ဘောလုံး နဲ့ အချစ်ဆုံး

ပရီးမီးယားလိဂ် ဘောလုံးပွဲတွေ စ ပြီ။
ဒါဆိုရင် အိမ်မှာ ဘောလုံးပွဲကြီး လာခင်းကျင်းထားသလို မနက်မိုးလင်း နိုးလာရင်လဲ နိုးနိုးချင်း ကြားရမှာက ဘောလုံးပွဲကြေငြာသူရဲ့ အသံတွေ၊ ပရိသတ်ရဲ့ အားပေးသံ၊ သီချင်းဆိုသံ၊ လက်ခေါက်မှုတ်သံ၊ ၀ီစီသံတွေ..။

ဒီလိုအသံတွေနဲ့ ယဉ်ပါးနေတာ ဆယ်စုနှစ် တခုတောင် ကျော်ခဲ့ပြီ။ ကိုယ်ကလဲ ဘောလုံးဆိုတာကို World Cup လောက်ပဲ စိတ်ဝင်စားတော့ ကျန်တဲ့ ကစားပွဲတွေဆို သိပ်ပြီးကြည့်လို့ နားမလည်ဘူးလေ။ World Cup ဆိုရင်တော့ နိုင်ငံတွေနဲ့ ခွဲထားတာမို့ အပြာအသင်းက အီတလီ၊ အ၀ါအသင်းက ဘရာဇီး စသဖြင့် ခွဲလို့ လွယ်လို့ ကြည့်တတ်တာပါ။

သူကတော့ အင်္ဂလန်က Manchester United အသင်းကို အားပေးသူမို့ အသင်းသားတွေကို သူ့ ငယ်ပေါင်းကြီးဖော်၊ ဂေါ်လီတောက် ဖက် တွေအလား ခင်မင်နေတာပါ။ တခါက သူ့အသင်း ရှုံးသွားလို့ လောကကြီးမှာ နေရတာပဲ အဓိပ္ပါယ် မရှိတော့သလိုလို လာပြောနေလို့ နည်းနည်း ကြည့်ပေးလိုက်ရတယ်။ ဘယ့်နှယ့်ဟာကြီးပါလိမ့် လို့။ သူ အဖြစ်သည်းတာလေးတွေ ပြောပါတယ်။

အဲဒါနဲ့ ၁၉၉၉ ခုနှစ်က ရေးဖြစ်ခဲ့ပြီး ၂၀၀၀ခုနှစ် ဇန်န၀ါရီ ရွှေအမြုတေ မဂ္ဂဇင်းမှာပါခဲ့တဲ့ သူ့ဝါသနာအကြောင်း ရေးထားတဲ့ ကိုယ့်ရဲ့ ၀တ္တုတိုလေး တပုဒ်ကို အမှတ်တရ ပြန်ဖော်ပြပေးလိုက်ပါတယ်။ ဖတ်ကြည့်ကြပါအုံး။

ဘောလုံးနဲ့ အချစ်ဆုံး

ကျမ မှန်ထဲမှာ ကိုယ့်ပုံကိုယ်ကြည့်ပြီး စိတ်ညစ်ရမလို၊ ရယ်ပစ်ရမလို ဖြစ်နေတယ်။ ကြည့်စမ်း.. ကျမ ပုံက ဘောလုံးနဲ့တူသတဲ့။ ဒါဆို ကျမတို့ရဲ့ ဖူးစာရေးနတ်က ဘောလုံးကြီးပေါ့။ သူပြောပုံအရ ဆိုရင်လေ။

သူနဲ့ကျမ အိမ်ထောင်သက် ၃ နှစ်ကျော်ပြီ။ ရည်းစားဘဝက သူ့ပါးစပ်က ကျမကို ချစ်ကြောင်း၊ ကြိုက်ကြောင်း၊ လွမ်းကြောင်းပဲ ထွက်တယ်။ တစ်ခါမှ ဘောလုံးဆိုတာကို မကြားဖူးပါဘူး။ ကျမတို့နဲ့ ဘောလုံးက အဝေးကြီး၊ အဲဒီလို ထင်ခဲ့မိတာ။ အဲဒါ တက်တက်စင်လွဲတာပဲ။ မှားတယ်ဆိုတာတောင် သူ့လောက် အမှားမကြီးဘူး။

ဘောလုံးအကြောင်းကို ကျမ သူနဲ့ ရပြီး မင်္ဂလာဦးညမှာ စကြားရတာ။ ဒီလိုပါပဲ တစ်ယောက်အကြောင်း တစ်ယောက် ရောက်တတ်ရာရာ ပြောကြတာပဲ။ အိမ်အကြောင်း၊ သူငယ်ချင်းတွေအကြောင်း၊ ကိုယ့်အလုပ်အကြောင်း အစုံပဲပေါ့။ အဲဒီမှာ စကားစပ်မိသွားရော။ ဖြစ်ချင်တာ ပြောပါတယ်။ သူနဲ့ကျမက အထက်တန်းကျောင်းမှာ တစ်ကျောင်းတည်း အတူနေခဲ့ကြတာ။ ဒါပေမယ့် တစ်ယောက်နဲ့တစ်ယောက် သိဖူး၊ မြင်ဖူးတာ မဟုတ်ဘူး။ သူက ကျမထက် ၄ နှစ်နီးပါး ကြီးတော့ လူကြီးပေါ့။ သူကလည်း ကျမလို ချာတိတ်ကို ခေါင်းထဲမထည့်။ တခြား ရွယ်တူကောင်မလေးတွေ လှတာလောက်ပဲ သိနေ၊ ကျမကလည်း ကိုယ့်စိတ်ဝင်စားမှုနဲ့ ကိုယ်ပေါ့။ အနေသာကြီး။

ဒါပေမယ့် ဘယ်နေရာမှာ စကားက သွားဆုံသလဲဆိုတော့ သူက ကျောင်းမှာ လက်ရွေးစင်ဘောလုံးသမားပါတဲ့။ ဒီတော့မှ ကျမက အံ့သြတော့တာ။ သူက ကျမ မြင်ဖူးနေတဲ့ ဘောလုံးသမားတွေလို တုတ်တုတ်ခိုင်ခိုင် ထွားထွားကြိုင်းကြိုင်းမှ မဟုတ်ဘဲ။ ရုပ်က အနုပညာသမားရုပ်မျိုး။ နုနုဖတ်ဖတ်ရယ်။ ကျမကလည်း ကျောင်းက ဘောလုံးသမားတွေကို ပန်းစည်းဆက်ဖို့ ဆရာမတွေက တာဝန်ပေးတဲ့ လှပျိုဖြူတွေထဲမှာ ပါသပေါ့လေ။ ဒါပေမယ့် ဖူးစာက အချိန်မကျသေးလေတော့ ကျမ ပန်းစည်းဆက်ရတဲ့ ဘောလုံးသမားက သူမဖြစ်ဘဲ စိတ်ကူးယဉ်စရာ မကောင်းလောက်အောင် ကုလားကြီးပဲ ဖြစ်နေ၊ သူ ပန်းစည်းလက်ခံရတဲ့သူကလည်း မျက်နှာမှာ ပေါင်ဒါအဖွေးသားနဲ့ ချောကလက်မှိုတက်ပဲ ဖြစ်နေသတဲ့။ အဲဒီတော့မှ စသိရတာ၊ သူ ဘောလုံးဝါသနာ ပါတာကို..။

သူက သူ့အကြောင်းကို မျိုးနဲ့ ရိုးနဲ့ချီပြီး ဇနီးဖြစ်သူကို ပြောပြရှာတာပါ။ သူ့အဖေ ရဲ့ အဖေ သူ့အဘိုးကလည်း ဘောလုံးကို အသေအလဲ ဝါသနာကြီးတာတဲ့။ အသက် ၆ဝ ကျော်၊ ၇ဝ ကျော်ထိ ရောက်တာတောင် ရပ်ကွက်ဘောလုံးပွဲကအစ သူ့ကို လက်ဆွဲပြီး ရှေ့ဆုံးက သွားအားပေးတုန်းပါတဲ့။ တစ်ခါ ဘောလုံးပွဲမှာ ‘ညစ်’ကြလို့ အချင်းချင်း ချကြတော့ သူ့အဘိုးကို မထိခိုက်မိအောင် လူအုပ်ကြားထဲက ကာကွယ်ပြီးခေါ်ခဲ့ရတယ် ဆိုလားပဲ။ ကျမလည်း ပြုံးပြီး ငေးနားထောင်နေလိုက်တယ်။ ဒါက အင်ထရိုပေါ့နော်။

ပြီးတော့ သူ့အဖေ ဘောလုံးကို စိတ်ဝင်စားပုံ၊ သူ့ဦးလေးက ဘောလုံး အသည်းအမဲ ဖြစ်ပုံတွေကို စုံနေအောင် ပြောပြနေတာပါ။ ဒါမှ သူဘောလုံးစိတ်ဝင်စားတာဟာ ဖြစ်ရိုးဖြစ်စဉ် ဓမ္မတာတစ်ခုလို၊ ဥပမာ နေက အရှေ့ကထွက်ပြီး အနောက်ကို ပြန်ဝင်သွားတာလိုမျိုး၊ ကမ္ဘာက နေကိုပတ်နေတဲ့ ကိစ္စလိုမျိုး ကျမက သတ်မှတ်ရတော့မလိုပါ။ မျိုးနဲ့ ရိုးနဲ့ ချီနေတာဆိုတော့လေ။

အဲဒီဘောလုံးအကြောင်း ဆက်မပြောခင် ကျမတို့ နှစ် ယောက်အကြောင်းလေး နည်းနည်း ပြောပါရစေဦး။
ကျမနဲ့ သူနဲ့က ရုပ်သွင်ပြင်လက္ခဏာကစလို့ အကြိုက်ချင်းက အရှေ့နဲ့အနောက်၊ တောင်နဲ့မြောက်ပဲ။ သူက ပိန်ပိန်ဖြူဖြူ၊ ကျမက ညိုညို ဝဝ။ သူ့အကြိုက်ဆုံး အစားအစာက ဓညင်းသီးနဲ့ ကန်စွန်းရွက်ချဉ်ရည်ဖြစ်ပြီး ကျမ ခံတွင်းတွေ့တာက ပုစွန်ထုပ်နဲ့ ဝက်သားတို့မှပါ။ ဒီတော့လည်း ဆိုက်ဇ်ချင်းက မတူပါလေ ဆိုတဲ့အထဲကပေါ့။ ဒါပေမယ့် နှစ်ယောက်လုံး ဟာသတွေနှစ်သက်သူမို့ ကျမတို့ ၂ ယောက်ကိုတွေ့ရင် ကြံဖန်ရယ်ပြုံး နေတတ်ပြီး တချို့သူငယ်ချင်းတွေက စိတ်ချမ်းသာလို့ ဒီစုံတွဲကို အမြဲ မြင်ချင်ပါသတဲ့။

အစာစားရင် သူက အသားသိပ်မကြိုက်ဘဲ အရွက်ပဲ ရွေးစားတာများပြီး၊ ကျမ ကတော့ အရွက်စိမ်းစိမ်းမြင်တာနဲ့ သူ့ပန်းကန်ထဲ ထည့်လိုက်တော့တာပါ။ အဲဒါကိုကြည့်ပြီး ကျမ အဒေါ်လိုချစ်ရတဲ့ ကြီးကြီးတစ်ယောက်က “နင်တို့လင်မယားက ဟန်ကျလိုက်တာဟယ်၊ အစားအသောက်ဆို ဘာမှမပစ်ရဘူး။ တစ်ယောက်က အသားကြိုက်၊ တစ်ယောက်က အရွက်ကြိုက်” တဲ့။ ကြီးကြီးပြောတာ မှန်ပါတယ်။ အကြိုက်ချင်းတူရင် လုစားနေရဦးမှာ။ ခုတော့ ဒုက္ခအေးတာပေါ့။

ကျမနဲ့ချစ်တော့ သူက မေးတယ်။ ရှေ့ရေးကို တွက်ချက်ပြီး ကြိုတင် ပြင်ဆင်ထားချင်လို့ပါတဲ့။ ကျမကြိုက်တဲ့ အသုံးအဆောင်၊ အနေအထိုင်၊ အစားအသောက်တွေ အင်တာဗျူးပါလေရော။
‘တနှစ်ကို ဖိနပ်ဘယ်နှစ်ရံ ကုန်သလဲ’ တဲ့။ (ကျမလည်း ကိုယ်စီးတာတောင် မရေတွက်ထားမိပါဘူး) အင်း၊ သုံးလေးရံတော့ ရှိမှာပေါ့ဆိုတော့ သက်ပြင်းချရှာတယ်။ ဖိနပ်ကို ရှပ်တိုက်မစီးပါနဲ့တဲ့။ ပါးကုန်မှာစိုးလို့ ဖွဖွနင်းပါ ဆိုလားပဲ။ ကျမတော့ ငတက်ပြားလျှောက်နည်း ခြေဖျားထောက် လျှောက်ရမယ့်ပုံ။
အင်္ကျီက တစ်လ ဘယ်နှစ်ထည် ဝယ်သလဲတဲ့။ ပုံမှန်မရှိပါဘူးဆိုတော့ ဖျင်ကြမ်းကြီးဆို ခိုင်ခံ့သတဲ့။ ကျမတော့ ဖျင်ကြမ်းထူလပျစ်ကြီးပဲ မချွတ်တမ်း ‘ဒါဝတ်’ လုပ်ရမယ့်ပုံ။
‘အအေး’ ကရောတဲ့။ ဘာ အအေးကြိုက်သလဲတဲ့။ ကျမက သွက်လက်စွာ ထောပတ်သီးဖျော်ရည်လို့ ပြောတော့ သူက ဟိုးအဝေးကြီးကို ဆွေးဆွေးမြည့်မြည့် ငေးနေသေးတယ်။ ပြီးတော့မှ တွေးတွေးဆဆ ပြောတယ်။ တစ်လ တစ်ခွက်လောက်တော့ သောက်ပေါ့ တဲ့။ မှားမိပါတယ်နော်။
‘ဟင်း’ ရောတဲ့။ (အသံက သိပ်တိုးနေပြီ)။ ကျမက တကယ်လည်း အကြိုက်ဆုံးဖြစ်ပြီး သူ့ကို သနားတာလည်း ပါတာမို့ “ကြက်ဥကို ပြုတ် ပြုတ်၊ ကြော်ကြော် အကုန်ကြိုက်တာပဲ” လို့ ဖြေလိုက်တော့ သူက အားရပါးရပြုံးပြီး “ဒါတော့ မဆိုးဘူး” တဲ့ ကျမတို့ ချစ်တဲ့အချိန်က ကြက်ဥဈေးက တစ်လုံး ၃ ကျပ်ခွဲပဲ ရှိသေးတယ်လေ။
ကျမတို့ အိမ်ထောင်မပြုခင် plan ဆွဲတဲ့ အဲဒီအသုံးစရိတ် ဇယားလေးဟာ ရန်ကုန်တက္ကသိုလ်က ဦးယမ်းဘီလူး ဆိုင်သွားတဲ့ ကော်ရစ်ဒါနံရံလေးမှာ ဆေးအသစ်သာ မသုတ်သေးရင် ခုထိရှိဦးမှာပါ။ ကျမ တကယ်ပဲ လွမ်းမိပါတယ်။

အဲဒီလို စကားမျိုးတွေ၊ ချစ်ကြောင်း၊ လွမ်းကြောင်းတွေပဲ အပ်ကြောင်းထပ်ခဲ့တဲ့ ကျမတို့ ချစ်ခရီးဟာ အိမ်ထောင်ပြုအပြီးမှာတော့ ကျမ သူ့ကို သူ့လို ဘာလို့များ အင်တာဗျူး မလုပ်ခဲ့မိပါလိမ့်လို့ နောင်တရမိပါတော့တယ်။ ဘာဖြစ်လို့လဲ ဆိုတော့ ကျမသာ သူ့ကို မေးဖြစ်ခဲ့ရင် ဘာမေးမေး၊ ဘာဗျူးဗျူး သူ့ပါးစပ်က ဘောလုံး၊ ဘောလုံး ဆိုတာချည်းပဲ ကြားရမှာကို အသေအချာ သိနေလို့ပါပဲ။

ကျမ ဘောလုံးကို မမုန်းပါဘူး။ သူနဲ့ရမှ ဘောလုံးပွဲကို ပွဲကြည့်စင်မှာ ထိုင်ကြည့်ဖူးတဲ့သူပါ။ ကြည့်ခဲ့တဲ့အကြိမ်ပေါင်းလည်း မနည်းတော့ပါဘူး။ သူကြည့်ချင်တဲ့ပွဲဆိုရင် မိုးရွာရွာ၊ နေပူပူ သူနဲ့အတူ မခွဲမခွာ တကယ့်ကို စိတ်ပါဝင်စားစွာ လိုက်အားပေးခဲ့တာပါ။ ဒါပေမယ့် ကျမက ကစားနေတဲ့ ဘောလုံးပွဲထက် ဘောလုံးပွဲကြည့်ပရိသတ်ကို ပိုစိတ်ဝင်စားနေမိတာတော့ ဝန်ခံရမှာပဲ။ ပရိသတ်ကြီး ပျော်ရွှင်တာ၊ အားမလိုအားမရဖြစ်တာ၊ စိတ်ပျက်လက်ပျက် ဖြစ်တာတွေဟာ ကျမရင်ထဲကို လှိုင်းတွေလို တချိန်လုံး ဝင်ရိုက်ခတ် နေခဲ့တာ။ ကျမ လူအုပ်နဲ့အတူ အားပေးမိတယ်။ သီချင်းတွေ သံပြိုင်ဆိုမိတယ်။ ကြွေးကြော် အော်ဟစ်ခဲ့တယ်။ သူ့လက်ကို မြဲမြဲဆုပ်ကိုင်ရင်းပေါ့။

ဒါအပြင် တီဗီမှာလည်း ဘောလုံးပွဲတွေ အမြဲလာနေသေးတယ်။ တိုက်ရိုက် ထုတ်လွှင့်မှုဆိုရင် ညဘက်မှာ လာတတ်တာမို့ အင်မတန် အိပ်ရေးပျက်ပါတယ်။ အဲဒါ ဆိုရင်တော့ အပြင်မှာလည်း ဘောလုံး၊ အိမ်မှာလည်း ဘောလုံးဆိုတော့ ကျမလည်း ငြီးငွေ့ပြီ။ ညလယ်စာ ဘောလုံးပွဲကြည့်ရင်းစားဖို့ ခေါက်ဆွဲပြုတ်ဖြစ်ဖြစ် လုပ်ပေးပြီး ကျမ အိပ်တော့တာပဲ။ တခါတလေ ကျမ အိပ်မောကျနေတုန်း ကျမကိုလာနှိုးပြီး “ဟိုမှာ အာဆင်နယ်ကို ဂိုးသွင်းတော့မယ် မြန်မြန်လာ” တဲ့။ သူကြည့်နေရာက ကောင်းတဲ့အကွက်လေး လွတ်သွားမှာစိုးလို့ တကူးတက ခေါ်ရှာပါသေးတယ်။ ကျမသာ ပြန်အိပ်လို့လည်းမပျော်ဘဲ မူးတူးကြောင်တောင် ဖြစ်ကျန်ခဲ့ရတယ်လေ။

တခါတခါ ကျမလည်း ဘောလုံးပွဲကြည့်တဲ့ သူ့ဘေးမှာ ထိုင်ပြီး “အဲဒါ မိုက်ကယ်အိုဝင် မဟုတ်လား” လို့ မေးလိုက်မိရင် ကျမပါ စိတ်ဝင်စားလာပြီ ဆိုပြီး ဝမ်းသာအားရ ရှင်းပြပါလိမ့်မယ် တသီကြီး။ အင်အားဂျာနယ်၊ တက်လမ်းဂျာနယ် စတဲ့ အားကစားဂျာနယ်တွေရဲ့ အမာခံပရိသတ်ဟာ သူမှအစစ်ပေါ့။ တခါက သူချောတယ်ဆိုတဲ့ ဘောလုံးသမားတွေပြလို့ ကြည့်လိုက်တော့ အားလုံး ကတုံးတွေချည်း။ ပုံစံအမျိုးမျိုးနဲ့ ပိုစ့်ပေးနေကြတာပါ။ အားပေးတဲ့ လူတွေရှိတော့လည်း လုပ်ကြပေါ့လေလို့ပဲ စိတ်လျှော့ရပါသေးတယ်။

ကမ္ဘာ့ဘောလုံးဝိဇ္ဇာတွေ တော်ပုံ၊ အားကြိုးမာန်တက် ကြိုးစားခဲ့ရပုံ၊ အခု တစ်လမှာ ဝင်ငွေက ဘယ်လောက်တောင် မြင့်သွားပြီ၊ အသင်းပြောင်းကြေးက ဘယ်နှစ်သန်းတောင် ပေးရတာဆိုတာတွေကို အင်မတန် စိတ်ရှည်သဘောကောင်းတဲ့ ဆရာတစ်ယောက်လို နူးညံ့စွာ ရှင်းပြတတ်ပါတယ်။ ကျမကတော့ သူတို့အကြောင်းထက် သူတို့ဝင်ငွေတွေကိုပဲ အားကျနေမိပါတော့တယ်။ အဲဒီတော့ မခက်လား။

ကမ္ဘာ့ဖလားပွဲတုန်းကတော့ အဆိုးဆုံးပါ။ ပွဲစဉ်ဇယားတွေကို စနစ်တကျ မင်နီ၊ မင်ဝါ၊ မင်စိမ်းတွေတားပြီး highlight လုပ်ကာ အိပ်ရာခေါင်းရင်းမှာ ကပ်ထားပါတယ်။ ဒါ့အပြင် အနိုင်ရတဲ့၊ အမှတ်များတဲ့ ဟိုအသင်းနဲ့ဒီအသင်း တွေ့ကြတော့မို့ မြားတွေ ရှုပ်ယှက်ခတ်ပြီး ဟိုထိုးဒီထိုးနဲ့ ပြထားသေးတယ်။ ပြီးရင် ဒေးဗစ်ဘက်ကမ်းက ဘယ်လိုဂိုးသွင်းပြီး၊ ရော်နယ်ဒိုက လိမ်ခေါက်ပြီး ဘောလုံး ဆွဲပြေးသွားတာကအစ၊ မာလ်ဒိနီ ဘောလုံးဖျက်ထုတ်လိုက်တာ အဆုံးပါပဲ။ ကျမလည်း သူပြောတဲ့ နံမည်တွေများလွန်းတော့ ဒီဘက်နားက ဝင်ပြီး ဟိုဘက်နားက ထွက်သွားတော့တာပဲလေ။

ကမ္ဘာ့ဖလားပွဲပြီးတုန်းကတော့ ကျမလည်း ဝဋ်ကျွတ်ပြီကွဆိုပြီး အားရဝမ်းသာ လက်သီးလက်မောင်း တန်းရုံရှိသေး၊ ဥရောပခြေစစ်ပွဲတွေ လာတော့မယ်ဆိုလား၊ လာနေပြီ ဆိုလား၊ ဟိုကောင်တွေ အပြတ်ကျင့်ကုန်ကြပြီဆိုလား ပြောလို့ စိတ်ဓာတ်များတောင် ကျရပါသေးတယ်။

ဒီလိုပြောလို့ သူက အလုပ်မေ့ မယားမေ့တဲ့သူတော့ မဟုတ်သေးပါဘူး။ သူက ကျမကို အင်မတန် ဂရုစိုက်တတ်သူ တစ်ဦးပါ။ သူ့အကြောင်းစဉ်းစားရင် ကျမ စိတ်ကျေနပ်ခဲ့ရ၊ သူ့ရဲ့ အလိုက်သိမှုကို အံ့သြရ၊ သူ့ရဲ့ ဣနြေ္ဒရတဲ့ မြတ်နိုးမှုကို ကြည်နူးခဲ့ရတဲ့ အကြိမ်ပေါင်း မရေမတွက်နိုင်အောင် များပြားလွန်းလှပါတယ်။ ဒီလိုပဲ ကျမကိစ္စ၊ ကျမဆန္ဒ၊ ကျမ လိုအပ်ချက်၊ ကျမ စိတ်ဝင်စားမှုတွေမှန်သမျှကို သူ့ခေါင်းထဲမှာ အမြဲထည့်ထားသလို ကျမခေါင်းထဲမှာလည်း သူပြောတဲ့ အနီကတ်၊ အဝါကတ်၊ ရှေ့တန်းတိုက်စစ်မှူး၊ နောက်တန်းညာအစွန်လူ၊ ခံစစ်နည်းဗျူဟာ၊ ခြေစစ်ပွဲ၊ အုပ်စုပတ်လည်ပွဲ၊ တစ်ဂိုးစီ သရေပွဲနဲ့ တစ်မှတ်စီ ခွဲယူလိုက်ရတယ်တို့ အစုံရောက်နေတာပေါ့ရှင်။

ကမ္ဘာ့ဖလား၊ ဥရောပအဖွဲ့ချုပ်ဖလား၊ အာရှဖလား၊ အရှေ့တောင် အာရှဖလား စတဲ့ ဖလားတွေလည်း ဒီလောက်ပေါများမှန်း ခုမှ သိရပါတော့တယ်။ ကျမက ရေဖလားလောက်သာ သိသူမဟုတ်လား။ တခါတလေတော့လည်း ငါတို့အကြိုက်ချင်း၊ ဝါသနာချင်းတူရင် အကောင်းသားလို့ စိတ်အားငယ်မိပါရဲ့။ ဘောလုံးကို သဝန်တိုကာ ကျမနဲ့ ဘောလုံး ဘယ်သူ့ပိုချစ်သလဲလို့ မေးရအောင်လည်း ဘောလုံးက သက်ရှိဆို ဟုတ်တုတ်တုတ်။ သူချစ်တဲ့ ဘောလုံးမှာ ကန်နေတဲ့သူတွေတောင် မိန်းမ ပါရှာတာ မဟုတ်ပါဘူးလေလို့ ရူးရူးပေါက်ပေါက် လျှောက်တွေးမိတဲ့အထိပါပဲနော်။

တနေ့ကတော့ သူက ကျမကို ချစ်စဖွယ် စေ့စေ့ကြည့်ပြီး ပြုံးနေတော့ ကျမက “ဘာပြုံးတာလဲ” လို့မေးကြည့်မိတယ်။ အဲဒီတော့ သူက ဘာပြန်ပြောလဲသိလား။ ကျမက ဝပြီး လုံးနေတော့ ဘောလုံးလေးနဲ့တူနေတယ်တဲ့။ ဒါကြောင့် သူပိုချစ်မိသွားတာ ဖြစ်မယ်တဲ့.. ကဲ။

ဒီလိုများဖြင့်လေ.. အင်မတန် လှကြပါတဲ့ အခုခေတ် မော်ဒယ်လ်တွေလို ပိန်ဖို့ဆိုတာ ဒီဘဝမှာ ရှိပါစေတော့။ ။

မိုးချိုသင်း

22 Comments