရင် အဲဒီဆုံးမစကားလေးတွေကို ကြားယောင်ပြီး ကိုယ့်စိတ်ကိုယ် ချွန်းပြန်အုပ်ရတတ်တယ်။ မကောင်းတဲ့ အပြုအမူဆိုလဲ အမြဲသတိထားပြီး မလုပ်မိအောင် ရှောင်ရတယ်။ နောက်ပြီး ကိုယ်က ပျော်ပျော်ရွှင်ရွှင်သာ နေချင်သူမို့ စိတ်ဆိုး စိတ်ကောက်ပြီး ကုန်သွားရတဲ့ အချိန်တွေကို နှမြောလို့။
ဒီလိုနဲ့ ကိုယ်လဲ အိမ်ထောင်ပြုဖို့ စဉ်းစားနေတဲ့ ညီမလေးကို ကိုယ့်အတွေ့အကြုံနဲ့ ယှဉ်ပြီး ရှင်းပြ ပြောပြလိုက်တာ သူလဲ ဘယ်လို သဘောပေါက်သွားတယ်မသိဘူး။ တော်ပါပြီ မယူတော့ပါဘူး မမရယ်၊ တယောက်တည်းပဲ ကောင်းပါတယ် တဲ့။
အော်....ကိုယ့် ထုံးစံအတိုင်း ခုတ်ရာ တခြား၊ ရှရာ တလွဲ ဖြစ်ပြန်ပြီ ထင်ပါရဲ့လေ။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
ဒီဇင်ဘာရောက်ပြီဆိုတော့ လူတွေကို ကြည့်ရတာ ဆောင်းအအေးဓာတ်နဲ့အတူ လှုပ်လှုပ်ရှားရှား သွားသွားလာလာ နဲ့မို့ ဒီရာသီနဲ့ဒီမြင်ကွင်းတွေက ဒီဇင်ဘာရဲ့ ပုံရိပ်တွေလို ဖြစ်နေတယ်။
ပထမဆုံး ဒီဇင်ဘာရောက်ပြီလို့ သတိထားမိတာက ၁ရက်နေ့ ကစလို့ တချို့အိမ်တွေမှာ မီးအလှဆင်ကြတာကိုပါ။ ကိုယ်တို့ မြို့နယ်လေးမှာတော့ အိမ်တော်တော်များများ ဒီဇင်ဘာ ၁ရက် ဆို Sweet December ဆိုပြီး စ မီးထွန်းကြပြီ။ တလလုံး ထွန်းတဲ့အပြင် နှစ်ကူးပြီး ၁ပတ်လောက်ကြာမှ ပြန်သိမ်းတာ သတိထားမိတယ်။
အိမ်ရှေ့က မြက်ခင်းမှာ နှင်းလူရုပ်ကြီးတွေ၊ သမင်လေးတွေ၊ ရောင်စုံ မီးလုံး၊ မီးသီး၊ မီးတန်းလေးတွေ၊ ခရစ်စမတ် ဘိုးဘိုးကြီး အရုပ်တွေနဲ့ အလှဆင်ကြတာ တွေ့ရတယ်။ အိမ်ထဲမှာတော့ ခရစ်စမတ် သစ်ပင်ကြီးပေါ့။ ကိုယ်တို့လဲ အဲဒါမျိုးတွေ တွေ့ရင် ပျော်ပြီး ကားလေးနဲ့ပတ်ပြီး လိုက်ကြည့်ကြတယ်။
အဖေရှိတုန်းကတော့ အဖေက အဲဒီလို အလှအပလေးတွေကို ကြည်နူးတယ်။ ကိုယ်တို့ ၃ယောက် တလမ်းဝင် တလမ်းထွက် လိုက်ကြည့်ကြတာပဲ။ ဟိုမှာ ကြည့်ပါအုံး သမီးရေ၊ အရုပ်ကလေးက လှုပ်လို့ပါလား တဲ့။ သိပ်လှတဲ့ လမ်းဆို ကားပေါ်က ဆင်းပြီး လမ်းလျှောက်လိုက်သေးတယ်။ ဒါနဲ့ အဲဒီနှစ်ကတော့ ကိုယ်တို့လဲ Home Depot ကနေ မီးကြိုးလေးတွေ သွားဝယ်ပြီး အိမ်ပတ်ပတ်လည်ကို နှစ်သစ်ကို ကြိုတဲ့အနေနဲ့ ထွန်းလိုက်ကြတယ်။
အိမ်ကို တံစက်မြိတ်တလျောက် ပတ်ပြီး ထွန်းရတာမို့ ကြိုး အရှည်ကို မခန့်မှန်းတတ်ပြန်ဘူး။ ဒါနဲ့ ကြိုးလေးက အိမ်ဘေးမှာ အဆုံးထိ မရောက်ဘဲ တွဲလောင်းလေး ကျနေတော့ အဖေက အဲဒါ ပန်းကုံးလေးပေါ့ သမီး တဲ့။ ကပိုကရိုနဲ့ ချစ်စရာကောင်းလိုက်တာ တဲ့။ ဒီအတိုင်းပဲ ကျနေပါစေ တဲ့။ တကယ်က မီးကြိုး တိုသွားလို့ တွဲလောင်းကျရတာလေ။
နောက်ထပ် ဒီဇင်ဘာရဲ့ ပုံရိပ်တခုကတော့ Shopping Mall တွေက အပြိုင်အဆိုင် ဈေးလျှော့ကြတာပါ။ ဈေးလျှော့တဲ့ ကူပွန်တွေကလဲ ဟိုက ဒီက ပို့လိုက်ကြတာမို့ တနေ့ တနေ့ အိမ်က စာတိုက်ပုံးဖွင့်ရင် ကြော်ငြာတွေချည်း။ လက်ဆောင်ပေးတဲ့ ရာသီလဲ ဖြစ်ပြန်တာမို့ လက်ဆောင်ပေးချင်ရင် ဈေးချိုချိုနဲ့ ပစ္စည်းကောင်းရနိုင်တဲ့ အချိန်အခါပေါ့။
အဲဒီမှာ မိန်းမပီပီ ဘယ်အချိန် ဈေးဝယ်သင့်တယ်၊ ဘယ်နေရာမှာ ပိုသက်သာပြီး ပစ္စည်းပိုကောင်းတယ် စသဖြင့် သူငယ်ချင်း အချင်းချင်း လက်တို့ကြတယ်။ ကိုယ်ကတော့ bargain shopper ပါ။ ဈေးကြီးတာလဲ မ၀ယ်နိုင်တော့ ဈေးသင့်တင့်ပြီး ပစ္စည်းကြိုက်ရင် ၀ယ်မိတယ်။
အဲဒီမှာ နဂိုက ဈေးချရတဲ့အထဲ အမြဲဝယ်နေကျ ဖောက်သည်တွေကို တနှစ်လုံး ၀ယ်ထားတဲ့ ပမာဏကိုလိုက်လို့ Discount coupon တွေ ပေးတတ်တယ်။ အဲဒါအပြင် ရာခိုင်နှုန်းနဲ့ လိုက်ပြီး ဈေးထပ်လျှော့ပေးသေးတယ်။ ဘယ်လိုပဲ ဈေးလျှော့လျှော့ ကိုယ်က သဘောကျပေမဲ့ rebate တွေကိုတော့ လုံးလုံး မကြိုက်ဘူး။
Mail in rebate ဆိုတာကို ဒီရောက်မှ ကိုယ်စ ကြားဖူးတာ။ သူက ဘယ်လိုလဲဆိုတော့ ပစ္စည်းတခုက ၁၀၀ တန်တယ်ဆိုပါတော့၊ ဒါပေမဲ့ ၉ကျပ် ၉၉ပြားပဲ ပေးရမယ် တဲ့။ ဒါပေမဲ့ အခု ၁၀၀ အရင် ပေးထားရမယ်၊ ပြီးရင် သူတို့ဖြတ်ညှပ်ခိုင်းတဲ့ ဈေးနှုန်းလေဘယ်လ်လေးကို စာတိုက်ကနေ ပြန်ပို့ပေးမှ သူတို့က ၁၀၀ထဲက ၉ကျပ်၉၉ပြားနှုတ်ပြီး ကျန်ငွေကို check နဲ့ မေ့လောက်တဲ့အချိန်လောက်မှ ပြန်ပို့ပေးတယ်။ ပိုက်ဆံ လှည့်သုံးတဲ့သဘောနေမှာပေါ့။
ကိုယ်ကတော့ အဲဒါမျိုး ကွေ့ဝိုက်နေတာ လုံးလုံး မကြိုက်ဘူး။ လျှော့ချင်လျှော့၊ မလျှော့ချင်နေ။ ဟိုလိုလို ဒီလိုလိုတော့ မလုပ်နဲ့ ပဲ။ ပြီးရင် လူက မေ့လို့ သူတို့ဖြတ်ပိုင်း စာမထည့်မိတာနဲ့၊ ဟိုဟာလိုလို့ မပေးရတာနဲ့၊ ဒီဟာမပြည့်စုံလို့ ဆုံးရတာနဲ့။ ကိုယ်လဲ တခါမှ ပြည့်ပြည့်၀၀ ပြန်မရဖူးဘူး။ သူတို့ ပြောတဲ့ rebate စည်းကမ်းတွေဆိုတာလဲ စာလုံးသေးသေးလေးတွေနဲ့ သူများ မမြင်အောင် ရေးထားတာ။ တခုခု လိုရင် မရတော့ပြန်ဘူး။
ဒါကြောင့် ကိုယ်က rebate ဆိုတဲ့ စာလုံးပါရင် ဘယ်လောက် ဈေးချိုချို မ၀ယ်တော့ဘူး။ သူက ဘာနဲ့တူသလဲဆိုတော့ ကိုယ်တို့ ရွှေပြည်ကြီးက လူကြီးမင်းများလိုပဲ။ ပြန်ပေးမယ်၊ ပြန်ပေးမယ်ဆိုပြီး ဟိုဟာလုပ်ရအုံးမှာလိုလို၊ ဒီဟာပဲ လုပ်ဖို့ လိုနေသေးသလိုလို၊ တခုမဟုတ် တခုနဲ့ ငြိနေတော့ကာ နောက်ဆုံးလဲကျရော ဝေလေလေ ဖြစ်ပြီး မောင်ပိုင်စီးသွားပါလေရော။ ကိုယ်ကတော့ ဒါမျိုးတွေ ရိုး…နေပြီမို့ rebate ဆိုတာနဲ့ ပြေးပြီ။
အလုပ်မှာလဲ ခရစ်စမတ်မတိုင်ခင် ခရစ်စမတ်ပါတီဆိုပြီး လက်ဆောင်ပစ္စည်းချင်း လဲကြ၊ အလုပ်က လက်ဆောင်တွေပေးနဲ့မို့ ပျော်စရာကောင်းပါသေးတယ်။ မနှစ်ကတော့ ကိုယ်တို့အလုပ်မှာ အများမြင်တဲ့ ကြော်ငြာနံရံမှာ ကိုယ်လိုချင်တဲ့ ပစ္စည်းကို ကိုယ့်နံမည်ဘေးမှာ သွားရေးထားရတယ်။ Wish List လို့ ခေါ်တယ်။ ကိုယ်သာ လက်ဆောင်ရမယ် ဆိုရင် ဘာလိုချင်ပါတယ်ပေါ့။
ပြီးတော့ ကိုယ်လက်ဆောင်လဲမဲ့သူကို မဲနှိုက်လို့ တိတ်တိတ်လေး ကြိုသိထားတယ်၊ ဒါဆို သူဘာလိုချင်ပါလိမ့်လို့ wish list မှာ လာကြည့်ထားရတယ်လေ။ ဒါမှ သူလိုချင်တာ ကိုယ်ပေးတော့ အလဟာသ မဖြစ်ဘူးပေါ့။ လက်ဆောင်ဆိုပေမဲ့လဲ မလိုချင်တာရပြီး အပိုဖြစ်မနေဘူးပေါ့။ အတော်လက်တွေ့ကျတယ် ပြောရမယ်။ ဘာလေးများပါလိမ့်ဆိုပြီး အံ့သြ၀မ်းသာတဲ့ ခံစားမှုတော့ မရဘူးပေါ့လေ။
အဲဒီ့ wish list ဖတ်ရတာလဲ စိတ်ဝင်စားစရာပါ။ ချစ်စရာလေးတွေ။ ဘယ်သူမှ ကြီးကြီးမားမား မရေးကြပါဘူး။ ဦးထုပ် တဲ့၊ ဘောလုံး တဲ့၊ ရုပ်ရှင် လက်မှတ်တဲ့၊ gift card တဲ့။ တချို့ကျတော့လဲ ကောင်မလေး ချောချော တဲ့။ တကီလာ အရက် တဲ့။ တယောက်ကတော့ ရေးတယ်၊ ဘာပဲဖြစ်ဖြစ်ပါ တဲ့၊ ငါ့ကိုတော့ အံ့သြအောင်လုပ် တဲ့။ ကိုယ်ကတော့ အဲဒါတွေဖတ်ပြီး ပိုက်ဆံတွေ အများကြီး ရှိချင်တာ။ သူတို့လိုချင်တာတွေ အားလုံးကို လက်ဆောင်ပေးလိုက်ချင်လို့ပါ။ လုပ်ဖော်ကိုင်ဖက် သူငယ်ချင်းတွေ မဟုတ်လား။
နှစ်သစ်ကူးတဲ့ည ဆိုရင်တော့ ကိုယ်က မြန်မာပြည်မှာ နေခဲ့တဲ့ အချိန်တွေကို အရမ်းလွမ်းသွားတတ်တယ်။ အဲဒီညဆို အမေက မုန့်တမျိုးမျိုးလုပ်၊ ကော်ဖီပူပူလေး သောက်ပြီး မြန်မာ့အသံက လွှင့်တဲ့သီချင်းတွေ၊ ဟာသတွေ ထိုင်ကြည့်ရင်း စောင့်ကြတာ။ ည ၁၂နာရီထိုးတာနဲ့ အဖေနဲ့အမေက ဘုရားစာတွေ၊ မေတ္တာသုတ်တွေ ရွတ်တတ်တယ်။ ကိုယ်တို့ကတော့ ဖုန်းတွေလာရင် Happy New Year ဆိုပြီး နှုတ်ဆက်ကြတာပေါ့။
အဲဒီညဆိုရင် ခရစ်ယန်ဘုရားသီချင်းတွေကို အဖေ့မိတ်ဆွေတွေက အိမ်မှာ လာဆို တတ်သေးတယ်။ စာရေးဆရာ ဦးငြိမ်းကျော်တို့ အဖွဲ့၊ စာရေးဆရာ ဦးမင်းသစ်တို့ အဖွဲ့ စသဖြင့်ပေါ့။ ပျော်စရာကြီး။ ဆရာဦးငြိမ်းကျော်ဆို သူလဲ ဗုဒ္ဓဘာသာဆိုပေမဲ့ ပျော်လို့ အဲဒီအဖွဲ့တွေနဲ့ လိုက်နေတာ တညလုံးပဲ တဲ့။ ဆရာ ဦးမင်းသစ် အမျိုးသမီးက အံတီ ရှယ်လီ တဲ့။ အရင်က အဆိုတော်။ အသံသိပ်ကောင်းတယ်။ တနှစ်မှာ We are the World ကို အိမ်မှာ သူဆိုတာ မှတ်မိနေတယ်။
ဒီရောက်ပြီး လွန်ခဲ့တဲ့ တနှစ်ကျော်ကတော့ ကိုယ်တို့အိမ်မှာ ကိုယ်တို့ သားအဖ ၃ယောက် ဟော့ပေါ့ လုပ်စားရင်း နှစ်ကူး စောင့်ကြတယ်။ ကိုယ်က ထမင်းလေးကြော်၊ ရာသီဥတု အေးအေးလေးမှာ ဟော့ပေါ့ နဲ့ ၀ိုင်တခွက် နဲ့။ အဖေက ကိုယ်လုပ်တဲ့ ဟော့ပေါ့ကို ကြိုက်လွန်းလို့။ တဖွဖွ ပြောမဆုံးဘူး။ အပြင်ဆိုင်တွေမှာ ဘယ်ဒီလိုကောင်းမလဲ သမီး တဲ့။
တကယ်က ကိုယ်ကလဲ သိလို့ လုပ်တတ်လို့ မဟုတ်ဘူး။ ကြားဖူးနားဝနဲ့ ပင်လယ်စာ အစုံဝယ်ပြီး ကြက်ပေါင်းရည်ထဲ ပြွတ်သိပ် ထည့်လိုက်တာပဲ။ ချိုပြီး ကောင်းသွားတာပေါ့လေ။ အဖေကတော့ ကိုယ့်လိုပဲ ချိုရင် ကြိုက်တာပဲကိုး။ ပြီးတော့ ၀ိုင်လေး တခွက်ဝင်သွားတာနဲ့ မူးပြီး အိပ်ပျော်သွားလို့ ၁၂နာရီ ထိုးခါနီးမှာ အဖေကြီးရေ ထ ထ၊ နှစ်သစ်ကို ကြိုပါအုံး ပြောရတယ်။ အဲဒီတော့လဲ ထပြီး တကုန်းကုန်းနဲ့ ကဗျာရေးနေပြန်ရော။
ဒီလိုပဲ ဟိုတွေး ဒီတွေးနဲ့ နောက်တနှစ်တောင် ကူးတော့မယ်။ အသက်လဲ တနှစ်ကြီးပြန်အုံးမယ်။ ဘာတွေ ရင်ဆိုင်ရပြီး၊ ဘာတွေ ပျော်ရွှင်ရအုံးမလဲ ကိုယ်သိချင်မိတယ်။ အဲဒီလို လိမ့်တခါ လူးတလှည့်၊ ပျော်တလှည့် မော်တလှည့် ဘ၀ကြီးကိုပဲ ကိုယ့်မှာ တွယ်တာပြီး ချစ်ခင်နေမိတော့တယ်။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
ကိုယ့်ဘ၀မှာ ကိုယ်မွေးကတည်းက နှစ်ဖက်မိဘရဲ့ မိဘ၊ ကိုယ့်အတွက် အဖိုးအဖွားတွေဆိုတာ မရှိခဲ့ဘူး။ နှစ်ဖက်စလုံး ကိုယ်မွေးချိန်မှာ ဆုံးပါး ကွယ်လွန် ကုန်ကြပြီ။ ဒါကြောင့်လား မသိဘူး။ ကိုယ်က သက်ကြီး ၀ါကြီး လူကြီးအဆုံးအမ မခံခဲ့ရတော့ ဗိုင်းကောင်းကျောက်ဖိ မဖြစ်ခဲ့ဘူး ထင်ပါရဲ့။
ဒါပေမဲ့ အဖိုးအဖွား အရွယ်တွေဆို ချစ်ခင် မိနေတာတော့ အမှန်ပဲ။ ငယ်ငယ်ကဆိုရင် ဘဘ လူထု ဦးလှ (အဖေ့အခေါ် ဦးလေးလှ) ဆီ အဖေက အမြဲတမ်း စာတွေ ရေးခိုင်းတယ်။ လူကို အပြင်မှာ တခါမှ မမြင်ဖူးပေမဲ့ စိတ်ထဲမှာ ရင်းနှီးပြီးနေတယ်။ ပုံပြင်စာအုပ်လေးတွေ ပို့ပေးရင် သဘောကျလိုက်တာ။ ကိုယ့်ကို အရေးတယူ လုပ်တယ်ဆိုပြီးတော့လေ။
ဒါကြောင့် ဆွေမျိုး မတော်စပ်ပေမဲ့ ကိုယ့်မိဘက အလေးအနက်ထားတဲ့ လူကြီးတွေဆို ကိုယ့်အဖိုးအဖွားတွေလို စိတ်ထဲမှာ ဖြစ်နေမိတာပေါ့။ ဘဘမင်းသုဝဏ်၊ ဘဘဇော်ဂျီ၊ ဘဘဦးခင်မောင်လတ်၊ ဘဘဦးသုခ စသဖြင့်ပေါ့။ အဖွားအရွယ်ဆို အမေလူထု ဒေါ်အမာ ပေါ့။ အဖိုးအဖွားအရင်းမှ မတွေ့ဖူးလိုက်ဘဲကိုး။ သူတို့ကိုဆို မြင်တာနဲ့ ဘယ်လိုနေနေ စိတ်ထဲမှာ ရင်းနှီး ချစ်ခင်နေတယ်။
အဖေကတော့ ကိုယ့်ကို အဖေ့ဖက်က အဖွားနဲ့တူတယ် လို့ တခါတရံ ပြောတတ်တယ်။ အဖွားလို ခပ်အေးအေးနဲ့ လုပ်စရာရှိတာ ငြိမ်ငြိမ်သက်သက် လုပ်မှန်းမသိရအောင် လုပ်နေတတ်လို့ တဲ့။ အဲဒီလို ပြောပြီးကတည်းက ကိုယ်လဲ အရင်က အေးအေးဆေးဆေး လုပ်တတ်သလောက် တခါတည်း ပြောင်းပြန် ဖြစ်သွားတော့တာပဲလေ။
ဘာဖြစ်သွားတယ် မသိဘူး။ လုပ်စရာရှိရင် တယောက်တည်း ဆူညံ ပွက်လောကို ရိုက်လို့။ လောလော လောလောနဲ့ အဖေ့ရှေ့မှာ ဟိုဖက်ပြေးလိုက် ဒီဖက်ပြေးလိုက် လုပ်နေလို့ အဖေလဲ ငါပြောမိတာ မှားပြီလို့ ထင်ပြီး ဘာမှကို ထပ်မပြောတော့ဘူး။ ဆေးလိပ်ချည်း ဖိသောက်နေတော့တာ။ ငါ့သမီးနှယ် ဘယ့်နှယ် ဖြစ်သွားပါလိမ့် ထင်မှာပဲ။
သူငယ်ချင်းတွေမှာ အဖိုးအဖွားရှိရင်လဲ သဘောကျတယ်။ သူငယ်ချင်း အိမ်တွေ သွားလည်ရင် ဒါက ငါတို့ အဖိုးပေါ့၊ ဒါက ငါတို့ အဖွားပေါ့ ဆိုရင် ကိုယ်က ကိုယ့်အဖိုးအဖွားတွေ့ရသလို ကျေနပ်လို့။ ပြန်ပြီဆိုရင် တကူးတက နှုတ်ဆက်ပြီးမှ ပြန်ရတာ။ လူကြီးခမျာ နားချင်လို့ အိပ်ခန်းထဲ ၀င်အိပ်နေလဲ အလိုက်ကန်းဆိုးမသိ ၀င်နှုတ်ဆက်တတ်သေးတာ။
ဒီလိုနဲ့ ကိုယ်အိမ်ထောင်ကျပြီး စင်ကာပူလိုက်သွားတော့ ကိုယ်တို့ဆီကို ရုပ်ရှင် ဒါရိုက်တာကြီး ဘဘဦးသုခ နဲ့ ကြီးကြီး ဒေါ်ကြင်မေတို့ လာနေလို့ ၄လ ကျော် အတူနေခဲ့ရတယ်။ ကြီးကြီးက အဖွားအရွယ်လောက် မကြီးသေးလို့ ကိုယ်က ကြီးကြီးလို့ပဲ ခေါ်တယ်။
ကြီးကြီးက ဟင်းချက်ကောင်းတယ်။ ဘဘကို ပြုစုတာ တကယ့် အိမ်ထောင်ရှင်မကောင်း ပီသရှာတယ်။ ဘဘကို ချက်ကျွေးတာများ ဟင်းတွေဆိုတာ စုံလို့၊ အမြဲ အရိပ်ကြည့် နေတတ်တာ။ ဘဘကတော့ မျက်စိ သိပ်မမြင်ပေမဲ့ တနေ့လုံး တီဗီကြည့်တာပဲ။ သိပ် ၀ါသနာကြီးတယ်။ တီဗီနဲ့ တပေလောက်ပဲ ခွာပြီး ထိုင်ခုံရှေ့တိုးပြီး တနေ့လုံး တကားပြီး တကားကြည့်တော့တာပဲ။
ကိုယ်ကတော့ လူကြီးတွေနဲ့ နေရပြီဆိုပြီး ပျော်နေတာ။ ကြီးကြီးက အရမ်းခင်ဖို့ ကောင်းတာ။ ပျော်ပျော်နေတတ်တာ ကိုယ်နဲ့ အကိုက်ပဲ။ ကိုယ်တို့ မီးဖိုချောင်မှာ ဟင်းချက်နေပြီဆိုရင် တ၀ါးဝါးတဟားဟားပဲ။ ကြီးကြီးက ဟာသဥာဏ်ရွှင်တာကိုး။ ဘဘက အတည်ပေါက်လုပ်သမျှ ကြီးကြီးက ရီစရာလုပ်ပစ်တော့ ကိုယ်တို့လဲ တချိန်လုံး ရီနေရတာပေါ့။
ညနေဆိုရင် လမ်းလျှောက်၊ ပြန်လာလို့ ထမင်းစားပြီးရင် ရုပ်ရှင်ကြည့်ကြတယ်။ အဲဒီအချိန်ဆို ကိုယ်က ရုပ်ရှင်တွေကို ဘာသာပြန်ပြီး ဘဘတို့ ကြီးကြီးတို့ကို ပြောပြနေတာ။ တကယ်က တတ်လို့ မဟုတ်ဘူး။ ကိုယ်ကိုယ်က အဲဒီလိုပြောရတာ ၀ါသနာပါနေလို့။ ဘဘတို့လဲ နားလည်တာပါပဲ။ ဒါပေမဲ့ ကိုယ်က ရုပ်ရှင်မှာ ဇာတ်ကောင်က ပြောတာက နည်းနည်း ကိုယ်ဖြည့်ပြောတာက များများ။
တခါတလေ ပြောပြရင်း ကိုယ်က မျက်ရည်တွေကျပြီး ငိုလို့။ အဲဒီလို တဲ့-ဘဘရဲ့ ဆိုပြီး နှပ်တွေဘာတွေ ညှစ်လိုက်သေးတာ။ ဘဘက ခေါင်းတညိတ်ညိတ်နဲ့။ သူက ကိုယ့်ထက်တောင် အရှည်အဝေးကြီး တွေးပြီး ခံစားပစ်လိုက်တာ။ ဇာတ်ကားကောင်းပြီဆို တနုံ့နုံ့နဲ့ စမြုံ့ ပြန်လို့ မပြီးဘူး။
အက်ရှင်ကားဆိုရင် ကိုယ်ကလဲ ဘေးကနေ တကယ့် အက်ရှင်။ ဒုက္ခပါပဲ ဘဘရေ၊ ဟိုမှာ လူဆိုးတွေ လာကုန်ပြီ၊ မိတော့မယ် မိတော့မယ် နဲ့ လူကြီး စိတ်လှုပ်ရှားအောင် လုပ်သေးတယ်။ ဘဘကလဲ အသည်းယားပြီး တီဗီရှေ့ တိုးရင်းတိုးရင်း နဲ့ တီဗီထဲတောင် ၀င်တော့မှာ။ ကိုယ်လုပ်ပုံကလေ။
ဘဘကတော့ ရုပ်ရှင် ရိုက်ပြီဆိုရင် မျက်စိမမြင်တော့ အသံကို နားထောင်ပြီး သရုပ်ဆောင်တာကို ရိုက်တယ် တဲ့။ အသံမကြိုက်မချင်း အထပ်ထပ် ပြန်လုပ်ခိုင်းတာ တဲ့။ ကိုယ်ကလဲ ဘယ်မင်းသား၊ မင်းသမီးကို ရိုက်ရတာ သဘောအကျဆုံးလဲ မေးတာပေါ့။ ရဟန်းစားသော ဆွမ်းတနပ် ရိုက်ဖြစ်တဲ့ အကြောင်း ရောပေါ့။ ကိုယ်က စကားက ခပ်များများ ဆိုတော့လေ။ ဒါက ကိုယ်နဲ့ အတူနေလိုက်ဖူးတဲ့ အဖိုးအကြောင်းပဲ ဆိုပါတော့။
ကိုယ့်အမျိုးသားကတော့ ကံကောင်းတယ်။ သူက သူကြီးတဲ့အချိန်ထိ နှစ်ဖက် အဖိုးအဖွား ရှိသေးတယ်။ ကိုယ်နဲ့တော့ မဆုံဖူးလိုက်ပါဘူး။ ကိုယ်နဲ့ ချစ်သူဖြစ်တော့ နှစ်ကူးမှာ သူက သူ့အဖိုးကို “အဖိုး၊ ကျနော့်မှာ ချစ်သူ ရှိနေပြီ”လို့ ပြောလိုက်လို့ ကိုယ့်အတွက် အန်ပေါင်း ၇၅ ကျပ် ပေးလိုက်တာ ရဖူးတယ်။ သူ့မြေးလေးရဲ့ ချစ်သူဆိုတာကို မမြင်ဖူးသေးပေမဲ့ အသိအမှတ်ပြုမှုလေး တခုလို့ ဆိုရမှာပေါ့။ အဲဒီခေတ်က ၇၅ကျပ်ဆိုတာ တော်တော်များတာ။
သူကလဲ သူ့အဖေဖက်က အဖွားက ကိုယ်နဲ့ တော်တော်တူတယ် လို့ ဆိုပြန်တယ်။ ကိုယ်ကလဲ ဘာများတူပါလိမ့်ဆိုပြီး ပြုံးနားထောင်တာပေါ့။ ဆိုးတာ တူတာ တဲ့။ လာပဟ လို့ စိတ်ထဲက ဖြစ်မိသေး။ သူ့အဖိုးကို အဖွားက တော်တော်ဆိုးတာ တဲ့။ (စောင်းချိတ်ပြီးတော့ တော့ ပြောနေပါပြီလေ) ဒါနဲ့ ဥပမာ ပြောစမ်းပါအုံး ဆိုတော့ သူက အဖြစ်အပျက်တခုကို ပြောပါတယ်။
တခါက သူနဲ့ သူ့အဖိုးနဲ့ နှစ်ယောက်သား ကျိုက်ထီးရိုး တက်ကြတာ တဲ့။ အဖိုးက အသက် ၇၀ကျော်ပေမဲ့ သန်သန်စွမ်းစွမ်း ပိန်ပိန်ပါးပါး၊ သဘောကောင်းကောင်း တဲ့။ ဒါနဲ့ ကျိုက်ထီးရိုး တောင်ခြေမှာ တောင်ဝှေး ၀ယ်မယ် ထင်တာ အဖိုးက မ၀ယ်ဘဲ ဒီအတိုင်း လက်ချည်း တောင်ပေါ်တက်တယ်။ သူကလဲ အဖိုးတောင် တောင်ဝှေး နဲ့ မတက်တာ သူလဲ ဘာလို့ ၀ယ်မလဲ ဆိုပြီး မ၀ယ်ဘဲ တက်ကြတယ် တဲ့။
ဒါနဲ့ ဘုရားဖူးပြီးလို့ တောင်အောက် ဆင်းတော့မှ အဖိုးက တောင်ဝှေးဝယ်တယ်။ ဘာဖြစ်လို့လဲ ဆိုတော့ အဖွားက မှာလိုက်လို့။ အတက် ကတည်းက ၀ယ်သွားရင် ထောက်ပြီးတက်တော့ တောင်ဝှေးပွန်းပြီး မလှမှာစိုးလို့။ ပြီးတော့ မုဒုံ ခဏ၀င်ပြီး ဘတ်စ်ကားနဲ့ ရန်ကုန်ပြန်လာကြတာ အဖိုးက တောင်ဝှေးကို တချိန်လုံး ဂရုတစိုက်နဲ့ပေါ့။ ဒတ်ဆန်းကားရဲ့ အမိုးပေါ်မှာ ထားထားရတာ၊ လူထိုးမိမှာစိုးလို့။
ရန်ကုန်ရောက်တော့ ဆင်းရမဲ့နေရာမှာ ကားကမရပ်ဘဲ ကျော်ပြီး ရပ်မိတာမို့ စပယ်ယာက မြန်မြန်ဆင်းခိုင်းတော့ တောင်ဝှေး မပါဘဲ ဆင်းမိရော။ ကားထွက်မှ သတိရတော့ ကားက သွားပြီ။ အဖိုးလဲ မျက်နှာညှိုးပြီး နေတာ၊ စိတ်ဆင်းရဲလွန်းလို့ တဲ့။
အိမ်ရောက်တော့ တောင်ဝှေးမပါလာတာ သိတော့ အဖွားက မကြည်ဘူး။ အဖိုးကို စိတ်ကောက်ပြီး စကား မပြောဘူး။ အဖိုးက ချော့တယ်၊ ရှင်းပြတယ်။ အဖွားက ဘာစကားမှ ပြန်မပြောဘူး တဲ့။ ဒါနဲ့ အဖိုးလဲ အကြံထုတ်ပြီး စဉ်းစားရှာတာ နောက်ဆုံးတော့ သူ မုဒုံက အဖွားအတွက် ၀ယ်လာတဲ့ ရောင်စုံ ကြယ်သီးလေးတွေ သွားသတိရတယ်။
ဒါနဲ့ အဖိုးက “စိတ်မဆိုးပါနဲ့ကွယ်၊ မင်းအတွက် မင်းသဘောကျမဲ့ ရောင်စုံ ကြယ်သီးလေးတွေ ပါလာပါတယ်” ဆိုပြီး အဖွားကို ပေးလိုက်တယ် တဲ့။ အဖွားလဲ ကြယ်သီးလေးတွေဆိုတော့ သဘောကျတယ်လေ၊ ဒါနဲ့ ဘယ်လိုဟာလေးလဲ ဆိုပြီး မျက်လုံးစွေပြီး ကြည့်လိုက်တာ တခါတည်း မထိန်းနိုင်ဘဲ ရီမိပါလေရော။
ဘာဖြစ်လို့လဲဆိုတော့ အဲဒီကြယ်သီးက သူတို့ တအိမ်ကျော်က လုပ်တဲ့ ကြယ်သီးလေးတွေ..။ အဖိုးက မသိဘဲ မုဒုံကနေ သွားပြီး ၀ယ်လာရတာဆိုတော့ ရီမိတာတဲ့။ ဒါနဲ့ အဖွားလဲ စိတ်ဆိုးပြေသွားတယ် တဲ့လေ။
နောက်ထပ် အဖွားဆိုးတာလေးတွေ ပြောသေးတယ်။ ဒါပေမဲ့ ကိုယ်နဲ့တူတယ်လို့ စကားခံထားလေတော့ ပြောပြရင် ယှဉ် ယှဉ်ပြီး ကြည့်ကြမှာစိုးလို့ သိပ်မပြောပြရင် ကောင်းမယ် ထင်ပါရဲ့လေ။
လူဆိုတာကလဲ တယ်ခက်တာပဲ။ လိမ်မာတာကျတော့ မမြင်တတ်ဘဲကိုး။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
ဒီနေ့ အောက်တိုဘာလ ၃၁ရက် ဆိုတော့ Halloween နေ့ပေါ့။
သူတို့ပြည် သူတို့ရွာမှာ နေရတဲ့အခိုက် ကြုံလာရတဲ့ ရိုးရာဓလေ့ပွဲတော်လေးတွေမှာ ကိုယ်ကတော့ Halloween အချိန်ကို သဘောအကျဆုံးပဲ။ တအိမ်တက်ဆင်း trick or treat လုပ်ကြ၊ သကြားလုံးလေးတွေ၊ မုန့်လေးတွေ ဝေကြ ၊ပေးကြတာကို ပျော်မိတယ်။ ဒါက ကလေးတွေ ပျော်တဲ့ ပွဲလို ဖြစ်နေတာကိုး။
ကိုယ်တို့လဲ ရောက်စ က နားမလည်ဘူး။ မနက် ရုံးသွားရင်း ဖရီးဝေးပေါ်မှာ ကိုယ့်ရှေ့က ကားက ကားနောက်ဖုံးထဲမှာ သွေးစွန်းနေတဲ့ ခြေတဖက် ထွက်နေတာတွေ့တော့ လန့်လိုက်တာ။ 911 တောင် ဖုန်းခေါ်လိုက်ရမလား စဉ်းစားလိုက်သေး။ တုံးပုံများ ပြောပါတယ်။ နောက်မှ လူခြေထောက်နဲ့ တူအောင်တု ထားတဲ့ အရုပ်ခြေထောက်မှန်း သိတယ်။ အဲဒီတော့မှ သူတို့ပွဲတော်ကြီးက ဘယ့်နှယ့်ဟာကြီးပါလိမ့် ပေါ့။
ညကျတော့ ကလေးတွေ သရဲလို ၀တ်ပြီး လမ်းတလျှောက် ဟိုပြေး ဒီပြေး လုပ်နေလိုက်ကြတာ။ ခြံဝင်းတွေထဲမှာလဲ လူရိုးခြောက်တွေ သစ်ပင်ပေါ်မှာ ကြိုးတန်းလန်းနဲ့ ဖြစ်လိုဖြစ်၊ အိမ်ရှေ့က မြက်ခင်းမှာ အုတ်ဂူတွေ ထားလိုထား၊ ပင်လယ်ဓမြတွေပုံစံ လုပ်လိုလုပ်ပေါ့။ ကိုယ်တို့ မြန်မာအယူအဆဆို နိမိတ်နမာ မရှိ နော်။ မိန်းကလေးတွေကျတော့ စင်ဒရဲလားတို့၊ စနိုးဝှိုက်တို့ပုံစံလေးတွေလဲ ၀တ်ကြလို့ တော်သေးတယ်။
နောက်တနှစ်လောက်နေတော့ ကိုယ်တို့လဲ နည်းနည်းသဘောပေါက်ပြီး trick or treat လာလုပ်ရင် ကျွေးဖို့ သကြားလုံးလေးတွေ ၀ယ်ပြီးစောင့်ကြတာပေါ့။ သရဲလေးတွေ တံခါးလာခေါက်တိုင်း သကြားလုံးတွေ လက်တဆုပ်ကြီး ပေးရတာ ပျော်လိုက်တာ။ တချို့ သရဲလေးတွေများ treat လုပ်ပါ့မယ် ပြောတာတောင် တဟီးဟီးနဲ့ ခြောက်နေသေးတာ။ ကြောက်ပါတယ် ဆိုမှနော်။
တခါကတော့ ကိုယ်တို့နှစ်ယောက် တိုင်ပင်ပြီး ပိုက်ဆံပေးလိုက်ရင် ကောင်းမယ်ဆိုပြီး သရဲလေး နှစ်ကောင်ကို ပိုက်ဆံ ၁ကျပ်စီ ပေးလိုက်တာ အဲဒီသရဲလေးတွေက သူ့ဘော်ဒါတွေ ကို ပိုက်ဆံပေးနေတယ်ဟေ့ လို့ ချက်ချင်း ဆစ်ကနယ်လ် ရိုက်လိုက်တယ် ထင်ပါရဲ့။ သရဲ အကောင်အစိတ်လောက် ပြေးလာလို့ ဟိုက် ဗုဒ္ဓေါ ဖြစ်ရသေး။
ဒါနဲ့ ရှိသမျှ သကြားလုံးတွေ ထုတ်ပေး၊ နောက်ထပ် ထပ်ရောက်လာ၊ သကြားလုံး ကုန်တော့ ကိုယ်စားနေတဲ့ မရွေးထုပ်တွေ ပေး၊ နောက်ထပ် ထပ်ရောက်လာ၊ နောက်တော့ အိမ်နားက ဆိုင်မှာ သကြားလုံး အမြန်ပြေးဝယ်ပါဟေ့ ဆိုပြီး သွားဝယ်တုန်း ထပ်ရောက်လာတဲ့ သရဲလေးတွေကို အိမ်မှာရှိတဲ့ ခေါက်ဆွဲထုပ်တွေပါ ဝေရတော့တာ။ သရဲလေးတွေလဲ ဘယ့်နှယ် treat ကြီးပါလိမ့်လို့ အံ့သြပြီး ပါးစပ်အဟောင်းသားနဲ့။ ခြောက်တောင် မခြောက်နိုင်တော့ဘူး။
အဲဒီနှစ်တွေတုန်းက အဖေကလဲ ကိုယ်သကြားလုံးဝေရင် တပြုံးပြုံးနဲ့ ဘေးမှာ ရှိတာ၊ နောက်တော့ ဘာစိတ်ကူးပေါက်တယ် မသိပါဘူး။ အဖေလဲ trick or treat သွားလုပ်ရင် ကောင်းမယ် ထင်တယ် တဲ့။ ကိုယ်က လက်တဆုပ်ကြီး ပေးနေတာဆိုတော့ ကလေးတွေကို ဘယ်လောက်ပေးပေး မလောက်နိုင်တာမို့ ဘဲစား ဘဲခြေ ဖြစ်အောင် အဖေက သွားတောင်းလာပြီး ကိုယ့်ကို ပြန်ပေး၊ ကိုယ်က ပြန်ဝေ အဲဒီ့ သဘောမျိုး ထင်ပါရဲ့။ ကိုယ်လဲ မနည်း တားလိုက်ရတယ်။
ဒီလိုသွားရင် ကလေးတွေနောက် အဖေ၊ အမေတွေ၊ ဦးလေးတွေကလဲ လိုက်ကြရတာ။ မုန့်ယူရင် ကျေးဇူးတင်ပါတယ် ပြောလေ ဆိုပြီး ဘေးကနေ သင်ကြတာ။ ကလေးတွေကို လိုက်စောင့်ရှောက်ကြတာပေါ့။ ဘာဖြစ်လို့လဲဆိုတော့ တချို့ မြို့နယ်မှာ ခပ်ရူးရူး လူတွေက သကြားလုံးတွေကို အဆိပ်သုတ်လိုသုတ်၊ မုန့်ထဲ ကွတ်ကီးထဲ ဖန်ကွဲစတွေတောင် ထည့်သတဲ့။ တချို့ကတော့ ကလေးတွေကို မုန့်ကျွေးမယ်ဆိုပြီး အခန်းထဲခေါ်သွားတတ်သေးတယ်။
အဲဒီလိုမျိုး ကြားတော့ အံ့သြလိုက်တာ။ အပြစ်ကင်းကင်း ပျော်နေတဲ့ ကလေးလေးတွေကို ဘာလို့များ ထိခိုက်စေရတာလဲ မသိ။ ကိုယ်မပါဝင် မပျော်ရွှင်ချင်ရင် မီးမှိတ် တံခါးပိတ် နေလိုက်လဲ ရရဲ့သားနဲ့။
ဒါပေမဲ့ ကိုယ်တို့လမ်းမှာတော့ ညနေ ၅နာရီလောက်ကတည်းက မျက်နှာမှာ အမျိုးမျိုး ခြယ်သကြပြီး ကလေးတွေ လူကြီးတွေ အုပ်စုလိုက် ထွက်ကြတာ ည၉နာရီလောက်မှ လူစုကွဲတယ်။ အဲဒီအချိန်ကျရင်တော့ ကလေးသရဲလေးတွေလဲ အမေတွေရဲ့ ပုခုံးမှာ ငိုက်ပြီး အိမ်ပြန်ကြတယ်။ တညနေလုံး တအိမ်တက်ဆင်း တံခါးတွေခေါက်၊ သကြားလုံးတောင်းရတာ မောပြီး အိပ်ပြီလေ။
ဒီနှစ်တော့ ကိုယ်တို့မှာ လူ သားသမီးက မရှိပေမဲ့ ကြောင် သားသမီးတွေက ရှိသေးတာမို့ သူများတွေကို အားကျပြီး ကိုယ်လဲ ကြောင်ကလေးပိုက်လို့ trick or treat လိုက်လုပ်ရကောင်းမလား စဉ်းစားသေးတယ်။ ကိုယ့်အမျိုးသားကတော့ ပြောပါတယ်။ ဒီသားအမိ သွားရင်တော့ ၀တ်စုံဝယ်စရာ မလိုဘူးတဲ့၊ Original Halloween costume နဲ့ ဆိုပဲ။
ကြောင်ကလေး ပိညှက်က တကိုယ်လုံး နက်ကြုပ်ကလေး ဖြစ်နေတဲ့အပြင် အသက်ရှူကြပ်တဲ့ ရောဂါလေးနဲ့ဆိုတော့ ဂီး ဂီး လို့ နေရင်းထိုင်ရင်း မြည်နေတာမို့ သရဲခြောက်သလိုတောင် ဖြစ်နေအုံးမှာ။ သူ့အမေကလည်း……..။
အင်း..၊ သကြားလုံးတော့ တော်တော်ရအုံးမှာပါ။
မိုးချိုသင်း
(ဓာတ်ပုံထဲက ကလေးလေးက မိတ်ဆွေ ကိုမိုးကျော်နဲ့ မအိရဲ့ သမီးလေးပါ။ နယ်လီ တဲ့)
အပြည့်အစုံဖတ်မယ်...
ပြန်ခေါက်ထားခဲ့မယ်...
ဘလော့ဂ်ကို ပစ်ထားတာလဲ ကြာပြီ။
ဘလော့ဂ်မှာ ၃ရက်လောက် ခွင့်ယူမည်ဆိုပြီး သတင်းစကားမှာ ရေးပြီးတင်ထားတာလဲ စိတ်ထဲမှာတော့ ၃ နောက်က သုညတလုံးလောက် တိုးလိုက်ရမလား စဉ်းစားနေတာ။ သုည နှစ်လုံးလောက်ဆိုရင်တော့ အေးဆေးပဲ။
လူကလဲ နေလို့ကို မကောင်းဘူး။ အဖျားက တငွေ့ငွေ့။ ဆီးချိုတွေကလဲ ကုန်ဈေးနှုန်းလိုပဲ။ ဘယ်လိုချချ မကျဘူးဆိုတဲ့အထဲကပဲ။ ဒါပေမဲ့ ကိုယ့်မှာ ဂရုစိုက် မခံရရှာပါဘူး။ ဘာဖြစ်လို့လဲ ဆိုတော့ ကိုယ်က ဖြစ်လာရင် ကိုယ့်ဖာသာကိုယ် ပိုပိုသာသာ သနားပြီး ၀မ်းနည်းပစ်လိုက် တတ်လို့ပါ။ အဲဒီတော့ ဘေးက သနားမဲ့လူတောင် ကိုယ်ဖြစ်နေတာကို ကြည့်ပြီး သူတို့သနားတာတွေ ရပ်ပစ်ချင်စိတ်ပေါက်သွားတယ်လေ။
အဖေကတော့ ကိုယ့်ထောင်ချောက်ထဲ ခဏခဏ ပြိုကျသူပဲ။ အဖေရှိတုန်းကဆိုရင် ကိုယ်က နေမကောင်းဖြစ်ပြီဆိုရင် ခွေနေတာ။ အဲဒီအခါ အဖေက သူ့လက်တုတ်တုတ်ကြီးတွေနဲ့ ကိုယ့်နဖူးကို လာစမ်းပြီး သက်သာလား သမီး လို့ အင်မတန်ပူပန်တဲ့ အသံနဲ့ မေးတတ်တယ်။ ဒါဆို ကိုယ်က အဖေ့ကို မကြည့်ဘဲ အသံတိုးတိုး နဲ့ “အဖေ၊ ချိုသင်းတော့ ဒီတောင် မကျော်နိုင်တော့ဘူး ထင်တယ်” လို့ ပြောလိုက်တာ။
အဖေ့အဖို့မှာတော့ ဟာ ကနဲပေါ့။ ရင်ကို တိုက်ရိုက်မှန်သွားတာ။ ငါ့အသည်းနှလုံး ကြေပြုန်း.. ဘာညာ စိတ်ထဲက ကဗျာစပ်ချင်စပ်နေမှာ။ ကဗျာဆရာမို့ စိတ်က နုနုလေးပါဆိုမှ သမီးက ဒီတောင် မကျော်နိုင်တော့ဘူးဆိုတော့ တကယ်ပျာသွားတယ်။ အဖေ ဘာလုပ်ပေးရမလဲ၊ ဆေးခန်းသွားမလားတွေ ဖြစ်သွားတယ်။
ပြီးတော့ လာ လာ သမီး၊ အခန်းထဲမှာ နေမနေနဲ့၊ အခန်းပြင်ကိုထွက်၊ ကိုယ်လက်လှုပ်ရှား လေးဘာလေးလုပ်တော့ ချွေးတွေထွက်သွားမယ်၊ ဧည့်ခန်းမှာ ထိုင်၊ အဖေ စန္ဒယားတီး ပြမယ်တဲ့။ ဒါနဲ့ အောင်ခြင်းရှစ်ပါးကို အော်ဂင်လေးနဲ့ တီးတော့တာပါပဲ။ ဆေးလဲ မတိုက်တတ်၊ အောင်ခြင်းရှစ်ပါး နားထောင်လိုက်ရင် သမီးရောဂါတွေ ပျောက်ကုန်မယ် ထင်နေတယ်။
ကိုယ့်မှာလဲ အိပ်ယာထဲ လှဲမနေနိုင်၊ တီးလုံးကို နားထောင်နေရတယ်။ တောင်မကျော်နိုင်တာ မှားပြီလို့တော့ ထင်မိသား။ ဒါပေမဲ့ အဖေ့မေတ္တာကို ခံစားရတာမို့ ပိုတောင် မျက်ရည်ဝဲမိတယ်။ အဖေကလဲ ပျောက်စေချင်ဇောနဲ့ ကိုယ့်ကို ပြုံးပြီးကြည့်လိုက်၊ သီချင်းကို ကျော့ကျော့ပြီး တီးလိုက်သေးတယ်။ ဒါက အဖေ့ဆေး လေ။
“သမီးချိုကလေး
ဆီးချို ဝေးပါစေ။
ဆားငန်ငန်နဲ့
အစားသန်တဲ့ သမီးအချစ်အိုးကလေး
သွေးတိုးနဲ့လဲ ဝေးပါစေ”
အဲဒီလိုလဲ စပ်လိုက်သေးတာပါ။ ကိုယ့်မလဲ ကိုယ်အစားသန်တာ ကဗျာတွေဖြစ်ကုန်ပေါ့ ဆိုပြီး အဲဒီကဗျာကို သူများမမြင်အောင် ဖွက်ထားလိုက်ရပါတယ်။
အမတွေကျတော့ တမျိုးပူတာပါ။ အကြီးဆုံးဖြစ်တဲ့ မစံကိုတော့ ကိုယ်က နေမကောင်းဖြစ်ရင် အီးမေးလ်ထဲမှာ “ငါလဲ အခုတလော နေမကောင်းဘူး၊ ဘာမှကို စိတ်သွားတိုင်း ကိုယ်မပါဘူး။ ဘုရားကိုပဲ အပ်လိုက်ပါပြီ။ ကံစီမံရာပါပဲ” လို့ ရေးလိုက်တာ။ အဲဒါဆိုရင် မစံက ချက်ချင်း စာပြန်လာတယ်။
“မိချို၊ နင် ဆေး မှန်မှန် မသောက်ဘူးလား၊ အစားသိပ်သောင်းကျန်းနေသလား။ ကျန်းမာရေးတော့ ဂရုစိုက်မှပေါ့၊ အဝေးမှာဆိုတော့ ငါတို့ကလဲ မလာနိုင်၊ မပြုစုနိုင်” စသဖြင့်ပေါ့။ အကြီးပီပီ အကုန်ပူပန်ပြီး အရှည်ကြီး ရေးတော့တာပါ။ အဲဒါကို ကိုယ်က ပြုံးပြီး ဖတ်နေတာ။
အမအလတ် မအေးကျတော့ တမျိုးပါ။ “မအေးရေ ငါနေမကောင်းဘူးဟေ့” လို့ တခွန်းပဲ ပြောလိုက်၊ ပွဲပြီးပြီ။ သူက သဲသဲ မို့ ငိုသံပါကြီး တန်းဖြစ်သွားတာပါ။ “အမလေး မိချိုလေးရယ်၊ ဖြစ်မှ ဖြစ်ရလေ။ ငါဘာလုပ်ပေးရမလဲဟင်။ လုပ်ကြပါအုံး၊ မိချို နေမကောင်းဘူး” တဲ့။ ဒါနဲ့ ကိုယ်လဲ သေများ သေတော့မှာလားလို့ ကိုယ့်ဖာသာကိုယ်တောင် တွေးပူသွားတယ်။
နေစမ်းပါအုံး၊ ငါဘာမှ မဖြစ်သေးပါဘူး။ နေကောင်းပါတယ်ဟ လို့ မနည်း ပြန်ပြောရတယ်လေ။ အဲဒါနဲ့ နေကောင်းပါစေ ဘာညာနဲ့ ဆုတွေ အရှည်ကြီးပေးတာ အဖွားကြီးတယောက်လိုပဲ။ မနည်း သည်းခံ နားထောင်ရတာပါ။ “နင်ဘာမှ မပူနဲ့ သိလား။ နင်နေမကောင်းရင် ငါတို့ပြုစုမှာပေါ့” လို့ ပြောလို့ အသက်ကြီးလို့ ငါနေမကောင်းဖြစ်ရင် ငါတောင် အိုနေပြီမို့ နင်က ငါ့ထက် ပိုအိုနေပြီပေါ့ဟ လို့ ပြောရတယ်။ အဲဒီတော့လဲ အေး ဟုတ်တာပဲ တဲ့။
အမ အငယ် မနှင်းကတော့ ဆရာဝန်ပီပီ နေမကောင်းဘူးလို့ ကြားတာနဲ့ ကိုယ်စားသောက်တာတွေ အကုန်စစ်ပါတော့တယ်။ ဟိုနေ့က ဘာစားလဲ၊ မနေ့က ဘာစားလဲ။ အပြင်မှာစားသလား၊ ချက်စားသလား။ အေး၊ အဲဒါတွေ စားတာကိုး။ အသီးအရွက် များများစားရမယ်။ နင်က အသားချည်း စားတာကိုး။ အဲဒီတော့ ဆရာဝန်ကို သွားပြပြီးပလား တဲ့။ ဖြေပေတော့ မေးခွန်းတွေ တသီကြီး။
ကိုယ့်အမျိုးသားကတော့ ကိုယ်နေမကောင်းဖြစ်တယ်ဆိုရင် တကယ်ဟုတ်သလား၊ မဟုတ်သလား အရင်သေချာ အကဲခတ် စူးစမ်းလိုက်တယ်။ အတွေ့အကြုံကလဲ များနေပြီဆိုတော့..။ “မှန်း..ကိုယ်ကလဲ ပူလိုက်တာ မီးခဲလိုပါပဲလား၊ သွေးတွေတိုးတာလဲ မီးရထား ခုတ်နေသလိုပဲ” အဲဒီလို ကိုယ့်ထက် ဦးအောင် ပြောလိုက်တယ်။ ဂွတိုက်တယ် ခေါ်ရမှာပေါ့။
ဒီတောင် မကျော်နိုင်တော့ဘူး ဆိုတာလဲ ခဏခဏ ပြောနေကျဆိုတော့ အေး၊ အေး တဲ့။ တောင်မကျော်ဘဲ တောင်အောက်မှာပဲ အေးအေးဆေးဆေး ပျော်ပွဲစားမဲ့ အပေါက်ပါ။ ကိုယ်ကလဲ ကျား ကျား ခဏခဏ လုပ်လေတော့ တကယ့်ကျားလာရင်တောင် ကြောင်ကလေး ထင်ပြီး မီ မီ ခေါ်မဲ့သူပဲ။ ဒါနဲ့ ကိုယ်လဲ လက်လွန်သွားပြီဆိုတာ သိလိုက်ပါတယ်။ ဒါကြောင့် ကိုယ်တကယ် နေမကောင်းရင်တော့ အခု တကယ်ဖြစ်နေတာနော် လို့ ဖြည့် ဖြည့် ပြောရသေးတာ။
ဆေးတွေကတော့ အများကြီး သောက်ရ ထိုးရတာ နေ့တိုင်းပါပဲ။ ဒါပေမဲ့ ဒီမေတ္တာဆေးတွေလောက်တော့ ဘယ်ဆေးမှ အစွမ်းမထက်ဘူး ထင်တာပဲ။ ပုံမှန်ဆေးတွေနဲ့ မသက်သာရင် မေတ္တာဆေးတော့ ကူရသေးတာပဲလေ။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
တနေ့က မိတ်ဆွေတယောက်ပြန်တာ လေဆိပ်လိုက်ပို့ရင်း လေယာဉ်စီးရတာတွေ၊ လေဆိပ်တွေနဲ့ ပတ်သက်ပြီး ကိုယ်တွေ့ကြုံရတာတွေ ရေးချင်စိတ် ပေါ်လာတယ်။
ကိုယ်က လေဆိပ်တွေ ရောက်တိုင်း၊ လိုက်ပို့၊ လာကြိုရတိုင်း ပျော်ပြီး ခရီးထွက်ချင်စိတ် အမြဲဖြစ်တယ်။ လူတွေ ဥဒဟို သွားနေတာ အားကျပြီး ကိုယ်လဲ ခရီး ထွက်ပစ်လိုက်ချင်တာ။ ဘူတာရုံကျတော့ ၀မ်းနည်းတာ။ ကိုယ်သာ ရထားကြီးနဲ့ လိုက်မသွားရဘူးဆိုရင် ဘယ်တော့မှ ဘူတာရုံကို လိုက်မပို့ချင်ဘူး။ ဘာမှန်းမသိ ၀မ်းနည်းတတ်လို့။ လေဆိပ်နဲ့ ဘူတာမှာ ခွဲခွာရခြင်းတောင် ခံစားမှုက မတူဘူး။
လေယာဉ်တွေကို မြင်ဖူးတာ ငယ်ငယ်က တိုင်းမ်တို့ နယူးစ်ဝိခ် မဂ္ဂဇင်းတွေထဲက ကြော်ငြာတွေမှာပါ။ လေယာဉ်မယ်လေးတွေက လှလိုက်တာ။ အများအားဖြင့် ထိုင်းလေကြောင်းလိုင်း ကြော်ငြာတွေ ထင်ပါရဲ့။ တခါတလေ နိုင်ငံပေါင်းစုံက အ၀တ်အစားတွေ ၀တ်ပြီး လေယာဉ်မယ်လေးတွေ တန်းစီပြီးနေရင် ကိုယ်တို့မှာ ဘယ်တယောက်ကို အလှဆုံးလဲ အကြိုက်ဆုံးလဲဆိုပြီး ရွေးရတာ အမော။
ပထမဆုံး လေယာဉ်စီးတော့ စင်ကာပူကိုပေါ့။ စီးရတာ ကြောက်တော့ ကြောက်တယ်။ အဲဒီတော့ လေယာဉ် တက်တဲ့အချိန်နဲ့ ဆင်းတဲ့အချိန် လက်ရန်းကို ကုပ်ပြီး ကိုင်ထားရတာပေါ့။ ကိုယ့်တူလေးကို တခါက ကြွားပြီး အံတီချိုက တိုက်လေယာဉ်မောင်းမှာ လို့ ပြောဖူးတာ သွားသတိရမိတယ်။ ဘယ်လို စိတ်ရူးပေါက်ပြီး ပြောမိပါလိမ့်လို့ အဲဒီလို လေယာဉ်အတက် အဆင်းတွေမှာ နောင်တ ရတတ်ပါတယ်။ အခုလို ငြိမ့်ငြိမ့်လေး တက်နေ၊ ဆင်းနေတာတောင် ဘုရားတ နေရတာ မဟုတ်လား။ တိုက်လေယာဉ်ဆို အသဲတွေ အူတွေ ဗြောင်းဆန်ကုန်မှာပေါ့။
လေထဲရောက်သွားရင်တော့ အေးဆေးပါ။ လေယာဉ်ထဲမှာပေးတဲ့ သတင်းစာဖတ်၊ ဈေးဝယ် လမ်းညွှန် ကြော်ငြာလေးတွေလျှောက်ကြည့် ပြီးရင် ပြူတင်းပေါက်ကနေ တိမ်တွေနဲ့ လှနေတဲ့ ကောင်းကင်အပြာကြီးကို တမေ့တမော ငေးတော့တာပါပဲ။ ပြီးတော့ လာကျွေးသမျှစား၊ တိုက်သမျှ သောက်ပေါ့။ တခါမှ မငြင်းဖူးဘူး ထင်တာပဲ။ စားသမျှလဲ အကုန်ကောင်းတယ် ထင်တာပဲ။ အဲဒါ အာရှတွင်း သွားတဲ့ လေယာဉ်တွေ စီးလို့ပါ။
အမေရိကန် ပြည်တွင်းသွား လေယာဉ်တွေကတော့ လေကြောင်းလိုင်းတွေ များသလောက် ကိုယ်စီးသမျှတော့ service မကောင်းဘူး။ လေယာဉ်မယ်လေးတွေကလဲ ငယ်ငယ်လှလှ လေးတွေ သိပ်မတွေ့ရသလိုပဲ။ အသက်ကြီးကြီး နှုတ်ခမ်းနီရဲရဲကြီးတွေ ဆိုးထားပြီး မုန့်လဲ မကျွေးဘူး။ အများဆုံးကျွေးမှ မုန့်ကျိုးလိမ် တခုလောက် ပစ်ပေးလိုက်တာပါပဲ။ သူတို့ဆီမှာ ခရီးသွားတဲ့သူက များလွန်းတော့ ထူးပြီး ခရီးသည်ကို ချော့နေစရာ မလိုဘူးလို့များ ထင်သလား မသိ။
နယူးယောက်ခ်သွားတုန်းကလဲ လေယာဉ်လက်မှတ် ၀ယ်မယ်ဆိုတော့ ဆင်းမဲ့ လေဆိပ်က လဂွားဒီးယား တဲ့။ ဘယ့်နှယ် နံမည်ကြီးပါလိမ့်ဆိုပြီး ကိုယ်က အဲဒီလေဆိပ်ကို မဆင်းဘူး။ နံမည် မလှလို့။ JFK ဂျွန် အက်ဖ် ကနေဒီ လေဆိပ်ကို ဆင်းတဲ့လက်မှတ်ပဲ ရွေးဝယ်တယ်။ အဲဒီလေဆိပ်က မြို့နဲ့ လှမ်းတာမို့ မိတ်ဆွေတွေ အဝေးကြီး လာကြိုရတယ်။ လုပ်လိုက်ရင် တလွဲပဲ။
နောက်ထပ် လေဆိပ်အတွေအကြုံတခုက အယ်လ်အေမှာပါပဲ။ အဲဒီတုန်းက ကိုယ်က ဗိုက်ခွဲပြီး အော်ပရေးရှင်း လုပ်ထားလို့ အိမ်မှာ bed rest နားနေရတဲ့ ကာလ။ ဆန်ဖရန်စစ်စကိုက မိုးမခ စကားဝိုင်းအတွက် အဖေ သွားတော့ ဟိုမှာ အဖေ နေမကောင်းဖြစ်လို့ ဆေးခန်းသွားပြရမယ် တဲ့။ မိုးမခက ကိုမောင်ရစ်က ဖုန်းဆက်လာတယ်။ ဒါနဲ့ ဖုန်းချချချင်း ထူပူပြီး လေယာဉ်နဲ့ လိုက်သွားမယ်ဆိုပြီး ထွက်ခဲ့ကြတယ်။
လေယာဉ်လက်မှတ်ကို အနီးဆုံးအချိန် ချက်ချင်းဝယ်ပြီး အိမ်က ချက်ချင်းထွက်ရတာမို့ လေယာဉ် မမီမှာစိုးလို့ လေဆိပ်မှာ ကိုယ့်အမျိုးသားက ရှေ့က ပြေးသွားတယ်။ ကိုယ်က ဗိုက်ခွဲထားလို့ ဖြေးဖြေးပဲ နောက်က လိုက်ရတယ်။ ခါးမှာလဲ ခါးပတ်ပြားကြီး ပတ်ထားရပြီး အကျီ င်္နဲ့ ဖုံးထားရတာ။ security စစ်တဲ့ နေရာလဲ ရောက်ရော ကိုယ့်ကိုတွေ့တာနဲ့ လုံခြုံရေး ၀န်ထမ်းတွေ အကုန်ပျာကုန်တာ။ သူတို့က ပုံမှန်မဟုတ်တာ ချက်ချင်းသိတယ်။
VIP မို့လို့ မဟုတ်ဘူး။ Suicide Bomber ထင်လို့လေ။ ကိုယ့်ကို မလှုပ်နဲ့၊ ရှေ့မတိုးနဲ့ တဲ့။ ခါးမှာ ထိုးထားတဲ့ သေနတ်ပေါ်ကို လက်တွေတင်ရင်း ပြောတယ်။ အားလုံးက ကိုယ့်ကို ကြည့်လို့။ ကိုယ်ကလဲ လေယာဉ် မမီလိုက်မှာစိုးလို့ ရှေ့ကို ဖြေးဖြေးချင်း တိုးမလို့။ တယောက်က ခပ်ကျယ်ကျယ် အော်တယ်။ မင်းအကျီ င်္အောက်မှာ ဘာလဲ တဲ့။ တခုခု ရှိတယ် တဲ့။ (ဗုံးတွေ ချိတ်ထားတာဟေ့ လို့ ပြောလိုက်ရင်တော့ ပွဲပြီးပြီ။ ဒီဘလော့ဂ်တောင် လုပ်ရမှာ မဟုတ်ဘူး။)
အဲဒီတော့ ကိုယ်ကလဲ ပြန်ပြောရတယ်။ ငါအခုမှ ဆေးရုံက ဆင်းတာ ရက်ပိုင်းပဲ ရှိပါသေးတယ် လို့။ အော်ပရေးရှင်း လုပ်ထားရလို့ ခါးပတ်ပတ်ထားရတာပါ လို့။ အခု ငါ့အဖေ နေမကောင်းလို့ သွားတွေ့မှာ လို့။ သူတို့က ကြောက်တော့ ခပ်လှမ်းလှမ်းက အော်မေးတာမို့ ကိုယ်ကလဲ အော်ပြောရတာ။ အဲဒီတော့ သူတို့က အဖေ့ကို စိတ်ပူလို့ ငိုချင်သလို ဖြစ်နေတဲ့ ကိုယ့်ပုံကိုကြည့်ပြီး ယုံသွားလား မသိဘူး။
အခန်းတခန်းထဲခေါ်သွားပြီး အမျိုးသမီး အော်ဖစ်ဆာ နှစ်ယောက်နဲ့ တကိုယ်လုံး စစ်ဆေးတော့တာပဲ။ ပြီးမှ မှန်ကန်တော့မှ “ငါတို့ တွန်းလှည်းနဲ့ လိုက်ပို့ပေးရမလား” ဘာညာ မေးတာ။ အဖော်ရော မပါဘူးလား တဲ့။ ဒီလိုအချိန် ခရီးမသွားသင့်ဘူးလဲ ပြောသေးတယ်။ ကိုယ်ကလဲ အမျိုးသားပါပါတယ်။ သူလဲ စိတ်ပူလို့ ရှေ့က ပြေးပြီလို့ ပြောလိုက်ရတယ်။ ဖြစ်လိုက်ရင် အရာရာနဲ့ အကြောင်းကြောင်းပဲလေ။
ပထမဆုံး အမေရိကားကို လာတုန်းကတော့ လေယာဉ်ကို ၁၆နာရီကျော်ကြာအောင် စီးရတာ။ အကြာကြီးစီးရတာ အဲဒီအကြိမ် ပထမဆုံးဆိုတော့ လေယာဉ်ကြီးက အကြီးကြီးမို့ သဘောကျလိုက်တာ။ လူတယောက်ကို ကိုယ့်ရှေ့မှာ တီဗီ တလုံးနဲ့။ ရုပ်ရှင်ပေါင်း ၅၀ကျော် ရွေးပြီး ကြည့်လို့ရတယ်။ ဂိမ်းတွေဆော့၊ စတိတ်ရှိုးတွေ ကြည့်သွားလဲ ရတယ်။
ခက်တာက ထိုင်ခုံမှာ ခလုတ်တွေ စုံနေတာပါ။ ကိုယ်ကလဲ လောကဓာတ်ပညာတွေကို လန့်တဲ့ အခံကလဲ ရှိတယ်။ ဒါပေမဲ့ ရုပ်ရှင်ကလဲ အရမ်းကြိုက်တော့ ကြည့်လဲ ကြည့်ချင်တယ်။ ဒါနဲ့ တခုကြည့်ချင်တိုင်း ဘေးနားက ကိုယ့်အမျိုးသားကို လုပ်ပေးပါအုံး၊ ချယ်နယ် ပြောင်းပေးပါအုံး ပြောရတယ်။
နောက်တော့ သူလဲ အိပ်ရော ကိုယ်လဲ မနှိုးချင်တာနဲ့ ကိုယ့်ဖာသာကိုယ် စမ်းသပ်မယ် ဆိုပြီးစိတ်ထဲက ဖြစ်လာတယ်။ ဒါနဲ့ ဟိုခလုတ်လေး နှိပ်ကြည့်လိုက်၊ တီဗီက ဖလပ်ဆို ပိတ်သွားလိုက်၊ ချယ်နယ်ပြောင်းမယ်ဆိုပြီး ခလုတ်တခု နှိပ်လိုက် ခြေနင်းခုံက ဗြုန်းဆို မြောက်တက်လာလိုက်နဲ့..။
တော်ပါပြီလေ မစမ်းတော့ပါဘူးဆိုပြီး ဇိမ်နဲ့ကြည့်မယ် လုပ်ပြန်တော့ တံတောင်နဲ့ ရီမုဒ်ကို ဖိမိပြီး တခုပြီးတခု ပြောင်းကုန်လို့ ဟိုက် သောက်ပလုတ်တုပ် ဖြစ်ရသေး။ နောက်တော့ ကိုယ့်ဖာသာကိုယ် အတင်းကြိုးစားပြီး ဒါက ဒါကို နှိပ်တာ၊ ဟိုဟာက ဟိုဟာကို နှိပ်တာနဲ့ တတွတ်တွတ် ရွတ်ပြီး သိသလိုလို ရှိပြီဆိုတော့ လေယာဉ်က အယ်လ်အေမြို့ပေါ်မှာ ဆင်းဖို့ ၀ဲနေပြီ။ ကိုယ်က လုပ်တတ်တုန်းလေး ခဏ စမ်းကြည့်ချင်လို့ပါဆိုပြီး နေခဲ့လိုက်ချင်သေးတာ။
အဲဒီခရီးမှာပဲ လေယာဉ်ပေါ်မှာ အိမ်သာကိုသွားတော့ တံခါးလက်ကိုင်ကို ကိုင်လိုက်တာနဲ့ ဓာတ်လိုက်တာပါ။ ဘယ့်နှယ်ဟာကြီးပါလိမ့် လို့ စိတ်ထဲမှာ ဖြစ်နေတုန်း၊ ဟုတ်မှ ဟုတ်ရဲ့လား လို့လဲ ထင်မိသေးတယ်။ အမှန်ပဲ။ အမေရိကားအလာ လေယာဉ်ပေါ်မှာကတည်းက စ လိုက်တာ သတ္ထုပစ္စည်းတွေနဲ့ ဓာတ်လိုက်တာ အခုထိပဲ။
ကိုယ့်ကိုယ်မှာ မတရား ဓာတ်တွေ စီးနေပြီထင်တယ် လို့ စိတ်တော့ ပူမိသား။ နောက်မှ သူများတွေလဲ ဓာတ်တွေ လိုက်ကြတာ မေးကြည့်လို့ သိရတယ်။ လူတိုင်းတော့ မဟုတ်ဘူး။ တချို့ပေါ့။ ကိုယ်လဲ တဖျပ်ဖျပ်နဲ့ ဓာတ်လိုက်တာများ တခါတလေ မီးတောင်ပွင့်တယ်။ လာမထိနဲ့ မီးပွင့်သွားမယ် ဆိုတာ ကိုယ်က တကယ်ကြီး ပြောတာ..။
တခါကတော့ Mall ထဲမှာ လမ်းလျှောက်နေတုန်း ဘေးနားက မှန်မှာ ကိုယ့်ပုံကို ကြည့်မိတော့ ဆံပင်တွေ အကုန်လုံး ထောင်လို့။ ကာတွန်းကားထဲက ဆံပင်တွေထောင်နေတဲ့ ရုပ်ပြောင်ပုံလိုမျိုးပဲ။ သူကလဲ အံ့သြလို့။ အဲဒီနေ့က သိုးမွှေးအကျီ င်္ ခေါင်းစွပ်ဝတ်ထားတယ်။ သတိထားမိတာ သိုးမွှေးအကျီ င်္ဝတ်ရင် ပိုဖြစ်သလိုပဲ။ လျှပ်ကူးမြန်လို့ ထင်ပါရဲ့။
အခုတော့ ကိုယ်က သံတွေ၊ သတ္ထုတွေဆို ဘာမှ မကိုင်ရဲတော့တာမို့ အခန့်ကြီးစားလိုတောင် ဖြစ်နေတယ်။ ဥပမာ စတိုးဆိုင်ထဲ ၀င်မယ်ဆိုရင် ခပ်တည်တည်နဲ့ လျှောက်လာ၊ တန်းဝင်သွားရုံပဲ။ တံခါးလက်ကိုင်က သံမို့ မကိုင်ရဲလို့ သူက တံခါးဖွင့်ပေးထားတယ်လေ။ စတိုင်ပေါ့။ ကုသိုလ်ကံများ ပြောပါတယ်။ သူကလဲ ကားတံခါး၊ ဆိုင်တံခါး ဖွင့်ဖွင့်ပေးရတာ Lady first မို့ ဦးစားပဲ ပေးနေရသလိုလို။ တကယ်က ဓာတ်လိုက်မှာ ကြောက်လွန်းလို့ ကိုယ့်အကြောင်း ကိုယ်တို့ပဲ သိတယ်လေ။
အဲဒါ လေယာဉ်ပေါ်ကတည်းက စ တဲ့ဇာတ်လမ်း။ ခုထိ မဆုံးသေးဘူး။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
အခုတလော အမေရိကန် စီးပွားရေးက မျက်ခုံးတော်တော်လှုပ်နေလေတော့ ကိုယ်လဲ အတော်လေးကို ဆင်ဆင်ခြင်ခြင် နေနေရတယ်။ အရင်ကတော့ အဲဒီအကြောင်းတွေ နားလဲ မလည်၊ စိတ်လဲ မ၀င်စားတော့ မသိဘူး။ မသိတော့ မျက်ကန်း တစ္ဆေမကြောက် ဖြစ်နေတယ်။
ဟို ဘဏ်ကြီး ပြိုသွားပြီဆိုလဲ ပြုံးပြုံးပဲ။ ဒီကုမ္ပဏီကြီး ရပ်လိုက်ပြီဆိုလဲ အော်..ဟုတ်လား လောက်ပဲ။ သူများတွေက ထင်ကြမယ်။ တော်တော်ခိုင်ပါလား၊ မဖြုန်ပါလား ပေါ့။ တကယ်တော့ ဗလာချည်းသက်သက် မို့ ဖြုန်စရာ မလိုတော့တာ။
အလုပ်လုပ်တော့လဲ ကိုယ်က ရုံးမှာသာ စာရင်းဇယားတွေ အတိအကျ လုပ်တာ၊ အိမ်မှာကျတော့ အကုန် သူပဲ လုပ်တယ်။ ဘဏ်သွင်းတာလဲ သူပဲ၊ ဘီလ် ပေးတာလဲ သူပဲ။ ကိုယ်က ခေါင်းနောက်လို့ လှည့်ကို မကြည့်ဘူး။ ဒီမှာကလဲ ငွေသားနဲ့ သုံးကြတာ နည်းတော့ ကဒ်နဲ့ပဲ လကုန်မှ ရှင်းရတယ်။ အဲဒီတော့ ကိုယ့်မှာ ကဒ်တွေရှိနေရင် သုံးလို့ရနေတာပဲကိုး။
ကိုယ်ကလဲ သူမပါဘဲ ဈေးတောင် မသွားတတ်တဲ့သူဆိုတော့ ကိုယ်သုံးသမျှ သူသိတယ်။ သင့်တော်၏ မသင့်တော်၏ သူပြောလိမ့်မယ်လို့ပဲ စိတ်ထဲမှာ လက်ခံထားလိုက်တယ်လေ။ သူကလဲ တမျိုးပဲ။ နှစ်ယောက်သား တိုင်တိုင်ပင်ပင်နဲ့ ပျော်ပျော်ရွှင်ရွှင် သုံးကြပေမဲ့ လကုန် လို့ ဘီလ်လာရင် သူ့ဆီကို ဘီလ်လာရပါ့မလားဆိုပြီး ဒေါသများတောင် ထွက်လို့။ သူက သုံးသာ သုံးချင်တယ်၊ ဘီလ်တော့ မလာစေချင်ဘူးကိုး။ မှတ်သားရပါ၏ ပေါ့။
မနေ့ကတော့ ကိုယ့်ကို ပြောလာတယ်။ ပိုက်ဆံကုန်ပေါက်တွေ သတိထားမိဖို့ အချက်အလက်တွေ အင်တာနက်ထဲမှာ ဖတ်လိုက်ရတယ် တဲ့။ ကိုယ့်ကို သွယ်ဝိုက် ပညာပေးချင်လို့ ထင်ပါရဲ့ ၊ ဖတ်လိုက်အုံး တဲ့။ ကိုယ်ကလဲ ဒါမျိုးဖတ်ရမယ်ဆိုရင် အင်မတန် နှေးကွေး လေးလံစွာနဲ့ တလုံးချင်း မှေးပြီး ဖတ်လိုက်တယ်။
ဖတ်ရင်းဖတ်ရင်းနဲ့ ဟုတ်မှ ဟုတ်သေးရဲ့ လားလို့။ ဘာဖြစ်လို့လဲဆိုတော့ ကိုယ့်ကိုများ စောင်းရေးနေသလားလို့။ အိမ်ကလူနဲ့ ဆောင်းပါးဆရာတို့ အချိတ်အဆက်များ ရှိသလား သံသယ ၀င်ရသေးတယ်။ အချက်အလက်တော်တော်များများကိုတော့ ဖတ်ပြီးပြီးချင်းပဲ မေ့ပစ်လိုက်ပါပြီ။ ဒါပေမဲ့ အဲဒီထဲကမှ ခေါင်းထဲမှာ ကပ်သပ် ကျန်နေတဲ့ အချက်ကလေးတွေကို မျှဝေလိုက်ပါတယ်။ ကြည့်လေ။
paper towel တွေ မသုံးသင့်ပါဘူး တဲ့၊ စက္ကူအစား အ၀တ်သုံးရင် ပြန်လျှော်လို့လဲ ရတာမို့ ငွေယိုပေါက်ကို ထိန်းနိုင်တယ်ဆိုပဲ။ သိပ်အသေးစိတ်လှချည်လား လို့ စိတ်ထဲက ချဉ်တင်တင် ဖြစ်သွားတယ်။ ဘာဖြစ်လို့လဲဆိုတော့ ကိုယ်က အ၀တ်လျှော်ရမှာ ပျင်းသူလေ။ ဟိုတနေ့ကတောင် စက္ကူတွေ တထုပ်ကြီး ၀ယ်လာမိသေး။ ဒုက္ခပဲပေါ့။ သူ့အတိုင်းဆို ကိုယ်ဟာ ဖြုန်းတီးသူကြီး ဖြစ်ရပြီ။
မီးခလုတ်တွေကို မသုံးဘဲ ဖွင့်မထားနဲ့ တဲ့။ မီတာခ တက်တာပေါ့ တဲ့။ ခက်တာပဲ။ ကိုယ်က ဗမာပြည်ကလာတာဆိုတော့ ဘယ်လောက် အလင်းကို တမ်းတသလဲ ဆိုရင် အိပ်ရင်တောင် လေးဖြူရဲ့ အလင်းရောင်ကို အိပ်မက်ထဲမှာ ဆိုနေတာပါ။ ဒါကြောင့် မအိပ်ခင် ညလေးတော့ လင်းနေချင်တယ်။ ဒါလဲ ကိုယ်နဲ့ မကိုက်ပြန်ဘူးပဲ။
နောက်တခု ဖြုန်းတဲ့အထဲမှာပါတာက pet clothing တဲ့။ အခုမှ ကြောင်မွေးမလို့ ကြံရုံရှိသေး၊ ပိုက်ဆံကုန်တယ်ဆိုတော့ ဘာသွားလုပ်ရမှာတုန်း။ အဲဒီ ချစ်စရာ ကြောင်နာလေးတွေကို သွားကြဟဲ့ သွားကြဟဲ့ ငါ့အနားမလာကြနဲ့၊ နင်တို့က ပိုက်ဆံကုန်တယ်ဟဲ့ လို့ ပြောရမှာလား။ ရာသီဥတုက အခုကစ ပြီး အေးတော့မှာဆိုတော့ ကလေးတွေအတွက် နွေးနွေးထွေးထွေး ဘာများ ဆင်ပေးရင် ကောင်းမလဲ စဉ်းစားနေတုန်း အမှောင့်ပယောဂ ဒီဆောင်းပါးက @#$!%^&…။
ပိုက်ဆံလေလွင့်တယ်လို့ ယူဆတဲ့အထဲမှာပါတာက swim wear တဲ့။ ဒီလူ တဆိတ်တော့ နောက်ပြီထင်တယ် လို့ တွေးမိသေး။ သူ့စိတ်ထဲ အ၀တ်ကလေး မဖြစ်စလောက်နဲ့ ဈေးကြီးပေးရတာ မတန်ဘူးလို့ ထင်ပုံရတယ်။ Go natural လို့လဲ ဆိုလိုက်သေး။ ဧကန္တ ဆောင်းပါးရှင်က ယောကျာင်္း ထင်ပါရဲ့ ။ ဒီအချက်ကိုလဲ ပယ်တယ်။
နောက်တခုက ထီထိုးတာ တဲ့။ အဲဒီတခုကတော့ အတော်အောင့်သွားတာပါ။ ကိုယ့်မျှော်လင့်ချက်ကို သူဖျက်ဆီးပြီ။ ကိုယ်က ထီပေါက်ရင် ဘာလုပ်မယ် ညာလုပ်မယ်ဆိုတာ စိတ်အားငယ်တိုင်း တွေးတတ်တာပါ။ အဲဒါကလဲ နေ့တိုင်းလိုလိုပါ။ အခုတော့ ထီသွားထိုးရင်ပဲ ကိုယ့်မှာ အပြစ်ရှိရပြီ။ အော် ဘ၀ ဘ၀..။
ဒါပေမဲ့ ကိုယ် မှန်ကန်သင့်လျော်တယ်လို့ ထင်တဲ့ အချက်တွေကလဲ ရှိသေးတာ တွေ့ရတယ်။ အဲဒါတွေက အရက်သေစာ တဲ့ (ဟုတ်တာပေါ့၊ ဒါတွေ အတော် ဖြုန်းတီးရာရောက်တယ်)။ ကလေး diapers တဲ့။ (ကိုယ့်မှာ ကလေးမရှိတော့ ဒါလဲ လိုက်နာသင့်တဲ့အထဲ ပါတာပဲ။ အနှီးသုံးကြ၊ ပြီးတော့ ပြန်လျှော်..)။ ကလေး မွေးနေ့ပါတီ တဲ့၊ (ဟုတ်မှာပဲ၊ ဆင်ခြင်သင့်တာပေါ့)။ over package items တဲ့။ (ကိုယ်တို့က နှစ်ယောက်တည်းဆိုတော့ အဲဒီလောက် အများကြီးမလိုတော့ ဒါလဲ မှန်တာပဲ။)
အဲဒီတော့ ဆောင်းပါးတခုလုံးလဲ ဖတ်ပြီးရော ကိုယ်လဲ ယူချင်တာတွေယူပြီး ပယ်ချင်တာတွေ ပယ်ပြီး မေ့ချင်တာတွေ မေ့လိုက်တယ်။ သူ့ကိုလဲ အတော်ကောင်းတဲ့ ဆောင်းပါးလေးပဲ ဆိုပြီး ဆွေးနွေးလိုက်တာ ခေါင်းတွေ တော်တော်ညိတ်လိုက်ရပြီး လည်ပင်းလေ့ကျင့်ခန်း လုပ်နေသလားတောင် အောက်မေ့ရတယ်လေ။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
တနေ့ကတော့ ဘာရယ်မဟုတ်ဘူး၊ ဟိုဟိုဒီဒီ လျှောက်စဉ်းစားရင်းနဲ့ လူတွေရဲ့  အစွဲအလန်းတွေကို သွားတွေးမိတယ်။
တရားသဘောနဲ့ ကြည့်မယ်ဆိုရင်တော့ အစွဲအလန်းတွေ မထားတာ ကောင်းတာပေါ့။ ဒါပေမဲ့ လူရယ်လို့ ဖြစ်လာမှတော့ ကိုယ့်စိတ်အစွဲလေးတွေနဲ့ ကိုယ်ရှိတတ်ကြတယ်။
ကိုယ့်အမေဆိုလဲ ပစ္စည်းလေးတခု သုံးလို့ အဆင်ပြေပြီဆိုရင် ဒါလေးကိုပဲ သတ်သတ်မှတ်မှတ် သုံးတတ်တာ ငယ်ငယ်က သတိထားမိတယ်။ ဥပမာ လျှပ်စစ်ပစ္စည်းတခု ၀ယ်မယ်ဆိုရင် National တံဆိပ်ပဲ သုံးတယ်။ အမေတို့ခေတ်က အခုလိုလဲ ရွေးစရာတွေ သိပ်မပေါသေးတာလဲ ပါမှာပေါ့။ နောက်ပြီး သုံးစွဲသူကို စိတ်ချ ယုံကြည်မှုတခု ပေးနိုင်ခဲ့လို့လဲ ဖြစ်မှာပေါ့။
နောက်တော့ သူ့အမေ မာမားဆိုလဲ အဲဒီလို အစွဲအလန်းလေးတွေ ရှိတာ တွေ့ရပြန်တယ်။ ဥပမာ လက်ဝတ်ရတနာဝယ်ရင် ကျန်တဲ့ဆိုင်တွေက ဘယ်လောက်ပဲ ကံစမ်းမဲပေးပေး၊ ပရိုမိုးရှင်းလုပ်လုပ် အဲဒါတွေ ဘာမှ မလုပ်တဲ့ သူဝယ်နေကျဆိုင်လေးမှာပဲ အားပေးတာ တွေ့ရတတ်တယ်။
တခါကတော့ မာမားနဲ့ နှစ်ယောက်သား မြို့ထဲသွားကြတာ ကိစ္စပြီးလို့ စားသောက်မယ်ဆိုတော့ ဆိုင်လေးတဆိုင်ကို ခေါ်သွားတယ်။ ဆိုင်လေးက မခမ်းနားလှပါဘူး။ ကိုယ်က ဆီချက်စားချင်တယ်ဆိုလို့ ခေါ်သွားတာပါ။ ဆိုင်ရှင်နဲ့ မာမားနဲ့က ပြောဆို နှုတ်ဆက်လို့ပါ။ ဒါနဲ့ အသိမိတ်ဆွေဆိုင် ထင်လို့ မေးကြည့်တာ ဒီလိုပဲ လာစားရင်းခင်သွားတာ တဲ့။
ကိုယ့်အမျိုးသား ငယ်ငယ်လေးကတည်းက ခေါ်လာပြီး စားနေကျ တဲ့။ ခုထိ ဆီချက်ဆို အဲဒီဆိုင်ကိုပဲ သတိရတုန်း စွဲတုန်းမို့ အခုဆို ချွေးမကိုတောင် ခေါ်လာစားနေတာလေ။ ငယ်ငယ်ကတည်းက စားခဲ့တာ၊ ကြီးတဲ့အထိ ဒီလက်ရာကို စွဲလန်းတုန်း ဆိုပါတော့။ တကယ်ပဲ စားလို့လဲ ကောင်းခဲ့တယ်။
ကိုယ်ငယ်ငယ်က သတိရတာလဲ ပြောပြရအုံးမယ်။ အိမ်ကို အဖေ့မိတ်ဆွေ လင်မယားနှစ်ယောက် လာတည်းခိုကြတာ မိန်းမက သူ့ပစ္စည်းအထုပ်တွေထဲမှာ ထူးထူးဆန်းဆန်း ခေါင်းအုံးလေး ပါလာတယ်လေ။ ကိုယ်တို့ကလဲ ကလေးဆိုတော့ စပ်စပ်စုစု ကြည့်မိလို့ သိတာပါ။
အဲဒီအံတီက အိပ်ရင် သူ့ခေါင်းအုံးလေး ထုတ်အိပ်တာပါ။ မအိပ်ခင်လဲ စကားပြောတုန်း ခေါင်းအုံးလေးကို ရင်ဘတ်မှာ ပိုက်ထားတတ်တာပါ။ သူ့ခေါင်းအုံးလေးတောင် ကလေးတွေ ယူဆော့မှာ စိုးရိမ်နေတာ။ ကိုယ့်အမေကိုလဲ ပြောပြတယ်။ ဒီခေါင်းအုံးလေးက ကျမအသက်ပဲ မမရေ..တဲ့။ ဘာအဓိပ္ပါယ်နဲ့ ပြောနေသလဲ ကလေးမို့ မသိရပေမဲ့ အမေကတော့ ပြုံးနေတာ မှတ်မိတယ်။ ကိုယ်လဲ ထူးဆန်းနေလို့ မှတ်မိနေတာ။
ကိုယ်ငယ်ငယ်ကလဲ ၆နှစ်မွေးနေ့မှာ အမေက ဗိုလ်မရုပ်လေး တရုပ်ဝယ်ပေးဖူးတယ်။ ကိုယ်တင်မဟုတ်၊ ကိုယ့်ငယ်သူငယ်ချင်း အိအိအတွက်ပါ ဆင်တူ ၀ယ်ပေးတာ။ အရုပ်ကလေး နံမည်က မိနီတဲ့။ အဲဒီအရုပ်လေးက ကိုယ်တော်တော်လေး ကြီးလာတဲ့အထိ ကိုယ်နဲ့အတူရှိတုန်း။ မျက်လုံးတွေ နှုတ်ခမ်းနီဆေးရောင်တွေတောင် ပျက်ကုန်ပြီ ကိုယ်က သိမ်းထားတုန်း။ နောက် အိမ်ပြောင်းတော့မှ အရုပ်လေးရဲ့ ပေါင်တွေ ပြုတ်နေတာမို့ ကိုယ်လက်အင်္ဂါမစုံတာ အိမ်မှာ မထားကောင်းဘူးဆိုလို့ ထားခဲ့ရတယ်။
ကိုယ့်အဖေကိုလဲ စိတ်ထဲမှာ သိပ်အစွဲအလန်း မထားတတ်ဘူးလို့ ထင်တာ ကိုယ့်အထင် တက်တက်စင်အောင် လွဲတာ တွေ့ရသေးတယ်။ ဘာဖြစ်လို့လဲဆိုတော့ အဖေက ဒီနိုင်ငံကို ကိုယ့်ထက် ၅နှစ်လောက် စောပြီး ရောက်နေတာမို့ ကိုယ်နဲ့ပြန်တွေ့တဲ့အချိန်မှာ ရောဂါ တော်တော်ကျွမ်းနေပါပြီ။
အဲဒါက ဘာလဲဆိုတော့ ဒီက နေရာတွေ၊ လမ်းတွေ တော်တော်များများကို အကုန် မြန်မာပြန် ပစ်တာပါ။ သူ့စိတ်ထဲမှာ သူဗမာပြည်မှာ နေနေတာလို့ ယူဆထားချင်ပုံပါပဲ။
ဥပမာ ပြောရရင် -
“ကဲ သမီးရေ အဖေ့ကို အလမ္ဗရာက ကိုခင်မောင်ရွှေတို့အိမ်ကို ပို့..။”
“Alhambra ကို ပြောတာလား အဖေ”
“အေး သမီး။ ဒါပေမဲ့ အလမ္ဗရာဆိုတဲ့ နံမည်က ပိုကောင်းတယ်။ အောင်စည် ဆိုတဲ့ အဓိပ္ပါယ်ရတယ်။ မိုးခေါင်ရင် မိုးရွာအောင် တီးရတဲ့ အောင်မြင်တဲ့ အောင်စည်ကြီးပေါ့။ ကျက်သရေရှိတယ်လေ။”
“အော်..အော်..”
ဒါကတော့ အဖေ မိတ်ဆွေ တယောက်ဆီ လမ်းညွှန် ဖုန်းဆက်နေတာပါ။
“ကျနော်တို့အိမ်က ယမုံနာလမ်းကနေ လာရတယ်ဗျ။”
“ယမုံနာ ဟုတ်လား ဆရာ။ ကျနော် မြေပုံမှာ ရှာမတွေ့လို့၊ ဘယ်လို စာလုံးပေါင်းသလဲ ပြောပါအုံး။”
(အဲဒီအခါ ကိုယ်က ကြားက ဖြတ်ပြီး)
“Ramona Avenue လို့ ပြောတာအကို။ အကို Ramona အတိုင်း တည့်တည့်လာပြီး ဘယ်ကွေ့ရင် ချိုသင်းတို့အိမ် ရောက်တယ်။”
(အဲဒီမှာ အဖေက ထပ်ဝင်ပြောပါသေးတယ်)
“ကျနော်တို့အိမ်မှာ ခင်ဗျား တည်းလို့ရတယ် သိလား။ ယမုံနာ တည်းခိုခန်းပေါ့ဗျာ..တဲ့။”
ပြောရရင်တော့ အစုံပါပဲ။ Rose hill ကိုလည်း နှင်းဆီကုန်း တဲ့။ Red hill ကိုလည်း မြေနီကုန်း တဲ့။
ဆန်ဖရန်စစ်စကိုက Golden Gate တံတားကြီးကို ကိုယ်တို့ကို လိုက်ပြတဲ့အခါ ပြောသေးတယ်။ ဒါ စစ်ကိုင်း တံတားကြီးပဲ သမီးရေ။ ကြည့်..ကြည့် သိပ်လှတယ် တဲ့။
နောက်တခါကတော့ အိမ်နားက လမ်းလေးတလမ်းကတော့ Stalin Way တဲ့။ ရုရှားက ကွန်မြူနစ် ခေါင်းဆောင်ကြီးရဲ့ နံမည်ပေါ့။ အဲဒါကျတော့ ဘယ်လိုပေးမလဲဆိုတော့ အဖေက “လမ်းနီလေး” တဲ့။
တခါကတော့ ကိုယ်တို့ သားအဖ ၃ယောက် ဖလော်ရီဒါကို ခရီးဆန့်ကြပါတယ်။ အဖေ့ မိတ်ဆွေရှိတဲ့ Clear Water ဆိုတဲ့ မြို့ကလေးမှာ လေယာဉ်ဆင်းရတာပါ။ အဖေကတော့ အဲဒီကို သွားတာ တော်တော်ပျော်ခဲ့ပုံပါပဲ။ ဒါကြောင့် နံမည်လဲ သူ့ဖာသာသူ ထုံးစံအတိုင်း ပြောင်းခေါ်လိုက်ပါတယ်။ ရေကြည်အိုင် တဲ့။ ဒါပေမဲ့ အဖေရောက်ဖူးတဲ့ ရန်ကုန်က ရေကြည်အိုင်နဲ့တော့ မတူပါဘူးလေ။ ဒါလဲ စိတ်အစွဲအလန်း တမျိုးပဲလို့ တွေးမိပါတယ်။
မိုးချိုသင်း
အပြည့်အစုံဖတ်မယ်...
ပြန်ခေါက်ထားခဲ့မယ်...
